ന്യൂഡൽഹി: ബുധനാഴ്ച ഡൽഹിയിലെത്തിയ കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദീപ്കെയ്‌ക്കെതിരെ വിമാനത്താവളത്തിൽ പ്രതിഷേധം. അദ്ദേഹം പുറത്തേക്ക് വരുമ്പോൾ ഒരാൾ ദീപ്കെയ്‌ക്കെതിരെ ആക്രോശിക്കുന്ന ദൃശ്യങ്ങൾ സമൂഹമാധ്യമങ്ങളിൽ വൈറലാകുന്നു. എന്തുകൊണ്ടാണ് നിങ്ങൾ രാജ്യത്തെ നശിപ്പിക്കുന്നത്?" എന്ന് ഒരാൾ ദീപകെയോട് ചോദിക്കുന്നത് വീഡിയോയിൽ കാണാം. എന്നാൽ ഇതിന് മറുപടിയായി ചിരിച്ചുകൊണ്ട് തംബ്‌സ്-അപ്പ് കാണിച്ചാണ് സിജെപി നേതാവ് അവിടെനിന്ന് മുന്നോട്ടുനടന്നത്.
ഒക്ടോബർ 10-ന് തന്റെ മുത്തശ്ശിയുടെ മരണച്ചടങ്ങിൽ പങ്കെടുക്കാൻ മഹാരാഷ്ട്രയിലെ സ്വന്തം നാട്ടിലേക്ക് പോയിരുന്ന അദ്ദേഹം, ബുധനാഴ്ച ഉച്ചയോടെയാണ് വീണ്ടും ഡൽഹിയിൽ തിരിച്ചെത്തിയത്. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഒക്ടോബർ 10-ന് സിജെപി നടത്താനിരുന്ന പ്രതിഷേധത്തിന് നേതൃത്വം നൽകാനായി വിമാനത്തിൽ ഡൽഹിയിലെത്തിയ ഉടനെ ദീപ്കെയെ ഡൽഹി പോലീസ് കസ്റ്റഡിയിലെടുത്തിരുന്നു.
ഡൽഹിയിൽ തിരിച്ചെത്തിയതിന് പിന്നാലെ, തന്റെ സഹപ്രവർത്തകരായ അശുതോഷ് റാങ്കയ്ക്കും സൗരവ് ദാസിനും അഞ്ച് ദിവസത്തെ ജുഡീഷ്യൽ കസ്റ്റഡി ലഭിച്ച വിഷയത്തിൽ ദീപ്കെ കേന്ദ്രസർക്കാരിനെതിരെ ആഞ്ഞടിച്ചു.
ദേശീയ പതാക ഉയർത്തുന്നത് രാജ്യത്ത് കുറ്റകൃത്യമാണോ എന്ന് ദീപ്കെ ചോദ്യം ചെയ്തു. "ദേശീയ പതാക ഉയർത്തുന്നത് ഒരു കുറ്റമാണോ? അശുതോഷിനെയും സൗരവിനെയും അഞ്ച് ദിവസത്തേക്ക് ജയിലിലടച്ചിരിക്കുന്നു. എന്തിനാണ്? അവർ ജന്തർ മന്തറിൽ പോയി ദേശീയ പതാക ഉയർത്തി എന്നതുകൊണ്ട് മാത്രം! ബ്രിട്ടീഷുകാർ നമ്മെ ഭരിച്ചിരുന്ന കാലത്താണ് അവസാനമായി ഇതുപോലൊന്ന് സംഭവിച്ചിട്ടുള്ളത്. ബ്രിട്ടീഷ് ഭരണകാലത്താണ് പൊതുസ്ഥലങ്ങളിൽ ദേശീയ പതാക ഉയർത്തിയ സ്വാതന്ത്ര്യസമര സേനാനികളെ അറസ്റ്റ് ചെയ്ത് ജയിലിലടച്ചിരുന്നത്," ഡൽഹിയിലെത്തിയ ശേഷം ദീപ്കെ പറഞ്ഞു.
ചൊവ്വാഴ്ച രാവിലെ ഗേറ്റുകൾ ചാടിക്കടന്ന് ജന്തർ മന്തറിൽ മിന്നൽ സമരം നടത്തിയതിനാണ് സിജെപി അംഗങ്ങളെ അറസ്റ്റ് ചെയ്തത്. തുടർച്ചയായ പ്രതിഷേധങ്ങളെ തുടർന്ന് തിങ്കളാഴ്ച ജന്തർ മന്തറിനെ ഔദ്യോഗികമായി പ്രതിഷേധ സ്ഥലങ്ങളുടെ പട്ടികയിൽ നിന്ന് ഒഴിവാക്കി കേന്ദ്രസർക്കാർ ഉത്തരവിറക്കിയതിന് തൊട്ടടുത്ത ദിവസമാണ് ഈ പ്രതിഷേധം നടന്നത്.
Comments