രജനികാന്തിനെക്കുറിച്ച് വൈകാരികമായ കുറിപ്പ് പങ്കിട്ട് സംഗീത സംവിധായകന്‍ അനിരുദ്ധ്. 75-ാം വയസ്സിലും അദ്ദേഹം സ്‌ക്രീനില്‍ മായാജാലം കാട്ടുകയാണെന്നാണ് അനിരുദ്ധ് കുറിച്ചത്. രജനികാന്തിന്റെ പുതിയ ചിത്രമായ 'ജയിലര്‍ 2'-ന്റെ റിലീസിനു മുന്നോടിയായായിരുന്നു അനിരുദ്ധിന്റെ പോസ്റ്റ്.
അനിരുദ്ധിന്റെ വാക്കുകളിലേക്ക്: "തലമുറകളായി അദ്ദേഹം നമുക്ക് സന്തോഷവും ചിരിയും രോമാഞ്ചമുണര്‍ത്തുന്ന നിമിഷങ്ങളും ജീവിതകാലം മുഴുവന്‍ കൂടെയുണ്ടാകുന്ന ഒരുപാട് ഓര്‍മകളും സമ്മാനിച്ചിരിക്കുന്നു. ഈ 76-ാം വയസ്സിലും അദ്ദേഹം മായാജാലം കാട്ടുകയും ചരിത്രം തിരുത്തിക്കുറിക്കുകയും ചെയ്യുന്നു. കഴിഞ്ഞ 51 വര്‍ഷമായി അദ്ദേഹം അത് തുടരുകയാണ്. നാളെ, 172-ാം തവണയും തിയേറ്ററുകളിലെ വെളിച്ചം മങ്ങുകയും സ്‌ക്രീനുകള്‍ തെളിയുകയും ചെയ്യും. ഒപ്പം നിങ്ങളുടെയെല്ലാം ആശംസകളോടെ ഓരോ ഇന്ത്യക്കാരന്റെയും ഹൃദയത്തില്‍ കുടികൊള്ളുന്ന ആ മനുഷ്യനോടുളള സ്‌നേഹത്തിന് ലോകം സാക്ഷ്യം വഹിക്കും. ഒരു സൂര്യന്‍. ഒരു ചന്ദ്രന്‍. പിന്നെ ഒരാള്‍ മാത്രം... ജയിലര്‍ 2 നാളെ മുതല്‍."
അതേസമയം, 'ജയിലര്‍ 2' റിലീസിനെത്തിയിരിക്കുകയാണ്. മികച്ച പ്രതികരണമാണ് ചിത്രം നേടിക്കൊണ്ടിരിക്കുന്നത്. സുരാജ് വെഞ്ഞാറമൂട് അടക്കം നിരവധി മലയാളം താരങ്ങള്‍ ചിത്രത്തില്‍ അണിനിരക്കുന്നുണ്ട്. മോഹന്‍ലാല്‍, എസ്.ജെ. സൂര്യ, വിദ്യ ബാലന്‍, മിഥുന്‍ ചക്രവര്‍ത്തി തുടങ്ങി വലിയൊരു താരനിര തന്നെ ചിത്രത്തിലുണ്ട്.
Comments