മലയാളത്തില്‍ തുടക്കം കുറിച്ച് തെന്നിന്ത്യന്‍ താരറാണിയായി തിളങ്ങി നില്‍ക്കുന്ന അഭിനേത്രിയാണ് മമിത ബൈജു. സിനിമാ പാരമ്പര്യമൊന്നുമില്ലാതെ ക്യാമറയ്ക്ക് മുന്നിലെത്തിയ മമിത, ഇന്ന് തെന്നിന്ത്യൻ സിനിമയിലെ തിരക്കേറിയ യുവ നായികമാരിലൊരാളാണ്. ചിരിയിലൂടെയും അഭിനയത്തിലൂടെയും ചടുലമായ നൃത്തച്ചുവടുകളിലൂടെയും ആരാധകരുടെ ഹൃദയം കീഴടക്കിയ താരം ജന നായകനും, വിശ്വനാഥ് ആന്‍ഡ് സണ്‍സും, ബെത്ലഹേം കുടുംബ യൂണിറ്റുമൊക്കെ കോടി കിലുക്കത്തിലേക്ക് അതിവേഗം എത്തിച്ച നായികയാണ്. തെന്നിന്ത്യയുടെ ക്രഷും പ്രേക്ഷകരുടെ ഇഷ്ടനായികയുമായി മാറിയ മമിതയ്ക്ക് താരറാണിയായിട്ടു കൂടി ജാഡയില്ലാത്ത അഭിനേത്രിയെന്ന പേരും സ്വന്തമാക്കിയിട്ടുണ്ട്.
ഇപ്പോഴിതാ വര്‍ഷങ്ങള്‍ക്കു മുമ്പ് മമിതയുടെ ഈ മുന്നേറ്റം മുൻകൂട്ടി ‘പ്രവചിച്ച’ ബിജു മേനോന്റെ ഒരു വിഡിയോയാണ് സോഷ്യല്‍ മീഡിയയില്‍ വൈറലാകുന്നത്. രഞ്ജൻ പ്രമോദിന്റെ സംവിധാനത്തിൽ 2017-ൽ പുറത്തിറങ്ങി വൻ വിജയം നേടിയ ‘രക്ഷാധികാരി ബൈജു ഒപ്പ്’ എന്ന സിനിമയിൽ ബിജു മേനോൻ മകൾ ബബിത ബൈജുവിനോട് പറഞ്ഞ തമാശ ഡയലോഗാണ് വർഷങ്ങൾക്കിപ്പുറം മമിതയുടെ താരമൂല്യവുമായി ചേർത്തുവെച്ച് ആരാധകര്‍ ആഘോഷമാക്കുന്നത്.
ബിജു മേനോന്റെ സ്വാഭാവിക അഭിനയവും നാട്ടിൻപുറത്തിന്റെ നന്മയും സൗഹൃദവുമെല്ലാം ഒപ്പിയെടുത്ത ഈ ചിത്രം ഇന്നും മലയാളികൾക്ക് ഏറെ പ്രിയപ്പെട്ടതാണ്. സിനിമയിൽ ബൈജുവിന്റെ മകളുടെ പേര് ‘ബബിത ബൈജു’ എന്നാണ്. സിനിമയിൽ മകളോട് സംസാരിക്കുന്നതിനിടയിൽ, ‘‘ബബിത ബൈജു, കാവ്യ മാധവനേക്കാൾ ഒരു പടി മുകളിലെത്തും...’’ എന്ന് ബിജു മേനോൻ ആത്മവിശ്വാസത്തോടെ പറയുന്നുണ്ട്. എന്നാൽ ഇതുകേട്ട് ‘‘ബബിത ബൈജു, ഒരു പൊട്ട പേരുമിട്ടിട്ട് കാവ്യ മാധവൻ പോലും...’’ എന്ന് മകൾ കെറുവിച്ച് തിരിഞ്ഞുനടക്കുകയും ചെയ്യുന്നു. അതു കേട്ടിട്ട്, ‘‘എന്നാൽ നീ ആ ബൈജു അങ്ങ് കളഞ്ഞോടീ...’’ എന്ന് ബിജു മേനോനും തമാശയായി പറയുന്നുണ്ട്. ഈ സംഭാഷണമാണ് മമിത ബൈജുവിന്റെ അമ്പരപ്പിക്കുന്ന വിജയവുമായി ബന്ധപ്പെടുത്തി ട്രോളന്മാരും സിനിമാപ്രേമികളും വൈറലാക്കുന്നത്.
സിനിമയിലെ ആ പേര് യഥാർത്ഥ ജീവിതത്തിൽ ‘മമിത ബൈജു’ എന്നായി മാറിയപ്പോൾ, ആ പ്രവചനം സത്യമായതുപോലെയാണെന്നാണ് സോഷ്യൽ മീഡിയയുടെ പക്ഷം. സിനിമയിലെ ആ സാങ്കൽപ്പിക കഥാപാത്രമായ ബബിത ബൈജു കാവ്യ മാധവനെ വെല്ലുവിളിച്ചില്ലെങ്കിലും, മലയാള സിനിമയിൽ ഇന്ന് തരംഗമായി മാറിയ മമിത ബൈജുവിനെ കണ്ടപ്പോൾ ബിജു മേനോൻ അന്ന് പറഞ്ഞ ആ സംഭാഷണം ഒരു മുൻകൂട്ടിയുള്ള പ്രവചനമായിരുന്നോ എന്നാണ് ആരാധകർ കമന്റുകളിലൂടെ തമാശരൂപേണ ചോദിക്കുന്നത്.
‘പ്രേമലു’ ഉൾപ്പെടെയുള്ള ചിത്രങ്ങളിലൂടെ തെന്നിന്ത്യയൊട്ടാകെ വൻ ആരാധകവൃന്ദത്തെ സൃഷ്ടിച്ച് ജനപ്രിയ താരമായി മാറിയ മമിതയുടെ വളർച്ചയെയാണ് പ്രേക്ഷകർ ബിജു മേനോന്റെ ഡയലോഗുമായി രസകരമായി ചേർത്തുവെക്കുന്നത്. തുടർച്ചയായി മൂന്ന് 200 കോടി ചിത്രങ്ങളുടെ ഭാഗമായ താരം, പ്രേമലു, ഡ്യൂഡ്, ജനനായകന്‍, വിശ്വനാഥ് ആന്‍ഡ് സണ്‍സ്, ബെത്ലഹേം കുടുംബ യൂണിറ്റ് എന്നിങ്ങനെ 100 കോടി ക്ലബിൽ കടന്ന അഞ്ചു സിനിമകളും മമിതയുടെ ക്രെഡിറ്റിലുണ്ട്.
Comments