കൊച്ചി: തിരുവനന്തപുരം ശ്രീപത്മനാഭസ്വാമി ക്ഷേത്രത്തിലെ കണക്കും ഓഡിറ്റ് റിപ്പോര്ട്ടും ഫയലുകളും പരിശോധിക്കാന് നല്കുന്നില്ലെന്നു ക്ഷേത്രഭരണസമിതിയിലെ സര്ക്കാര് പ്രതിനിധിയുടെ പരാതി.
ഭരണസമിതിയംഗം അഡ്വ. എ. വേലപ്പന് നായര് ഇതുസംബന്ധിച്ച് സര്ക്കാരിനു കത്ത് നല്കി.ഭരണസമിതിയംഗമായ തനിക്ക് കണക്കുകളും മറ്റ് രേഖകളും പരിശോധിക്കാന് അധികാരമുണ്ടെന്നു വേലപ്പന് നായര് വാദിക്കുന്നു.
ഭരണസമിതിയില് തര്ക്കം രൂക്ഷമായതോടെ, ഒരംഗത്തിനു മാത്രമായി രേഖകള് നല്കാന് കഴിയുമോയെന്ന കാര്യത്തില് റവന്യൂ ദേവസ്വം വിഭാഗം അഡ്വക്കേറ്റ് ജനറലില്നിന്നു നിയമോപദേശം തേടി.
ക്ഷേത്രത്തില്നിന്നു രത്നം നഷ്ടപ്പെട്ടു, ഉത്സവച്ചെലവ് കൃത്രിമമാണ് തുടങ്ങിയ ആരോപണങ്ങളാണു വേലപ്പന് നായര് ഉന്നയിക്കുന്നത്.
സുപ്രീം കോടതിയുടെ മേല്നോട്ടത്തിലാണ് ക്ഷേത്രഭരണസമിതി പ്രവര്ത്തിക്കുന്നത്. തിരുവനന്തപുരം ജില്ലാ ജഡ്ജി അധ്യക്ഷനായ ഭരണസമിതിയില് രാജകുടുംബപ്രതിനിധി, സംസ്ഥാനസര്ക്കാര് പ്രതിനിധി, കേന്ദ്ര സാംസ്കാരികവകുപ്പ് പ്രതിനിധി, ക്ഷേത്രം മുഖ്യതന്ത്രി എന്നിവരാണുള്ളത്.
ജെബി പോള്
