എഐയുടെ സഹായം; വീട്ടുജോലിക്ക് വേണ്ട സമയം എട്ടിൽ നിന്ന് രണ്ടുമണിക്കൂറായി കുറച്ച് സിഇഒ

വീട്ടിലെ തിരക്കുകളും കുട്ടികളുടെ കാര്യങ്ങളും ജോലിത്തിരക്കിനൊപ്പം കൈകാര്യം ചെയ്യുന്നത് പല മാതാപിതാക്കൾക്കും വലിയ വെല്ലുവിളിയാണ്. എന്നാൽ നിർമിതബുദ്ധിയുടെ സഹായത്തോടെ ഈ ബുദ്ധിമുട്ടുകൾ കുറച്ചിരിക്കുകയാണ് ന്യൂയോർക്കിൽ താമസിക്കുന്ന മൂന്ന് കുട്ടികളുടെ അമ്മയും ആൻഡെല കമ്പനിയുടെ സിഇഒയുമായ കരോൾ ചാങ്. വീട്ടിലെ കാര്യങ്ങൾ ക്രമീകരിക്കാൻ ആഴ്ചയിൽ അഞ്ച് മുതൽ എട്ട് മണിക്കൂർ വരെ ചെലവഴിച്ചിരുന്ന തനിക്ക് ഇപ്പോൾ ഏകദേശം രണ്ട് മണിക്കൂർ മാത്രമാണ് വേണ്ടിവരുന്നതെന്ന് അവർ പറയുന്നു. കുട്ടികളുടെ സ്കൂൾ കാര്യങ്ങൾ, കായിക മത്സരങ്ങളുടെ സമയക്രമം, ഭക്ഷണക്രമം തുടങ്ങി നിരവധി ഉത്തരവാദിത്തങ്ങളാണ് എഐയുടെ സഹായത്തോടെ എളുപ്പമായിരിക്കുന്നത്.

രണ്ടാമത്തെ കുഞ്ഞ് ജനിച്ച ശേഷമുള്ള ആദ്യ വർഷം ജീവിതത്തിലെ ഏറ്റവും പ്രയാസകരമായ കാലഘട്ടങ്ങളിലൊന്നായിരുന്നുവെന്ന് കരോൾ പറഞ്ഞു. കുട്ടികളുടെ സ്കൂൾ സമയക്രമം ക്രമീകരിക്കുക, അസുഖം ബാധിച്ചാൽ സ്കൂളിൽനിന്ന് കൂട്ടിക്കൊണ്ടുവരാനുള്ള കാര്യങ്ങൾ നോക്കുക, കുടുംബയാത്രകൾ ആസൂത്രണം ചെയ്യുക, വിവിധ പരിപാടികൾക്കായി സമയം കണ്ടെത്തുക തുടങ്ങിയ ഉത്തരവാദിത്തങ്ങൾ സമ്മർദം വർധിപ്പിച്ചു. കുട്ടികളുടെ കായിക മത്സരങ്ങൾ വിവിധ സ്ഥലങ്ങളിലായതിനാൽ യാത്രാസമയം കണക്കാക്കുന്നതും ബസിലാണോ മെട്രോയിലാണോ പോകേണ്ടതെന്ന് തീരുമാനിക്കുന്നതും അധിക ജോലിയായിരുന്നു. ഇപ്പോൾ എഐ ഏജന്റുകൾ ഈ കാര്യങ്ങൾ ക്രമീകരിച്ച് കുടുംബത്തിന്റെ കലണ്ടറിൽ ആവശ്യമായ വിവരങ്ങൾ ചേർക്കുന്നു.

കുട്ടികളുടെ സ്കൂളിൽനിന്നുള്ള ഇമെയിലുകൾ പരിശോധിക്കാനും പ്രധാനപ്പെട്ട അറിയിപ്പുകൾ തിരിച്ചറിയാനും കരോൾ എഐ ഏജന്റിനെ ഉപയോഗിക്കുന്നുണ്ട്. സ്കൂൾ അവധികൾ, അധ്യാപകരുടെ സന്ദേശങ്ങൾ, കുട്ടികൾ പങ്കെടുക്കേണ്ട പരിപാടികൾ എന്നിവ പ്രത്യേകം കണ്ടെത്തി കലണ്ടറിൽ ചേർക്കാൻ ഇതിന് കഴിയും. കൂടാതെ, കുടുംബത്തിലെ ഭക്ഷണ അലർജികളും ഭക്ഷണക്രമവുമായി ബന്ധപ്പെട്ട നിയന്ത്രണങ്ങളും പരിഗണിച്ച് പുതിയ വിഭവങ്ങൾ നിർദേശിക്കാനും ആവശ്യമായ സാധനങ്ങളുടെ പട്ടിക തയ്യാറാക്കാനും എഐ സഹായിക്കുന്നു. എൻജിനീയറിങ് പശ്ചാത്തലമില്ലാത്ത തനിക്ക് പോലും എഐയുടെ നിർദേശങ്ങൾ പിന്തുടർന്ന് ഇത്തരം സംവിധാനങ്ങൾ ഒരുക്കാൻ കഴിഞ്ഞുവെന്നതാണ് കരോളിന്റെ അനുഭവത്തിലെ മറ്റൊരു പ്രത്യേകത.

എന്നാൽ എഐ നൽകുന്ന വിവരങ്ങൾ പൂർണമായും തെറ്റില്ലാത്തവയാണെന്ന് കരുതരുതെന്നും കരോൾ മുന്നറിയിപ്പ് നൽകുന്നു. ചിലപ്പോൾ പിഴവുകൾ സംഭവിക്കാമെന്നതിനാൽ എഐ ചെയ്ത ജോലികൾ പരിശോധിക്കാനുള്ള സംവിധാനവും വേണം. വീട്ടിലെ കാര്യങ്ങൾക്കായി ചെലവഴിച്ചിരുന്ന സമയം കുറഞ്ഞതോടെ കൂടുതൽ ഉറക്കം ലഭിക്കുന്നുണ്ടെന്നും സമ്മർദം കുറഞ്ഞതായും കുട്ടികൾക്കും കുടുംബത്തിനുമൊപ്പം ചെലവഴിക്കുന്ന സമയം കൂടുതൽ സന്തോഷകരമായെന്നും അവർ പറയുന്നു. കുടുംബത്തിന്റെ ദൈനംദിന കാര്യങ്ങൾ ക്രമീകരിക്കാൻ എഐയെ ഉപയോഗിച്ച കരോളിന്റെ അനുഭവം സമൂഹമാധ്യമങ്ങളിലും ശ്രദ്ധ നേടുകയാണ്.