സിഡ്നി: ഓസ്‌ട്രേലിയൻ സൂപ്പർമാർക്കറ്റുകളിലെ ഇന്ത്യൻ ഭക്ഷ്യ ഉൽപ്പന്നങ്ങളിൽ ഇന്ത്യക്കാരെ ലക്ഷ്യമിട്ടുള്ള വംശീയ അധിക്ഷേപ സ്റ്റിക്കറുകൾ പ്രത്യക്ഷപ്പെട്ടു. ഇന്ത്യക്കാരെപ്പോലെ തോന്നിക്കുന്ന ഒരാൾ തെരുവിൽ മലമൂത്രവിസർജ്ജനം നടത്തുന്ന ചിത്രവും അതിനോടൊപ്പം "ഇതാണോ നിങ്ങളുടെ സംസ്‌കാരം? ഞങ്ങൾക്ക് ഇത് ഇഷ്ടമല്ല!" എന്ന സന്ദേശവും അടങ്ങിയതാണ് ഈ സ്റ്റിക്കറുകൾ.
ഓസ്‌ട്രേലിയയിലെ ജനസംഖ്യയുടെ 32 ശതമാനവും വിദേശത്ത് ജനിച്ചവരാണെന്നും, ഇതിൽ ഏറ്റവും കൂടുതൽ ആളുകൾ ഇന്ത്യക്കാരാണെന്നും അവകാശപ്പെടുന്ന ഈ സ്റ്റിക്കറുകൾ, "റീമൈഗ്രേഷൻ നൗ!" (കുടിയേറ്റക്കാരെ തിരികെ അയക്കുക) എന്നും ആവശ്യപ്പെടുന്നു. ന്യൂ സൗത്ത് വെയിൽസിലെ ഹണ്ടർ മേഖലയിലുള്ള സെസ്‌നോക്കിന് ചുറ്റും കണ്ടെത്തിയ ഇത്തരം വംശീയ സ്റ്റിക്കറുകളെ പ്രാദേശിക ഫെഡറൽ എം.പി ഡേവിഡ് റെപാച്ചോളി ശക്തമായി അപലപിച്ചു. ഇത് ഏറെ വിദ്വേഷകരവും വംശീയവുമായ ഉള്ളടക്കമാണെന്ന് അദ്ദേഹം സോഷ്യൽ മീഡിയ കുറിപ്പിൽ വിശേഷിപ്പിച്ചു.
ഇത്തരം സ്റ്റിക്കറുകൾ ശ്രദ്ധയിൽപ്പെടുന്ന പ്രദേശവാസികൾ അത് റിപ്പോർട്ട് ചെയ്യാനും നീക്കം ചെയ്യാനുമായി വിവരങ്ങൾ പങ്കുവെക്കണമെന്ന് റെപാച്ചോളി അഭ്യർത്ഥിച്ചു. കൂടാതെ, ഈ പ്രചാരണത്തിന് പിന്നിൽ പ്രവർത്തിച്ചവർക്ക് കൂടുതൽ പ്രചാരം നൽകരുതെന്ന് അദ്ദേഹം ജനങ്ങൾക്ക് മുന്നറിയിപ്പും നൽകി.
കുടിയേറ്റ വിരുദ്ധ പ്രവർത്തകയായ ബെക് ഫ്രീഡം ഓൺലൈനിൽ പങ്കുവെച്ച വീഡിയോകളിൽ, ചെറുപയർ പരിപ്പ് പാക്കറ്റുകളിലും സൂപ്പർമാർക്കറ്റിലെ 'ഇന്ത്യൻ പാൻട്രി' എന്ന് അടയാളപ്പെടുത്തിയ ബോർഡുകൾക്ക് സമീപവും ഇത്തരം സ്റ്റിക്കറുകൾ പതിപ്പിക്കുന്നത് കാണാം. ഈ സ്റ്റിക്കറുകളിൽ 'ഫൈറ്റ് ഫോർ ഓസ്‌ട്രേലിയ'പ്രചാരണത്തിലേക്ക് നയിക്കുന്ന ക്യു.ആർ കോഡുകൾ അടങ്ങിയിട്ടുണ്ടെന്നാണ് റിപ്പോർട്ട്. ഈ ആഴ്ച സോഷ്യൽ മീഡിയയിൽ പങ്കുവെച്ച കുറിപ്പിൽ, സ്റ്റിക്കറുകൾ പതിപ്പിച്ച പിന്തുണക്കാരെ ബെക് ഫ്രീഡം പ്രശംസിക്കുകയും മറ്റുള്ളവരോട് ഇതിൽ പങ്കാളികളാകാൻ ആവശ്യപ്പെടുകയും ചെയ്തു. സ്റ്റിക്കറുകൾ പ്രിന്റ് ചെയ്യാവുന്ന ടെംപ്ലേറ്റുകൾ പങ്കുവെച്ച അവർ, ഇവ സ്വയം പ്രിന്റ് ചെയ്യാനോ തപാൽ വഴി ആവശ്യപ്പെടാനോ അനുയായികളോട് നിർദ്ദേശിച്ചു.
ഇന്ത്യൻ ഭക്ഷ്യ ഉൽപ്പന്നങ്ങളെയും സൂപ്പർമാർക്കറ്റ് ഡിസ്‌പ്ലേകളെയും കുടിയേറ്റ വിരുദ്ധ സന്ദേശങ്ങളുമായി ബന്ധിപ്പിക്കുന്നതാണ് ഈ പ്രചാരണം. ബ്രിസ്‌ബേനിലെ സൂപ്പർമാർക്കറ്റുകളിലെ ഇന്ത്യൻ പലചരക്ക് ഉൽപ്പന്നങ്ങളിലും സമാനമായ സ്റ്റിക്കറുകൾ കണ്ടെത്തിയതായി 'ദി ഇന്ത്യൻ സൺ' റിപ്പോർട്ട് ചെയ്തു.
കുടിയേറ്റക്കാരെയും ചില രാഷ്ട്രീയ പ്രസ്ഥാനങ്ങളിൽ വംശീയ ന്യൂനപക്ഷങ്ങളെയും പുറത്താക്കുന്നതിനെയോ നാടുകടത്തുന്നതിനെയോ ആണ് സാധാരണയായി "റീമൈഗ്രേഷൻ" എന്ന പദം കൊണ്ട് ഉദ്ദേശിക്കുന്നത്. കഴിഞ്ഞ ജൂലൈയിൽ ഹണ്ടർ മേഖലയിലെ കുറി കുറിയിലുടനീളമുള്ള ലെറ്റർബോക്സുകളിൽ ഇന്ത്യക്കാർക്കെതിരെയുള്ള ലഘുലേഘകൾ വിതരണം ചെയ്ത സംഭവത്തിന് മാസങ്ങൾക്ക് ശേഷമാണ് ഈ പുതിയ സംഭവം ഉണ്ടാകുന്നത്. ഈ നഗരത്തിൽ നിന്ന് 'കറി സംസ്‌കാരത്തെ' ഒഴിവാക്കണമെന്ന് ആവശ്യപ്പെടുന്നവയും, കുടിയേറ്റക്കാരെ തിരികെ അയക്കണമെന്ന് വാദിക്കുന്നതുമായിരുന്നു ആ ലഘുലേഘകൾ
Comments