കാസര്ഗോഡ്: ബേക്കല്കോട്ടയ്ക്കകത്ത് ഒരു മാസത്തിനകം ശൗചാലയം പണിയാന് പ്രധാനമന്ത്രി നരേന്ദ്രമോഡിയുടെ നിര്ദ്ദേശം. കോട്ട സന്ദര്ശിക്കാനെത്തിയപ്പോള് ശൗചാലയമില്ലാതെ വിഷമിച്ച വിദ്യാര്ഥിനി പ്രധാനമന്ത്രിക്ക് കത്തയച്ചതിനെത്തുടര്ന്നാണ് നടപടി.
ബോവിക്കാനം ബി.എ.ആര് എച്ച്.എസ്.എസിലെ പ്ലസ്ടു വിദ്യാര്ഥിനിയും മുളിയാര് എസ്.എസ് ക്ഷേത്രത്തിന് സമീപം താമസക്കാരിയുമായ കാവ്യ ഉണ്ണി എം. നല്കിയ പരാതിയിലാണ് പ്രധാനമന്ത്രി അടിയന്തിര നിര്ദേശം നല്കിയത്. കഴിഞ്ഞ ഏപ്രില് 30 നാണ് കാവ്യ കുടുംബത്തോടൊപ്പം ബേക്കല് കോട്ട സന്ദര്ശിക്കാന് പോയത്.
ആറ് ഏക്കറോളം വരുന്ന കോട്ട സന്ദര്ശിക്കുന്നവര്ക്ക് ശൗചാലയമില്ലെന്നറിഞ്ഞതോടെയാണ് പ്രധാനമന്ത്രിയെ വിവരം ധരിപ്പിച്ചത്. ശൗചാലയം അന്വേഷിച്ച് ജീവനക്കാരെ സമീപിച്ചപ്പോള് അവര് നിസ്സഹായാവസ്ഥ പ്രകടിപ്പിക്കുകയായിരുന്നു. ബേക്കല് കോട്ടയില് പ്രവേശിക്കണമെങ്കില് 15 രൂപയാണ് ഒരാള്ക്ക് ഈടാക്കുന്നത്.
എന്നാല് സന്ദര്ശകര്ക്ക് അടിസ്ഥാന സൗകര്യങ്ങളൊന്നും കോട്ടയ്ക്കകത്തില്ല. അന്ന് വീട്ടിലെത്തിയപ്പോള് നരേന്ദ്രമോഡി എന്ന ആപ്ലിക്കേഷനിലൂടെ പരാതി നല്കുകയായിരുന്നു.കഴിഞ്ഞ ദിവസമാണ് ഇതുസംബന്ധിച്ച് നടപടി സ്വീകരിക്കുമെന്ന് വിവരം അറിയിച്ചുകൊണ്ട് ആര്ക്കിയോളജിക്കല് വകുപ്പില് നിന്ന് കാവ്യയ്ക്ക് രേഖാമൂലം അറിയിപ്പ് കിട്ടിയത്.
തൃശൂര് ആസ്ഥാനമായ ആര്ക്കിയോളജിക്കല് വകുപ്പിന് പ്രധാനമന്ത്രിയുടെ ഓഫീസില് നിന്നും നിര്ദേശം ലഭിച്ചിരുന്നു. കഴിഞ്ഞ പ്ലസ്ടു പരീക്ഷയില് എല്ലാ വിഷയത്തിലും എ പ്ലസ് നേടിയാണ് കാവ്യ വിജയിച്ചത്. ബോവിക്കാനത്തെ പിക്കപ്പ് ലോറി ഡ്രൈവറായ ഉണ്ണികൃഷ്ണന്-ജയശ്രീ ദമ്പതികളുടെ മകളാണ് കാവ്യ.
