ലഖ്നൗ: ഇന്ത്യ സഖ്യം യുവാക്കളെ "അരാജകത്വത്തിന്റെ രാഷ്ട്രീയത്തിൽ കരുക്കളാക്കുകയാണെന്നും" അരാജകത്വം ഇളക്കിവിട്ട് രാജ്യത്തെ അസ്ഥിരപ്പെടുത്താൻ ശ്രമിക്കുകയാണെന്നും കേന്ദ്ര പ്രതിരോധമന്ത്രി രാജ്‌നാഥ് സിംഗ് ആരോപിച്ചു. രാജ്യത്ത് "അക്രമം അഴിച്ചുവിട്ട് ഭരണമാറ്റം" വരുത്താനാണ് അവർ ആഗ്രഹിക്കുന്നതെന്ന് അദ്ദേഹം പറഞ്ഞു. സമ്മർദത്തിനു വഴങ്ങില്ല എന്നും ഗ്യാനേഷ് കുമാർ രാജിവെക്കില്ല എന്നും അദ്ദേഹം വ്യക്തമാക്കി.
"ഭരണമാറ്റത്തിനായി ബംഗ്ലാദേശ് മാതൃകയിലുള്ള അക്രമങ്ങൾ പിന്തുടരാനാണ് കോൺഗ്രസ് ആഗ്രഹിക്കുന്നത്. കോൺഗ്രസിന്റെ പ്രതിഷേധം ഗ്യാനേഷ് കുമാറിനോ എസ്‌ഐആറിനോ എതിരെയല്ല, മറിച്ച് സർക്കാരിനെ താഴെയിറക്കാൻ ജനാധിപത്യത്തിന് എതിരായിട്ടുള്ളതാണ്," ലഖ്‌നൗവിൽ നടന്ന വാർത്താ സമ്മേളനത്തിൽ അദ്ദേഹം പറഞ്ഞു. അധികാരത്തിലിരുന്നപ്പോൾ കോൺഗ്രസ് തിരഞ്ഞെടുപ്പ് കമ്മീഷനെ സ്വന്തം "പാവ"യാക്കി മാറ്റിയെന്നും രാജ്‌നാഥ് സിംഗ് ആരോപിച്ചു.
1993-ൽ കോൺഗ്രസ് തിരഞ്ഞെടുപ്പ് കമ്മീഷനിൽ ഒറ്റരാത്രികൊണ്ട് മാറ്റങ്ങൾ വരുത്തി. അന്നത്തെ ഇലക്ഷൻ കമ്മീഷണറായ നവീൻ ചൗളയെ നീക്കം ചെയ്യണമെന്ന് അന്നത്തെ ചീഫ് ഇലക്ഷൻ കമ്മീഷണർ ഇന്ത്യൻ രാഷ്ട്രപതിയോട് ശുപാർശ ചെയ്തിരുന്നു. എന്നാൽ കോൺഗ്രസ് അദ്ദേഹത്തെ ചീഫ് ഇലക്ഷൻ കമ്മീഷണർ പദവിയിലേക്ക് ഉയർത്തുകയാണ് ചെയ്തത്, സിംഗ് പറഞ്ഞു. 1993-ന് മുമ്പ് വോട്ടർ ഐഡി കാർഡ് ഉണ്ടായിരുന്നില്ല. വോട്ടർമാരുടെ തിരിച്ചറിയൽ രേഖ തെളിയിക്കാൻ ഒന്നുമുണ്ടായിരുന്നില്ല. വോട്ടർ ഐഡി നിലവിൽ വന്ന ശേഷം കോൺഗ്രസിന് ഒറ്റയ്ക്ക് സർക്കാർ രൂപീകരിക്കാൻ കഴിഞ്ഞിട്ടില്ല എന്നും അദ്ദേഹം മാധ്യമങ്ങളോട് പറഞ്ഞു.
എസ്‌ഐആറിനും ഗ്യാനേഷ് കുമാറിനും എതിരെയുള്ള കോൺഗ്രസിന്റെ പ്രതിഷേധം വോട്ടർ പട്ടികയെക്കുറിച്ചുള്ളതല്ലെന്നും സ്വതന്ത്രമായി പ്രവർത്തിക്കുന്ന "ഭരണഘടനാ സ്ഥാപനങ്ങളെ ദുർബലപ്പെടുത്താനുള്ള ശ്രമമാണെന്നും" മന്ത്രി ആരോപിച്ചു. അക്രമത്തെ ആശ്രയിക്കാൻ ജനാധിപത്യം ആർക്കും അവകാശം നൽകുന്നില്ലെന്ന് ലോക്‌സഭാ പ്രതിപക്ഷ നേതാവും കോൺഗ്രസ് എംപിയുമായ രാഹുൽ ഗാന്ധി മനസ്സിലാക്കേണ്ടതുണ്ടെന്ന് അദ്ദേഹം പറഞ്ഞു. "തടസ്സപ്പെടുത്തലിന്റെ രാഷ്ട്രീയമാണ് രാഹുൽ ചെയ്യുന്നത്," സിംഗ് കൂട്ടിച്ചേർത്തു.
Comments