നടന്‍ രജനികാന്തിന്റെ ഏറ്റവും പുതിയ ചിത്രമായ 'ജയിലര്‍ 2'-ന് ആരാധകരില്‍ നിന്നും ലഭിച്ച ഗംഭീര സ്വീകരണത്തില്‍ സന്തോഷം പങ്കുവെച്ച് അദ്ദേഹത്തിന്റെ ഇളയ മകളും നിര്‍മാതാവുമായ സൗന്ദര്യ രജനികാന്ത്. ചിത്രം തമിഴ് സിനിമയില്‍ ചരിത്രം സൃഷ്ടിക്കുമെന്നാണ് സൗന്ദര്യ കുറിച്ചത്.
ചിത്രത്തെക്കുറിച്ചും ആരാധകരുടെ പ്രതികരണത്തെക്കുറിച്ചും തന്റെ ഇന്‍സ്റ്റഗ്രാം പേജിലൂടെയാണ് അവര്‍ കുറിപ്പ് പങ്കുവെച്ചത്. തലൈവര്‍ തനിക്ക് മാത്രമല്ല, അദ്ദേഹത്തെ സ്‌നേഹിക്കുന്ന എല്ലാവര്‍ക്കും ഒരു വികാരമാണെന്നും അത് വാക്കുകള്‍കൊണ്ട് വിവരിക്കാന്‍ കഴിയില്ലെന്നും സൗന്ദര്യ കുറിച്ചു. ഇത് രജനിസത്തിന്റെ 51 വര്‍ഷത്തെ വിസ്മയകരമായ യാത്രയാണെന്നും അവര്‍ കൂട്ടിച്ചേര്‍ത്തു. കൂടാതെ സംവിധായകൻ നെല്‍സണെയും, സംഗീത സംവിധായകന്‍ അനിരുദ്ധിനെയും അവര്‍ പ്രത്യേകം അഭിനന്ദിച്ചു.
"തലൈവര്‍ എന്നത് എനിക്ക് മാത്രമല്ല, അദ്ദേഹത്തെ സ്‌നേഹിക്കുന്ന എല്ലാവര്‍ക്കും ഒരു വികാരമാണ്. അത് വാക്കുകള്‍ കൊണ്ട് വിവരിക്കാനാകില്ല. നിങ്ങള്‍ക്ക് അത് അനുഭവിക്കാന്‍ മാത്രമേ കഴിയൂ. ജയിലര്‍ 2 ഒരു സന്‍സേഷണല്‍ ബ്ലോക്ക്ബസ്റ്റര്‍ ആണ്, എന്റെ ടൈഗര്‍ മുത്തുവേല്‍ പാണ്ഡ്യന്‍, എന്റെ അപ്പ തീര്‍ച്ചയായും സ്‌ക്രീനില്‍ തിളങ്ങി നില്‍ക്കുന്നു. നമ്മെ രസിപ്പിച്ചതിന്റെ 51 വര്‍ഷങ്ങള്‍. രജനിസത്തിന്റെ 51 വര്‍ഷങ്ങള്‍.
എന്റെ പ്രിയപ്പെട്ട നെല്‍സണ്‍ ജി, എന്ത് തകര്‍പ്പന്‍ സിനിമയാണ്. കൂടാതെ എന്റെ ഏറ്റവും പ്രിയപ്പെട്ട സഹോദരന്‍ അനിരുദ്ധ്, നിങ്ങള്‍ സൃഷ്ടിച്ച രംഗങ്ങള്‍ ഇതിനെ മറ്റൊരു തലത്തിലേക്ക് എത്തിച്ചിരിക്കുന്നു. ഈ വര്‍ഷത്തെ നിങ്ങളുടെ ജന്മദിനം ആഘോഷിക്കാന്‍ ഇതിലും മികച്ച എന്ത് വഴിയാണ് വേണ്ടത്.
മികച്ച അഭിനയം കാഴ്ചവെച്ച മുഴുവന്‍ താരങ്ങള്‍ക്കും അണിയറപ്രവര്‍ത്തകര്‍ക്കും ഒരുപാട് സ്‌നേഹം. ഈ ചിത്രത്തെക്കുറിച്ച് എനിക്ക് ഇനിയും ഏറെ സംസാരിക്കാം, എന്നാല്‍ കൂടുതല്‍ പറയാന്‍ കഴിയാത്തവിധം ഞാന്‍ വികാരാധീനയാണ്. ജയിലര്‍ 2 വീണ്ടും വീണ്ടും വീണ്ടും കാണൂ. ഈ ചിത്രം തമിഴ് സിനിമയില്‍ ചരിത്രം സൃഷ്ടിക്കും. ഒരുപാട് അഭിമാനിക്കുന്നു, ഒരുപാട്, ഒരുപാട് അഭിമാനിക്കുന്നു." — എന്നായിരുന്നു സൗന്ദര്യയുടെ വാക്കുകള്‍.
അതേസമയം, ഇന്നലെയാണ് ജയിലര്‍ 2 ലോകമെമ്പാടുമുളള തിയേറ്ററുകളില്‍ റിലീസിനെത്തിയത്. ആരാധകരില്‍ നിന്നും മികച്ച പ്രതികരണങ്ങള്‍ നേടി ചിത്രം വിജയകരമായി പ്രദര്‍ശനം തുടരുകയാണ്. രജനികാന്തിനൊപ്പം മോഹന്‍ലാല്‍, ശിവ രാജ് കുമാര്‍, സുരാജ് വെഞ്ഞാറമൂട്, എസ്.ജെ. സൂര്യ, വിദ്യ ബാലന്‍, മിഥുന്‍ ചക്രവര്‍ത്തി, യോഗി ബാബു, ഹക്കീം ഷാജഹാന്‍ തുടങ്ങി വലിയൊരു താരനിരയാണ് ചിത്രത്തില്‍ അണിനിരക്കുന്നത്.
Comments