ഒരു മാസം മുമ്പായിരുന്നു കുച്ച് ബെഹര് ബകുല്ത്തലയിലെ സബ് ഇന്സ്പെക്ടറായ കൃഷ്ണകുമാര് ദാസ് വിവാഹിതനായത്. കഴിഞ്ഞ ദിവസം രാജ്യത്തിന് വേണ്ടി രക്തസാക്ഷിയായ കൃഷ്ണകുമാറിന്റെ വിവാഹാഘോഷം അവസാനിക്കും മുമ്പ് തന്നെ അദ്ദേഹത്തിന്റെ മരണവാര്ത്ത കുടുംബാംഗങ്ങള്ക്ക് വിശ്വസിക്കാനായിട്ടില്ല. ഛത്തീസ് ഗഡിലെ സുക്മയില് മാവോയിസ്റ്റ് ആക്രമണത്തില് കൊല്ലപ്പെട്ട 25 സിആര്പിഎഫ് ജവാന്മാരില് ഒരാളായിരുന്നു കൃഷ്ണകുമാറും.
വിവാഹം കഴിഞ്ഞ് ഒരു മാസം തികയും മുമ്പ് വിധവയായി മാറേണ്ടി വന്ന അദ്ദേഹത്തിന്റെ ഭാര്യയെ എങ്ങിനെ ആശ്വസിപ്പിക്കണമെന്ന് അറിയില്ലെന്ന് കഷ്ണകുമാറിന്റെ വീട് സന്ദര്ശിച്ച ശേഷം ബംഗാള് മുഖ്യമന്ത്രി മമതാ ബാനര്ജി പറഞ്ഞു. കൊല്ലപ്പെട്ട മൂന്ന് ബംഗാളുകാരുടെ കുടുംബത്തിന് അഞ്ചു ലക്ഷം വീതവും കുടുംബത്തില് ഒരാള്ക്ക് ജോലിയും പ്രഖ്യാപിച്ചിരിക്കുകയാണ് സര്ക്കാര്.
കൂച്ച് ബെഹറിലെ തന്നെ അതറനാലാ ഗ്രാമത്തില് നിന്നുള്ള ബിനോയ് ചന്ദ്ര ബര്മന്റെ മരണവിവരം മാതാവ് ഫുലോയേയും ഭാര്യയേയും എങ്ങിനെ അറിയിക്കും എന്ന വിഷമത്തിലാണ് ബന്ധുക്കള്. കോണ്സ്റ്റബിളായ ഇയാളുടെ പിതാവ് കുറേ കാലമായി രോഗബാധിതനായി കിടക്കുകയാണ്. മാതാവിനോ ഭാര്യയ്ക്കോ മിണ്ടാന് പോലും വയ്യ. അതുപോലെ തന്നെയാണ് നദിയയിലെ അഭയ്പൂരില് നിന്നുള്ള കോണ്സ്റ്റബിള് അരുപ് കര്മാകറിന്റെ കാര്യവും. ഉരുളക്കിഴങ്ങ് കര്ഷകന്റെ മകനായ അരൂപ് കുടുംബത്തിന്റെ നെടുന്തൂണായിരുന്നു. ജേഷ്ഠന് ജോലിയില്ല. രണ്ടു സഹോദരിമാരുടെ വിവാഹം കഴിഞ്ഞപ്പോള് തന്നെ കുടുംബം സാമ്പത്തികമായി തകര്ന്നിരുന്നു. അരുപിന് ജോലി കിട്ടിയതോടെ സാമ്പത്തിക നില പിടിച്ചു കയറി വരുന്നതിനിടയിലാണ് മരണം കുടുംബത്തിന്റെ അടിവേരിളക്കിയത്.
ഇന്നലെ തന്നെ വിവരം അറിഞ്ഞതാണ് അമ്മയെ അറിയിക്കാന് ധൈര്യമില്ല. ബന്ധുക്കളും മറ്റും ഇന്ന് വരുന്നതോടെ അവര് വിവരം അറിയും. അവരെ ആശ്വസിപ്പിക്കാന് വാക്കുകളില്ല. അരൂപിന്റെ മൂത്ത സഹോദരന് അനിമേഷ് പറയുന്നു. അടുത്തിടെ നടക്കാനിരിക്കുന്ന ബന്ധുവിന്റെ വിവാഹത്തില് പങ്കെടുക്കാനായി അരൂപ് പദ്ധതി ഇട്ടിരിക്കുകയാണ്. അരൂപിന്റെ വിവാഹവും എത്രയും പെട്ടെന്ന് നടത്താന് മാതാവ് ചന്ദനകുമാരി പെണ്ണിനെ നോക്കിക്കൊണ്ടിരിക്കുകയായിരുന്നു.
ബിരുദധാരിയായ അരൂപ് 2014 ല് ആയിരുന്നു സിആര്പിഎഫില് ചേര്ന്നത്. ബുവനേശ്വറിലും മദ്ധ്യപ്രദേശിലുമായി പരിശീലനം നേടിയ അദ്ദേഹത്തിന് 2010 ഒക്ടോബറില് ആദ്യം നിയമനം കിട്ടിയത് ഛത്തീസ് ഗഡിലായിരുന്നു. ജോലി കിട്ടിയതോടെ കുടുംബം സാമ്പത്തികമായി രക്ഷപ്പെട്ടു വരികയായിരുന്നു. അതിനിടയിലാണ് എല്ലാം നഷ്ടമായതെന്ന് അനിമേഷ് കര്മാര്കര് പറയുന്നു.
