മൂന്നു വര്‍ഷങ്ങള്‍ക്ക് മുമ്പ് നെൽസൺ സംവിധാനം ചെയ്ത ‘ജയിലറി’ലെ ടൈഗർ മുത്തുവേൽ പാണ്ഡ്യനായി രജനികാന്ത് തിയേറ്ററുകളില്‍ തരംഗം സൃഷ്ടിച്ചിരുന്നു. കാത്തിരിപ്പുകള്‍ക്കവസാനം ചിത്രത്തിന്റെ സീക്വലായി എത്തുന്ന ‘ജയിലർ 2’ ഇന്ന് റിലീസ് ചെയ്തു. നിരവധി മലയാളി താരങ്ങളെത്തുന്ന ചിത്രത്തിന്റെ ആദ്യ ഭാഗത്തിൽ രജനീകാന്തിന്റെ മുത്തുവേൽ പാണ്ഡ്യന്റെ സുഹൃത്തായി മോഹൻലാൽ എത്തിയിരുന്നു. രണ്ടാം ഭാഗത്തില്‍ ആദ്യ ഭാഗത്തിൽ നിന്നും വ്യത്യസ്തനായി മോഹന്‍ലാലും എത്തുന്നുണ്ട്. രണ്ടാം ഭാഗത്തില്‍ സുരാജ് വെഞ്ഞാറമൂടാണ് വില്ലന്‍ വേഷത്തിലെത്തുന്നത്.
ഇപ്പോഴിതാ ‘ജയിലർ 2’ വിൽ അഭിനയിച്ച അനുഭവങ്ങള്‍ പങ്കുവയ്ക്കുകയാണ് സുരാജ്. ‘ജയിലർ 2’ സൂപ്പർ ഷോയിൽ സിനിമയിലെ മറ്റ് അഭിനേതാക്കള്‍ക്കും അണിയറപ്രവര്‍ത്തകര്‍ക്കും ഒപ്പമെത്തിയപ്പോഴാണ് സുരാജ് തന്റെ രസകരകമായ അനുഭവം പങ്കിട്ടത്.
‘‘വീര ധീര സൂര’യുടെ സംവിധായകൻ അരുൺ കുമാർ സാർ എന്നെ വിളിച്ചിട്ട് പറഞ്ഞു, ‘സൺ പിക്ചേഴ്സിൽ നിന്ന് നിങ്ങൾക്കൊരു കോൾ വരും. ഞാൻ നെൽസൺ സാറിനെ കണ്ടിരുന്നു. നിങ്ങൾക്ക് ‘ജയിലർ 2’ വിൽ ഒരു കാരക്ടർ ഉണ്ടെന്ന് എന്നോട് പറഞ്ഞു’ എന്ന്. അത് കേട്ടപ്പോൾ ഞാൻ ഭയങ്കര ആവേശത്തിലായി.
കാരണം എനിക്ക് നെൽസണെ ഭയങ്കര ഇഷ്ടമാണ്. അദ്ദേഹത്തിന്റെ ആദ്യ സിനിമ ‘കോലൈമാവ് കോകില’ കണ്ടപ്പോഴെ എനിക്ക് അദ്ദേഹത്തെ ഇഷ്ടമായിരുന്നു. ഒരു യുണീക്ക് ആയിട്ടുള്ള സംവിധാനമാണ് അദ്ദേഹത്തിന്റേത്. ഇന്ത്യയിൽ ഞാൻ വേറൊരു സംവിധായകനിലും അങ്ങനെ കണ്ടിട്ടില്ല. ടെൻഷനടിക്കുമ്പോൾ കോമഡി ഉണ്ടാക്കുക എന്ന് പറയുന്നത് അത്ര ചെറിയ കാര്യമല്ല. എനിക്ക് കോമഡി ഭയങ്കര ഇഷ്ടമാണ്. പിന്നെ സാറിന്റെ എല്ലാ സിനിമയും ഞാൻ കണ്ടിട്ടുണ്ട്. ‘ജയിലർ 1’ തിയറ്ററിൽ കണ്ടപ്പോൾ, രജനി സാറിനെ വേറെ ലെവലില്‍ കാണാന്‍ കഴിഞ്ഞു. അനിരുദ്ധ് സാർ വേറെ ലെവൽ. ലാൽ സാർ, ജാക്കി ഷെറോഫ് സാർ അങ്ങനെ എല്ലാവരും നന്നായി ചെയ്തു. പ്രത്യേകിച്ച് എന്റെ സുഹൃത്ത് വർമൻ (വിനായകൻ) അദ്ദേഹവും സൂപ്പറായി ചെയ്തിട്ടുണ്ട്. ഒരു പ്രാവശ്യമെങ്കിലും ഇവരുടെ കൂടെ വർക്ക് ചെയ്യണമെന്ന് എനിക്ക് ആഗ്രഹമുണ്ടായിരുന്നു.
അങ്ങനെ ഞാൻ നെൽസൺ സാറിനെ കണ്ടു. എന്റെ ക്യാരക്ടർ എങ്ങനെയാണെന്നൊക്കെ അദ്ദേഹം എനിക്ക് പറഞ്ഞു തന്നു. എനിക്കത് ഒരുപാട് ഇഷ്ടപ്പെട്ടു. അവിടെയെത്തും മുമ്പു തന്നെ ഈ സിനിമ ചെയ്യണമെന്ന് ഞാൻ മനസ്സില്‍ തീരുമാനിച്ചിരുന്നു. ‘ഡയലോഗ് ഒക്കെ എനിക്ക് നേരത്തെ തരണം, എനിക്കത് പഠിക്കണ’മെന്ന് ഞാൻ അദ്ദേഹത്തോട് പറഞ്ഞു. അങ്ങനെ അദ്ദേഹം എനിക്കതൊക്കെ തന്നു. ഞാൻ ഷൂട്ടിനായി റെഡിയായി. ഫുൾ കോൺഫിഡന്റായി ലൊക്കേഷനിൽ എത്തി. അപ്പോൾ നെൽസൺ സാർ എന്നെ കൂളായി നിന്നു നോക്കി. ‘സാർ ഡയലോഗ് എല്ലാം ഓക്കെ ആണോ സാർ ?’ എന്ന് ചോദിച്ചു. ഞാൻ പറഞ്ഞു ‘എല്ലാം ഓക്കെ’ എന്ന്. അപ്പോൾ, നെൽസൺ സാർ, ‘ആ ഡയലോഗ് ഒന്നും ഇല്ല, എല്ലാം മാറ്റി’ എന്ന് പറഞ്ഞു.
ഞാൻ അമ്പരന്ന് ചോദിച്ചു, ‘എന്താ ?’ എന്ന്. ‘എല്ലാം മാറ്റി സാർ, പുതിയ ഡയലോഗ് വച്ചു’ എന്നായി അദ്ദേഹം. എന്നിട്ട് അദ്ദേഹത്തിന്റെ അസോസിയേറ്റ് ഭാർഗവിയെ വിളിച്ചു പറഞ്ഞു, ‘ഭാർഗവി ഇവിടെ വരൂ, എഴുതിക്കോ’ എന്ന്. ഞാൻ ഭയങ്കര ടെൻഷനായി പോയി. ടെൻഷനടിച്ച് നിന്നപ്പോൾ ദേ രജനി സാർ വരുന്നു. അതോടെ കംപ്ലീറ്റ് ബ്ലാക്കൗട്ടായി.
അന്തം വിട്ട് നിൽക്കുമ്പോൾ ഭാർഗവി മാഡം, ‘റെഡി സാർ’ എന്ന് പറഞ്ഞു. അപ്പോൾ ഞാൻ ചോദിച്ചു, ‘എന്ത് റെഡി. ഇപ്പോൾ അല്ലേ ഡയലോഗ് തന്നതെന്ന്...’. അതുകേട്ടിട്ട് അവർ പറഞ്ഞത്, ‘എല്ലാവരും റെഡി ആണ് സാർ’ എന്നാണ്. അന്നത്തെ ദിവസം ഷോട്ടിനായി ഞാൻ രണ്ട് മണിക്കൂർ മുൻപേ റെഡിയായിരുന്നു. പിന്നെ ഞാൻ എങ്ങനെയൊക്കെയോ ഡയലോഗ് പഠിച്ച് ചെയ്തു. നീന്തലറിയാത്ത ഒരാൾ നടുക്കടലിൽ വീണാലുള്ള അവസ്ഥയിലായിരുന്നു ഞാൻ. എങ്ങനെയെങ്കിലും നീന്തി കരയ്ക്ക് കയറണമെന്നല്ലേ നമ്മൾ വിചാരിക്കൂ. ജീവൻ വേണമല്ലോ... ഇവിടെ നിൽക്കണമല്ലോ...’’ എന്നാണ് സുരാജ് വെഞ്ഞാറമൂട് പറഞ്ഞത്. സുരാജിന്റെ വാക്കുകളും അവതരിപ്പിക്കുന്ന രീതിയും കണ്ട് വേദിയിലിരുന്ന രമ്യ കൃഷ്ണനും വിദ്യാ ബാലനും സദസ്സിലുള്ള നെല്‍സണും ബാക്കിയുള്ളവരും പൊട്ടിച്ചിരിക്കുന്നത് കാണാം. ഇതിനു മറുപടിയായി നെല്‍സണും തഗ്ഗ് ഡയലോഗടിക്കുന്നുണ്ട്.
Comments