ന്യൂഡല്‍ഹി: തിങ്കളാഴ്ച ഇന്‍ഡ്യാമുന്നണി സുപ്രീംകോടതിയിലേക്ക് നടത്തിയ മാര്‍ച്ചില്‍ കടുത്ത വിമര്‍ശനം. പ്രതിപക്ഷ നേതാവ് രാഹുല്‍ ഗാന്ധിയുടെ നേതൃത്വത്തില്‍ നടന്ന മാര്‍ച്ചിലും കോടതി അങ്കണത്തിലെ പ്രതിഷേധത്തിലും സുപ്രീം കോടതി കടുത്ത പരാമര്‍ശങ്ങള്‍ നടത്തി. നീതിന്യായ വ്യവസ്ഥയെ ഭയപ്പെടുത്താന്‍ കഴിയില്ല എന്ന് ചീഫ് ജസ്റ്റിസ് സൂര്യകാന്ത്, വ്യക്തമാക്കി.
എസ്‌ഐആറുമായി ബന്ധപ്പെട്ട തീരുമാനങ്ങളില്‍ തിരഞ്ഞെടുപ്പ് കമ്മീഷനെ ചോദ്യം ചെയ്തുകൊണ്ട് രാഹുല്‍ ഗാന്ധിയും മറ്റ് ഇന്ത്യാ മുന്നണി നേതാക്കളും സമര്‍പ്പിച്ച ഹര്‍ജികള്‍ സുപ്രീം കോടതി പരിഗണിച്ചു. തിരഞ്ഞെടുപ്പ് കമ്മീഷന്‍, മുഖ്യ തിരഞ്ഞെടുപ്പ് കമ്മീഷണര്‍, മറ്റ് രണ്ട് തിരഞ്ഞെടുപ്പ് കമ്മീഷണര്‍മാര്‍ എന്നിവര്‍ക്ക് കോടതി നോട്ടീസ് അയച്ചു. എന്നാല്‍ നോട്ടീസ് അയച്ചതുകൊണ്ട് രാഷ്ട്രീയ നേതാക്കളുടെ ആ പ്രവൃത്തിയെ ശരിവയ്ക്കുന്നതായി അര്‍ത്ഥമില്ലെന്നും കോടതി വ്യക്തമാക്കി.
സുപ്രീം കോടതിയിലെ പ്രതിഷേധ വിഷയം സോളിസിറ്റര്‍ ജനറല്‍ തുഷാര്‍ മേത്തയും അഭിഭാഷകന്‍ ഗൗരവ് ഭാട്ടിയയും ഉന്നയിച്ചതിനെത്തുടര്‍ന്നാണ് കോടതിയുടെ ഈ കടുത്ത പരാമര്‍ശങ്ങള്‍ ഉണ്ടായത്. ഈ കോടതിയില്‍ രാഷ്ട്രീയ ഘോഷയാത്ര നടക്കുന്നത് അംഗീകരിക്കാനാകില്ല. സുപ്രീം കോടതിയില്‍ സംഭവിച്ചവ സംഭവിക്കാന്‍ പാടില്ലായിരുന്നു എന്ന് ഭാട്ടിയ ചൂണ്ടിക്കാണിച്ചു. പ്രതിഷേധവും ചര്‍ച്ചയും കോടതിക്ക് മേല്‍ സമ്മര്‍ദ്ദം ചെലുത്താനുള്ള ശ്രമമാണെന്ന ഭാട്ടിയുടെ വാദത്തോട്, അത്തരം ശ്രമങ്ങള്‍ 'ദുര്‍ബലമായവ' ആണെന്നാണ് ചീഫ് ജസ്റ്റിസ് വിശേഷിപ്പിച്ചത്.
ഇന്ത്യാ മുന്നണിയുടെ പ്രതിഷേധത്തിനിടയിലെ കോടതി അങ്കണത്തിലെ സിസിടിവി ദൃശ്യങ്ങള്‍ സൂക്ഷിക്കണമെന്നും കോടതി നിര്‍ദ്ദേശിച്ചു. കഴിഞ്ഞ തിങ്കളാഴ്ച, ഒക്ടോബര്‍ 12-ന്, മധ്യ ഡല്‍ഹിയിലെ ബരാഖംബ റോഡില്‍ നിന്ന് ആരംഭിച്ച് സുപ്രീം കോടതിയില്‍ അവസാനിച്ച ഇന്ത്യാ മുന്നണിയുടെ മാര്‍ച്ചിന് രാഹുല്‍ ഗാന്ധി നേതൃത്വം നല്‍കിയിരുന്നു. ഈ പ്രതിഷേധം കോടതി കോംപ്ലക്‌സില്‍ വലിയ ജനക്കൂട്ടത്തിന് കാരണമായിരുന്നു.
നേരത്തെ, എസ്‌ഐആര്‍ നടപടിയും തിരഞ്ഞെടുപ്പ് കമ്മീഷന്റെ പ്രവര്‍ത്തനങ്ങളും ചര്‍ച്ച ചെയ്യാന്‍ സമയം തേടിക്കൊണ്ടുള്ള രാഹുല്‍ ഗാന്ധിയുടെ അപേക്ഷ ചീഫ് ജസ്റ്റിസ് സൂര്യകാന്ത് നിരസിച്ചിരുന്നു. കോടതിയെ ജുഡീഷ്യല്‍ വശത്തിലൂടെ സമീപിക്കാന്‍ നേതാക്കള്‍ക്ക് സ്വാതന്ത്ര്യമുണ്ടെന്ന് വ്യക്തമാക്കിയതോടൊപ്പം, സര്‍ക്കാരിന്റെ ഭരണപരമായ വശങ്ങളിലെ പ്രവര്‍ത്തനങ്ങളില്‍ കോടതിക്ക് ഇടപെടാന്‍ കഴിയില്ലെന്നും അദ്ദേഹം അറിയിച്ചിരുന്നു. ഈ ആഴ്ചയാണ് ഡല്‍ഹിയിലെ പ്രധാന പ്രതിഷേധ കേന്ദ്രമെന്ന പദവി ജന്തര്‍മന്തറിന് നഷ്ടപ്പെട്ടത്. ജന്തര്‍മന്തറിനെ നിയുക്ത പ്രതിഷേധ കേന്ദ്രമെന്ന പദവിയില്‍ നിന്ന് ഒഴിവാക്കിക്കൊണ്ടുള്ള കേന്ദ്ര സര്‍ക്കാരിന്റെ തീരുമാനത്തെ ചോദ്യം ചെയ്തുകൊണ്ട് സുപ്രീം കോടതിയില്‍ ഹര്‍ജി എത്തിയതോടെ ഈ വിഷയം വീണ്ടും ചര്‍ച്ചയായിരിക്കുകയാണ്.
'ഞങ്ങള്‍ കേന്ദ്ര സര്‍ക്കാരിനും ഡല്‍ഹി പോലീസിനും നോട്ടീസ് അയക്കുകയും അവരുടെ മറുപടി തേടുകയും ചെയ്യുന്നു. അവര്‍ മറുപടി നല്‍കട്ടെ. തൃപ്തികരമല്ലെങ്കില്‍, നിയമം അതിന്റെ വഴിക്ക് നീങ്ങുമെന്നും സുപ്രീം കോടതി വ്യക്തമാക്കി.
Comments