പലപ്പോഴും സ്വപ്നങ്ങള്‍ക്ക് വിലങ്ങു തടിയായി നില്‍ക്കുന്ന പ്രായമാണെന്ന് പലരും പരാതി പറയാറുണ്ട്. എന്നാല്‍ സ്വപ്നങ്ങള്‍ ലക്ഷ്യമാക്കി മാറ്റുന്നവര്‍ക്ക് മുന്നില്‍ പ്രായം പോലും പത്തിമടക്കും. അങ്ങനെ പ്രചോദനമായി മാറിയ പല വ്യക്തികളും സോഷ്യല്‍ മീഡിയയിലൂടെ കാഴ്ചക്കാരുടെ ഹൃദയം കീഴടക്കാറുണ്ട്.
ഇപ്പോഴിതാ അത്തരത്തില്‍ 61 വയസ്സുള്ള ഒരു കനേഡിയന്‍ മുത്തശ്ശിയാണ് സോഷ്യല്‍ മീഡിയയുടെ ഹൃദയം കവരുന്നത്. ഡോണജീൻ വൈൽഡ് എന്ന 61 വയസ്സുകാരി വിരമിച്ച സ്കൂൾ അധ്യാപികയും 12 പേരക്കുട്ടികളുടെ മുത്തശ്ശിയുമാണ്. ഡോണജീൻ ഇന്ന് വാര്‍ത്തകളില്‍ നിറയുന്നത് തുടർച്ചയായി അഞ്ച് മണിക്കൂർ ‘പ്ലാങ്ക്’ ചെയ്ത് വേള്‍ഡ് റെക്കോര്‍ഡ് നേടിയാണ്. കാനഡയിലെ ആൽബർട്ടയിൽ താമസിക്കുന്ന ഇവർ, നേരത്തെ താൻ തന്നെ സ്ഥാപിച്ചിരുന്ന ഗിന്നസ് ലോക റെക്കോർഡ് തിരുത്തിക്കുറിച്ചുകൊണ്ട്, ഏറ്റവും കൂടുതൽ സമയം ‘അബ്ഡോമിനൽ പ്ലാങ്ക്’ ചെയ്തതിനുള്ള പുതിയ റെക്കോർഡ് ഇക്കഴിഞ്ഞ ദിവസം സ്വന്തമാക്കി.
യൂട്ടായിൽ നടന്ന ‘ഹണ്ട്‌സ്‌മാൻ വേൾഡ് സീനിയർ ഗെയിംസി’ൽ മത്സരിക്കവെയാണ് ഡോണജീൻ തുടർച്ചയായി അഞ്ച് മണിക്കൂർ പ്ലാങ്ക് നിലനിർത്തിയത്. 2024 മാർച്ചിൽ താൻ സ്ഥാപിച്ച 4 മണിക്കൂർ 30 മിനിറ്റ് എന്ന മുൻ ലോക റെക്കോർഡിനെ മറികടന്നാണ് അവർ ഈ നേട്ടം കൈവരിച്ചത്.
നേരത്തെയുള്ള പ്ലാങ്ക് റെക്കോർഡിനും, ഒരു മണിക്കൂറിനുള്ളിൽ സ്ത്രീകൾ ചെയ്യുന്ന ഏറ്റവും കൂടുതൽ പുഷ്-അപ്പുകൾ (1,575 എണ്ണം) എന്ന റെക്കോർഡിനും പിന്നാലെ, ഡോണജീൻ വൈൽഡ് തന്റെ മൂന്നാമത്തെ ഗിന്നസ് റെക്കോർഡ് കൂടിയാണ് ഇതിലൂടെ സ്വന്തമാക്കിയത്. വൈൽഡിനെ സംബന്ധിച്ചിടത്തോളം ഇതൊരു ശ്രദ്ധേയമായ നേട്ടമാണ്. റെക്കോർഡ് ശ്രമം നടത്തിയതിന്റെ പിറ്റേന്ന് രാവിലെ തന്നെ അവർ 3,000 മീറ്റർ ഓട്ടമത്സരത്തിൽ പങ്കെടുക്കുകയും ചെയ്തു.
അടുത്ത റെക്കോർഡ് ശ്രമത്തിൽ, ഒരു മണിക്കൂറിനുള്ളിൽ കുറഞ്ഞത് 1,600 പുഷ്-അപ്പുകൾ ചെയ്ത് തന്റെ രണ്ടാമത്തെ റെക്കോർഡ് തിരുത്താനാണ് ആഗ്രഹിക്കുന്നത് എന്നാണ് വൈൽഡ് പറയുന്നത്.
കൈമുട്ടുകളിൽ ഊന്നിനിന്നുകൊണ്ട് പുഷ്-അപ്പ് ചെയ്യുന്നതുപോലെയുള്ള ഒരു നിലയിൽ ഉറച്ചുനിൽക്കുന്ന വ്യായാമരീതിയാണ് ‘പ്ലാങ്ക്’. ഈ വ്യായാമം ശരീരത്തിന്റെ ‘കോർ’ ഭാഗത്തെ ശക്തിപ്പെടുത്താൻ സഹായിക്കുന്നു. അതുവഴി നടുവിനെ സംരക്ഷിക്കാനും ശരീരത്തിന്റെ ഘടനയും പോസ്ച്ചറും മെച്ചപ്പെടുത്താനും നട്ടെല്ലുമായി ബന്ധപ്പെട്ട പരിക്കുകൾ തടയാനും ഇത് സഹായകമാകുന്നു.
