കയർചാട്ടം കളിക്കാൻ ജീവനുള്ള പെരുമ്പാമ്പിനെ ഉപയോഗിച്ചാലോ? കേൾക്കുമ്പോൾ തന്നെ ഞെട്ടിക്കുന്ന ഈ പ്രവൃത്തിയുടെ ദൃശ്യങ്ങളാണ് കേരളത്തിൽനിന്നും പ്രചരിക്കുന്നത്. ഒരു കൂട്ടം യുവാക്കൾ പെരുമ്പാമ്പിനെ കയറുപോലെ ഉപയോഗിച്ച് ചാട്ടം കളിക്കുന്നതാണ് വീഡിയോയിലുള്ളത്. ദൃശ്യങ്ങൾ പുറത്തുവന്നതോടെ യുവാക്കളുടെ പ്രവൃത്തിക്കെതിരെ വിമർശനങ്ങളും ഉയർന്നു.
വീഡിയോയിൽ യുവാക്കൾ പെരുമ്പാമ്പിനെ പിടിച്ച് ഇരുവശത്തേക്കും ചലിപ്പിക്കുന്നതും മറ്റൊരാൾ അതിന് മുകളിലൂടെ ചാടുന്നതും കാണാം. സാധാരണ കയർ ഉപയോഗിച്ച് നടത്തേണ്ട കളിക്ക് പകരം ജീവനുള്ള വന്യജീവിയെ ഉപയോഗിച്ചതാണ് സംഭവത്തെ ചർച്ചയാക്കുന്നത്. പാമ്പിനെ ഇത്തരത്തിൽ കൈകാര്യം ചെയ്യുന്നത് യുവാക്കൾക്കും മൃഗത്തിനും ഒരുപോലെ അപകടകരമാകാമെന്ന ആശങ്കയും ഉയരുന്നുണ്ട്.
'സ്ട്രീറ്റ് ഡോഗ് ഓഫ് ബോംബെ' എന്ന ഇൻസ്റ്റഗ്രാം പേജിലൂടെയാണ് വീഡിയോ പങ്കുവെച്ചത്. വന്യജീവികളെ വിനോദത്തിനായി ഉപയോഗിക്കുന്നതിനെതിരെ പേജ് പ്രതികരിക്കുകയും കേരള വനംവകുപ്പിന്റെ ശ്രദ്ധയിൽ സംഭവം കൊണ്ടുവരികയും ചെയ്തു. വീഡിയോ എവിടെ, എപ്പോഴാണ് ചിത്രീകരിച്ചതെന്നതടക്കമുള്ള വിവരങ്ങൾ പങ്കുവെച്ച റിപ്പോർട്ടിൽ വ്യക്തമായിട്ടില്ല.
ദൃശ്യങ്ങൾ വൈറലായതോടെ യുവാക്കളുടെ പ്രവൃത്തിയെക്കുറിച്ച് സമൂഹമാധ്യമങ്ങളിൽ ചർച്ചകൾ സജീവമായി. വന്യജീവികളോട് ഉത്തരവാദിത്തത്തോടെ പെരുമാറണമെന്നും അവയെ അപകടകരമായ സാഹചര്യങ്ങളിൽ ഉപയോഗിക്കുന്നത് ഒഴിവാക്കണമെന്നും നിരവധി പേർ അഭിപ്രായപ്പെട്ടു. വിനോദത്തിനുവേണ്ടി ഇത്തരം പ്രവൃത്തികൾ നടത്തുന്നതിനെതിരെ നടപടി വേണമെന്ന ആവശ്യവും ഉയരുന്നുണ്ട്.
Comments