പേരാമ്പ്ര: നികുതി അടയ്ക്കാന് അനുവദിക്കാത്തതില് വില്ലേജോഫീസില് ജോയി തൂങ്ങിമരിച്ച സംഭവവുമായി ബന്ധപ്പെട്ട് കളക്ടര് സ്ഥലം സന്ദര്ശിക്കുകയും റവന്യൂ ഉദ്യോഗസ്ഥരുടെ പങ്ക് വ്യക്തമായെന്ന് പറഞ്ഞിട്ടും പോലീസ് കേസെടുത്തത് അസ്വാഭാവിക മരണത്തിന്. ജോയിയുടെ മരണത്തിന് കാരണം സര്ക്കാരാണെന്നും സര്ക്കാരിന്റെ അനാസ്ഥയാണെന്നും ആരോപിച്ച് വീട്ടുകാര് രംഗത്ത് വന്നിരിക്കെ റവന്യൂ ഉദ്യോഗസ്ഥരെ പോലീസ് ഇതുവരെ പ്രതി ചേര്ത്തിട്ടില്ല.
ഇന്നലെ ജനങ്ങളുടെ പ്രതിഷേധത്തെ തുടര്ന്ന് കോഴിക്കോട് ചെമ്പനോട വില്ലേജ് ഓഫീസ് കളക്ടര് സന്ദര്ശിക്കുകയും റവന്യൂ ഉദ്യോഗസ്ഥരുടെ പങ്ക് ബോദ്ധ്യപ്പെട്ടെന്ന് വ്യക്തമാക്കുകയും ചെയ്തിരുന്നു. എന്നാല് ഇപ്പോള് കേസെടുത്തിരിക്കുന്ന രീതിയിലേ ഇപ്പോള് മുമ്പോട്ട് പോകാനാകു എന്നും റവന്യൂ ഉദ്യോഗസ്ഥരുടെ പങ്ക് വ്യക്തമായാല് മാത്രമേ അവര്ക്കെതിരേ കേസെടുക്കാനാകൂ എന്നുമാണ് പോലീസിന്റെ നിലപാട്. രണ്ടാഴ്ച മുമ്പ് ആത്മഹത്യാകുറിപ്പ് എഴുതി വില്ലേജ് ഓഫീസര്ക്ക് നല്കിയിരുന്നെന്ന് പറയുന്നുണ്ടെങ്കിലും അതിന്റെ തെളിവുകള് ഒന്നും തന്നെ ഇതുവരെ കിട്ടിയിട്ടില്ലെന്ന് പോലീസ് പറഞ്ഞു.
അസ്വാഭാവിക മരണത്തിനാണ് ഇപ്പോള് കേസെടുത്തിരിക്കുന്നതെങ്കിലും കേസ് മുന്നോട്ട് നീങ്ങുമ്പോള് റവന്യൂ ഉദ്യോഗസ്ഥരുടെ പങ്ക് വ്യക്തമായാല് അപ്പോഴേ പ്രതിചേര്ക്കൂ എന്ന നിലപാടിലാണ് പോലീസ്. അതിനിടയില് ജോയിയുടെ മരണത്തിന് ഉത്തരവാദികള് സര്ക്കാരാണെന്നും സര്ക്കാരിന്റെ കെടുകാര്യസ്ഥത ആണ് കാരണമെന്നും ജോയിയുടെ സഹോദരന് ആരോപിച്ചു. ജോയിയുടെ കുടുംബത്തിന്റെ ഉത്തരവാദിത്വം സര്ക്കാര് ഏറ്റെടുക്കണമെന്നും പറഞ്ഞു.
ഭൂനികുതി സ്വീകരിക്കുന്നതുമായി ബന്ധപ്പെട്ട പ്രശ്നത്തില് മനംനൊന്ത് ചെമ്പനോട സ്വദേശി കാവില് പുരയിടത്തില് ജോയി (തോമസ്) യെയാണ് ഇന്നലെ രാത്രി ഒന്പതരയോടെയാണ് കോഴിക്കോട് ചെമ്പനോട വില്ലേജ് ഓഫീസിന്റെ ഗ്രില്ലില് തൂങ്ങിമരിച്ചനിലയില് കണ്ടെത്തിയത്. ഭാര്യയുടെ പേരിലുള്ള സ്ഥലത്തിന്റെ നികുതി സ്വീകരിക്കുന്നതുമായി ബന്ധപ്പെട്ട് പ്രശ്നം നിലനിന്നിരുന്നു. വില്ലേജ് അസിസ്റ്റന്റും വില്ലേജ് മാനുമാണ് മരണത്തിനുത്തരവാദികളെന്നും നികുതിയടയ്ക്കാനുള്ള ജോയിയുടെ ആവശ്യം ഇവര് കൈക്കൂലി ആവശ്യപ്പെട്ട് നിരാകരിച്ചെന്നും ബന്ധുക്കള് പറഞ്ഞു. കൈക്കൂലി നല്കാത്തതില് ഇവര്ക്ക് വൈരാഗ്യം ഉണ്ടായിരുന്നെന്നും അതായിരുന്നു നികുതി സ്വീകരിക്കാന് കൂട്ടാക്കാതിരുന്നതിന് കാരണമെന്നും ഭാര്യ പറഞ്ഞു.
രണ്ടു ദിവസം മുമ്പും ഇതേ ആവശ്യം പറഞ്ഞ് ജോയി വില്ലേജ് ഓഫീസില് എത്തിയിരുന്നു വില്ലേജ് ചെയ്തു കൊടുത്തില്ല. അതേസമയം ഇതേ സ്ഥലത്തിന് രണ്ടു വര്ഷം മുമ്പ് ഇതേ വില്ലേജ് ഓഫീസ് നികുതി സ്വീകരിച്ചതാണ് വീണ്ടും ആവശ്യം ഉന്നയിച്ചപ്പോഴാണ് ചെയ്യാതിരുന്നത്. ഒരു വര്ഷം മുമ്പ് ജോയിയും ഭാര്യയും ചെമ്പനോട വില്ലേജ് ഓഫീസിനു മുമ്പില് നിരാഹാരസമരം നടത്തിയിരുന്നു. രാഷ്ട്രീയക്കാരും ജനപ്രതിനിധികളും ഇടപെട്ടതിനെത്തുടര്ന്ന് താല്ക്കാലികമായി നികുതി സ്വീകരിക്കാന് വില്ലേജ് അധികൃതര് തയാറായി. പ്രശ്നം പൂര്ണമായി പരിഹരിക്കണമെന്നാവശ്യപ്പെട്ട് ജോയിയും കുടുംബവും പിന്നീട് വില്ലേജ് ഓഫീസില് കയറിയിറങ്ങിയെങ്കിലും വില്ലേജ് അധികൃതര് പാടെ അവഗണിക്കുകയായിരുന്നു.
