തൊണ്ണൂറുകളിലും രണ്ടായിരത്തിന്റെ തുടക്കത്തിലുമൊക്കെ ബോളിവുഡിന്റെ ഹിറ്റ് പ്രണയജോഡികളായി വെള്ളിത്തിരയില്‍ നിറഞ്ഞു നിന്ന കോമ്പോയായിരുന്നു സൽമാന് ഖാനും കരിഷ്മ കപൂറും. ഇവരുടെ റൊമാന്‍സും കോമഡിയും ഹിറ്റ് ഗാനങ്ങളുമെല്ലാം പ്രേക്ഷകര്‍ ഏറ്റെടുത്തിട്ടുണ്ട്. 11 സിനിമകളിലാണ് ഇവര്‍ ഒരുമിച്ച് സ്‍ക്രീനിലെത്തിയത്. അതെല്ലാം തന്നെ ബ്ലോക്ക്ബസ്റ്റര്‍ വിജയങ്ങളുമായിരുന്നു.
ഇപ്പോഴിതാ വര്‍ഷങ്ങള്‍ക്കിപ്പുറം കോഫി വിത്ത് കരണ്‍ എന്ന ടോക്ക് ഷോയിലൂടെ സല്‍മാന്‍ കരിഷ്മ കോമ്പോ വീണ്ടും പ്രേക്ഷകര്‍ക്ക് മുന്നിലെത്തുകയാണ്. തങ്ങള്‍ ഒരുമിച്ച് അഭിനയിച്ച സിനിമാ ലൊക്കേഷനുകളും രസകരമായ ഓര്‍മ്മകളുമാണ് കരിഷ്മ പങ്കിട്ടത്. സൽമാന് മധുരപലഹാരങ്ങളോട് വലിയ ഇഷ്ടമാണെന്നും, ഒരു സിനിമയുടെ ചിത്രീകരണത്തിനിടയിൽ പ്രഭാതഭക്ഷണത്തോടൊപ്പം സല്‍മാന്‍ ചോക്ലേറ്റുകള്‍ കഴിച്ചപ്പോള്‍ താനും കൂടെ കൂടിയെന്നും കരിഷ്മ ഓർത്തെടുത്തു. തങ്ങള്‍ ധാരാളം വഴക്കുകൾ ഉണ്ടാകാറുണ്ടായിരുന്നു കരിഷ്മ പറഞ്ഞു. ഒരു തവണ താന്‍ ധരിച്ചിരുന്ന വസ്ത്രത്തിന്റെ പേരിൽ തന്നോടൊപ്പം അഭിനയിക്കാൻ സൽമാൻ വിസമ്മതിച്ചിരുന്നു എന്നും താരം പറഞ്ഞു.
‘‘ദുൽഹൻ ഹം ലേ ജായേംഗേ’യുടെ സമയത്ത്, ആ ഐക്കണിക് വസ്ത്രത്തിൽ എനിക്ക് വലിയ ആവേശമുണ്ടായിരുന്നു, ഞാൻ അതിൽ തരംഗം സൃഷ്ടിക്കുമെന്ന് കരുതി, എന്നാൽ സൽമാൻ എന്നോട് പറഞ്ഞത്, ‘നീ എന്താണ് ഈ ധരിച്ചിരിക്കുന്നത്? ഇതുപോലെ വസ്ത്രം ധരിച്ചാൽ നിന്നോടൊപ്പം ഞാൻ ഷൂട്ട് ചെയ്യില്ല...’ എന്നാണ്. സൽമാൻ ആ വസ്ത്രം ധരിക്കാൻ അനുവദിക്കാത്തതിനെത്തുടർന്ന്, ഞാൻ സംവിധായകൻ ഡേവിഡ് ധവാനോട് പരാതി പറയേണ്ടി വന്നു...’’ എന്നാണ് കരിഷ്മ പറഞ്ഞത്.
ഔട്ട്ഫിറ്റ് ഗ്ലാമറസ്സും സെക്സിയുമായതുകൊണ്ടാണോ സൽമാന് പ്രശ്നമുണ്ടായതെന്ന് അവതാരകനായ കരൺ ചോദിച്ചപ്പോൾ, കരിഷ്മ അത് സമ്മതിച്ചു. ‘‘അതെ, കാരണം ആ ഔട്ട്ഫിറ്റ് തുറന്നതും ശരീരത്തോട് ഒട്ടിനിൽക്കുന്നതുമായിരുന്നു...’’ എന്ന് കരിഷ്മ പറഞ്ഞപ്പോള്‍ സൽമാൻ ഇത് നിഷേധിച്ച്, ആ വസ്ത്രം വളരെ ചെറുതായിരുന്നു എന്ന് പറയുകയും ചെയ്തു. ‘‘ഓരോ ടേക്കിനും മുമ്പ് അത് താഴേക്ക് വലിച്ചിടാൻ ഞാൻ അവളോട് ആവശ്യപ്പെടുമായിരുന്നു. അത് തീർത്തും സുതാര്യമായ വസ്ത്രമായിരുന്നു...’’ സല്‍മാന്‍ പറഞ്ഞു.
തന്നോട് സൽമാന് അമിതമായ കരുതൽ ഉണ്ടായിരുന്നു എന്നും കരിഷ്മ സമ്മതിച്ചു. ‘‘ സല്‍മാന്‍ പറയുന്നത്, ‘പോയി വേറെ വസ്ത്രം ധരിക്കൂ, എനിക്കിത് ഇഷ്ടപ്പെട്ടില്ല’ എന്നാണ്. അതുകൊണ്ട് ഞങ്ങൾ തമ്മിൽ പലപ്പോഴും വഴക്കുണ്ടാകുമായിരുന്നു...’’ താരം പറഞ്ഞു. സ്വിംസ്യൂട്ടും അതിന് ചേരുന്ന ബീച്ച് റാപ്പും ധരിച്ചാണ് ഈ പാട്ടിന്റെ ആദ്യ സീനില്‍ കരിഷ്മ എത്തിയത്. ഷോ അവതാരകനും പ്രശസ്ത സംവിധായകനുമായ കരണ്‍ ജോഹര്‍ താരങ്ങളുടെ ഈ സംഭാഷണം പൊട്ടിച്ചിരിയോടെയാണ് ഏറ്റെടുത്തത്.
ഡേവിഡ് ധവാൻ സംവിധാനം ചെയ്ത് 2000 ല്‍ റിലീസായ റൊമാന്റിക് കോമഡി ചിത്രമായിരുന്നു ‘ദുൽഹൻ ഹം ലേ ജായേംഗെ’. സൽമാൻ ഖാനും കരിഷ്മ കപൂറും പ്രധാന വേഷങ്ങളിലെത്തിയ ഈ ചിത്രം രാജ് ഒബ്‌റോയിയുടെയും സ്വപ്നയുടെയും പ്രണയകഥയാണ് പറയുന്നത്. സല്‍മാനും കരിഷ്മയ്ക്കുമൊപ്പം പരേഷ് റാവൽ, ഓം പുരി, അനുപം ഖേർ എന്നിവരും സിനിമയില്‍ പ്രധാന വേഷങ്ങളിലെത്തി. ചിത്രത്തിലെ പാട്ടുകളും സൽമാൻ-കരിഷ്മ ജോഡികളുടെ കെമിസ്ട്രിയും കൊണ്ട് വാണിജ്യപരമായി വിജയിച്ച ഹിന്ദി ചിത്രങ്ങളിൽ ഒന്നായി ഇത് മാറുകയും ചെയ്തു.
Comments