ഔട്ട് ഓഫ് സിലബസ് എന്ന സിനിമയില്‍ സഹതാരമായിട്ടാണ് വെള്ളിത്തിരയിലെത്തിയെങ്കിലും ‘നോട്ട് ബുക്ക്’ എന്ന സിനിമയിലെ മൂന്ന് നായികമാരില്‍ ഒരാളായി മികച്ച അഭിനയം കാഴ്ചവച്ച് പ്രേക്ഷകരുടെ ഹൃദയത്തില്‍ ഇടം നേടിയ താരമാണ് പാര്‍വതി തിരുവോത്ത്. സഹനായിക വേഷങ്ങളിലും സഹോദരി വേഷങ്ങളിലും തിളങ്ങി നില്‍ക്കുന്നതിനിടെ താരത്തിന് കരിയര്‍ ബ്രേക്ക് നല്‍കിയത് കന്നഡത്തില്‍ പുനീത് രാജ്കുമാറിനൊപ്പമുള്ള നായികവേഷവും, തമിഴില്‍ ‘പൂ’ എന്ന പടത്തിലെ മാരി എന്ന കഥാപാത്രവുമാണ്. ചുരുങ്ങിയ കാലം കൊണ്ട് വെള്ളിത്തിരയില്‍ തന്റേതായ ഇടം നേടിയ താരം ഇന്ന് തെന്നിന്ത്യയിലും ബോളിവുഡിലും ഒരുപോലെ തിളങ്ങി നില്‍ക്കുന്ന നായികയാണ്.
അഭിനയ മികവ് കൊണ്ടും തെരഞ്ഞെടുക്കുന്ന കഥാപാത്രങ്ങളിലെ വ്യത്യസ്തത കൊണ്ടും സിനിമ ഇൻഡസ്ട്രിയിൽ ശ്രദ്ധ നേടിയ താരം ശക്തമായ നിലപാടുകള്‍ പ്രകടിപ്പിച്ചും ജനശ്രദ്ധ നേടിയിട്ടുണ്ട്. മുഖം നോക്കാതെ തന്റെ അഭിപ്രായങ്ങള്‍ തുറന്നു പറയാറുള്ള താരത്തിന് പല വിമര്‍ശനങ്ങളും സൈബര്‍ അറ്റാക്കുകളും നേരിടേണ്ടി വന്നിട്ടുമുണ്ട്.
ഇപ്പോഴിതാ തുറന്നുപറച്ചിലുകൾ കരിയറിനെ ബാധിച്ചുവെന്നും സിനിമാലോകം തന്നെ എഴുതിത്തള്ളിയപ്പോൾ ചേർത്തുപിടിച്ചത് മലയാളി പ്രേക്ഷകരാണെന്നും പറയുകയാണ് പാർവതി തിരുവോത്ത്.
‘‘നിരവധി പ്രതിസന്ധികളും വെല്ലുവിളികളും നേരിടേണ്ടി വന്നിട്ടും, മലയാളി പ്രേക്ഷകർ നൽകിയ പിന്തുണയും സ്വീകാര്യതയുമാണ് എന്നെ സ്വന്തം നിലപാടുകളിൽ ഉറച്ചുനിൽക്കാനും സിനിമാരംഗത്ത് നിലനിൽക്കാനും സഹായിച്ചത്. മലയാള സിനിമയും ഇവിടുത്തെ പ്രേക്ഷകരും തമ്മില്‍ ശക്തമായ ആത്മബന്ധമുണ്ട്. പ്രശ്നങ്ങള്‍ക്കിടയിലും എനിക്ക് അനുയോജ്യമായ രീതിയിൽ ഇവിടെ നിലനിൽക്കാൻ കഴിഞ്ഞു. എന്റെ അഭിപ്രായങ്ങൾ തുറന്നുപറഞ്ഞതിന്റെ പേരിൽ ഞാൻ ഏതാണ്ട് പൂർണ്ണമായും തഴയപ്പെട്ട അവസ്ഥയിലായിരുന്നു. എന്നാല്‍ കടുത്ത വിമർശനങ്ങളും എതിർപ്പുകളും ഉണ്ടായിരുന്നിട്ടും, മലയാളികളായ പ്രേക്ഷകരുമായി എനിക്ക് ഒരു ‘പവിത്രമായ ബന്ധം’ ഉണ്ട്. എന്റെ വ്യക്തിപരമായ അഭിപ്രായങ്ങളോ നിലപാടുകളോ അവർക്ക് യോജിച്ചതല്ലെങ്കിൽ പോലും, ഞാൻ മികച്ച പ്രകടനം കാഴ്ചവെച്ചാൽ പ്രേക്ഷകർ എന്റെ സിനിമകളെ എപ്പോഴും വിജയിപ്പിക്കാറുണ്ട്...’’ എന്നാണ് പാര്‍വതി പറഞ്ഞത്. ഒരു പ്രമുഖ മാധ്യമത്തിന് നല്‍കിയ അഭിമുഖത്തിലാണ് പാര്‍വതിയുടെ തുറന്നു പറച്ചില്‍.
പൃഥ്വിരാജ് നായകനായി ഈ വർഷം പുറത്തിറങ്ങിയ ഐ നോബഡിയ്ക്ക് പിന്നാലെ അടുത്തിടെ തിയേറ്ററുകളിലെത്തിയ പാർവതിയുടെ ചിത്രമാണ് പ്രഥമ ദൃഷ്ട്യാ കുറ്റക്കാർ. മികച്ച പ്രതികരണങ്ങൾ നേടിയ ചിത്രം ഇപ്പോൾ ഒ.ടി.ടിയിലൂടെയും പ്രേക്ഷക പ്രശംസ നേടുകയാണ്.
Comments