റായ്പൂര്: ചത്തീസ് ഗഡിലെ സുക്മയില് 25 സിആര്പിഎഫ് ജവാന്മാരെ കൂട്ടക്കുരുതി നടത്തിയത് സൈനീകര് ഗോത്രവര്ഗ്ഗ സ്ത്രീകളോട് ലൈംഗിക കുറ്റകൃത്യങ്ങള് ചെയ്തതിനും ഗ്രാമീണരെ കൊന്നതിനുമുള്ള പ്രതികാരമാണെന്ന് മാവോയിസ്റ്റുകളുടേത് എന്ന് സംശയിക്കുന്ന വീഡിയോ ടേപ്പ്.
ആക്രമണത്തിന്റെ ഉത്തരവാദിത്വം ഏറ്റെടുത്ത് ഇവരുടെ ദണ്ഡ് കരണ്യ സ്പെഷ്യല് സോണല് കമ്മറ്റി (ഡി.കെ.എസ്.ഇസഡ്. സി.) പുറത്തുവിട്ട ഓഡിയോ ക്ളിപ്പിലാണ് ആരോപണം. മാവായിസ്റ്റ് വക്താവ് വികല്പ്പ് എന്നയാളുടെ പേരില് വന്നിരിക്കുന്ന ഓഡിയോയില് ആക്രമണം നടത്തിയ മാവോയിസ്റ്റ് ഗറില്ലാ വിഭാഗത്തിലെ നേതാക്കളെയും കമാന്റര് മാരെയും അഭിനന്ദിക്കുന്നുണ്ട്.
ഏറ്റുമുട്ടല് നടന്ന സ്ഥലങ്ങളിലെ ഗോത്രവരഗ്ഗക്കാരായ സ്ത്രീകളോട് സിആര്പിഎഫ് ജവാന്മാര് നടത്തുന്ന ലൈംഗികാതിക്രമത്തിനും ഗ്രാമീണരെ പീഡിപ്പിക്കുന്നതിനുമുള്ള മറുപടിയാണ് ആക്രമണമെന്നാണ് പറയുന്നത്. ഗിരിവര്ഗ്ഗ സ്ത്രീകളുടെ മാനാഭിമാനം കാത്തുസൂക്ഷിക്കാനുള്ള നപടിയെന്നും സ്വതന്ത്രരായ ഗിരിവര്ഗ്ഗക്കാരോട് സൈന്യം കാട്ടുന്ന മനുഷ്യത്വരഹിത അക്രമങ്ങള്ക്കുള്ള മറുപടിയായും കാണണമെന്ന് പറയുന്നു.
ഈ മേഖലയിലേക്കുള്ള റോഡ് നിര്മ്മാണത്തെ മാവോയിസ്റ്റുകള് എതിര്ക്കുകയും ചെയ്യുന്നുണ്ട്. വികസനം എന്ന പേരില് ഇത്തരം പദ്ധതികളിലൂടെ സര്ക്കാര് ജനങ്ങളെ കൊള്ളയടിക്കുകയാണെന്നും പറഞ്ഞു. കേന്ദ്ര - സംസ്ഥാന സര്ക്കാരുകള് ജനാധിപത്യവിരുദ്ധ നടപടികളാണ് ചെയ്യുന്നത്.
ഈ ആക്രമണം ദളിതുകളേയും ഗിരിവര്ഗ്ഗക്കാരേയും ന്യുനപക്ഷങ്ങളെയും ചൂഷണം ചെയ്യുന്നതിനും അവരുടെ സാംസ്ക്കാരിക സാമ്പത്തിക ജീവിതശൈലിയെ ബ്രാഹ്മണിക്, ഹിന്ദുത്വ, ഫാസിസ്റ്റ്, സംഘി, ബിജെപി സര്ക്കാരുകള് പോലീസിന്റെയും സൈന്യത്തിന്റെയും സംരക്ഷണത്തില് ആക്രമിക്കുന്നതിനുമുള്ള മറുപടിയാണെന്നും പറയുന്നു.
മാവോയിസ്റ്റുകള് ജവാന്മാരുടെ ശത്രുക്കളല്ല, സര്ക്കാര് ജോലികള് വിട്ടെറിഞ്ഞ് ജനകീയ പോരാട്ടത്തില് പങ്കാളിയാകാനും ആഹ്വനം ചെയ്യുന്നുണ്ട്. അതേസമയം ജവാന്മാരുടെ മൃതദേഹങ്ങള് വികൃതമാക്കിയെന്ന വാദം തള്ളുകയും ചെയ്തിട്ടുണ്ട്. സൈനികര് മാവോയിസ്റ്റുകളുടെ ഗറില്ലാ സംഘാംഗങ്ങളുടെ മൃതദേഹത്തോട് കാണിക്കാറുള്ള നടപടികള് തങ്ങള് ചെയ്യില്ലെന്ന് പറയുന്നു. പോരാട്ടത്തില് കൊല്ലപ്പെടുന്ന തങ്ങളുടെ സ്ത്രീകളുടെ ശരീരം മോശമാക്കിയ ശേഷം ചിത്രങ്ങള് പകര്ത്തി സാമൂഹ്യമാധ്യമങ്ങള് വഴി പ്രചരിപ്പിക്കാറുണ്ടെന്നും പറഞ്ഞു.
