ലക്നൗ: രണ്ടു ദശകത്തിന് ശേഷം ഉത്തര്പ്രദേശില് സമാജ്വാദി പാര്ട്ടിയുമായി മായാവതിയുടെ ബഹുജന് സമാജ്വാദി പാര്ട്ടി അടുക്കുന്നു. ബിജെപിയുടെ ശത്രു ആരായാലും അവരുമായി കൈകോര്ക്കാന് തയ്യാറാണെന്നും വിഷത്തെ വിഷം കൊണ്ടാണ് എടുക്കേണ്ടതെന്നും വെള്ളിയാഴ്ച മായാവതി പ്രഖ്യാപിച്ചു.
ഡോ:ബി ആര് അംബേദ്ക്കറിന്റെ 126 ാം ജന്മദിനത്തിന്റെ ഭാഗമായി നടന്ന ആഘോഷത്തില് പാര്ട്ടി അണികളെ അഭിസംബോധന ചെയ്യുകയായിരുന്നു മായാവതി. സാമുദായിക ശക്തികള് അധികാരത്തില് എത്തുന്നത് തടയാന് മറ്റുള്ള പാര്ട്ടികളുമായി സഹകരിച്ചുള്ള ബഹുജനമുന്നേറ്റം വേണമെന്നും പറഞ്ഞു. ബിഎസ്പിയുമായി അടുക്കുന്നതിന്റെ സൂചന സമാജ്വാദ് പാര്ട്ടിയും മുന്നോട്ട് വെച്ചു.
ഇന്ത്യന് രാഷ്ട്രീയത്തിലെ മതേതര സ്വഭാവം സംരക്ഷിക്കാന് പാര്ട്ടി പ്രതിജ്ഞാബദ്ധമാണെന്നും അത് ഉറപ്പാക്കുമെന്നുമാണ് എസ്പി നേതാക്കള് പറഞ്ഞത്. ദുഷ്ടശക്തികളെ തടയാന് സമാന മനസ്ക്കരായ പാര്ട്ടികള് ഒരുമിക്കുമ്പോള് ബിഎസ്പിയും അതില് അംഗമായിരിക്കും.
ഒരു വലിയ ലക്ഷ്യത്തിനായി അഭിപ്രായ ഭിന്നതകള് തല്ക്കാലം മാറ്റി വെയ്ക്കേണ്ടതുണ്ട്. രാഷ്ട്രീയ തിരിച്ചടി നേരിടുന്ന മായാവതിക്കും അത് അനിവാര്യം ആണെന്ന് കോണ്ഗ്രസ് നേതാക്കളും പ്രതികരിക്കുന്നു. ഗൊരക്പൂര്, ഫുല്പൂര് ലോക്സഭാ ഉപതെരഞ്ഞെടുപ്പിന് ശേഷം ജൂണില് നടക്കുന്ന യുപിയിലെ പ്രാദേശിക തെരഞ്ഞെടുപ്പുകളില് പുതിയ സഖ്യത്തിന്റെ പ്രഖ്യാപനം ഉണ്ടാകുമെന്നാണ് കരുതുന്നത്.
കഴിഞ്ഞ നിയമസഭാ തെരഞ്ഞെടുപ്പില് വന് വിജയം നേടിയ ബിജെപിയ്ക്ക് 39.7 ശതമാനം വോട്ടുകളാണ് കിട്ടിയത്. എന്നാല് എസ്പിയ്ക്ക് 21.8 ശതമാനവും ബിഎസ്പിയ്ക്ക് 22.2 ശതമാനവും കോണ്ഗ്രസിന് 6.3 ശതമാനവുമായി മറ്റു കക്ഷികള്ക്ക് എല്ലാം കൂടി 50.3 ശതമാനം വോട്ടുകള് കിട്ടിയിരുന്നു.
