‘ഒരിക്കല് രാജുമോന് എന്നോട് ചോദിച്ചു അങ്കിളിന്റെ ഫാദര് ആരാണെന്ന്, ഞാന് പറഞ്ഞു ഒരു രാജാവാണെന്ന് കിരീടവും ചെങ്കോലും സിംഹാസനവുമുള്ള ഒരു രാജാവെന്ന്’. തീര്ച്ചയായും മോഹന്ലാലിനെ സൂപ്പര്താരമാക്കുന്നതില് പ്രധാനപങ്ക് വഹിച്ച ചിത്രമായ രാജാവിന്റെ മകനില് വിന്സെന്റ് ഗോമസിന്റെ പിതാവായി എത്തേണ്ടിയിരുന്നതും മലയാളത്തിലെ മറ്റൊരു പ്രമുഖ സൂപ്പര്താരമായിരുന്നു.
മെഗാസ്റ്റാര് മമ്മൂട്ടിയാണ് അന്ന് വിന്സന്റ് ഗോമസിന്റെ അച്ഛനായി എത്തേണ്ടിയിരുന്നതെന്നാണ് ഇപ്പോള് കേള്ക്കുന്നത്. ഇതിനായി കേവലം രണ്ട് സീനുകള് സംവിധായകന് മാറ്റിവെയ്ക്കുകയും ചെയ്തിരുന്നു. എന്നാല് മോഹന്ലാല് നിറഞ്ഞു നില്ക്കുന്ന ചിത്രത്തില് വെറും രണ്ട് സീനില് വരാന് താരം കൂട്ടാക്കിയില്ല. രാജാവിന്റെ മകന് സൂപ്പര് സംവിധായകന് തമ്പി കണ്ണന്താനം ആദ്യം മമ്മൂട്ടിയെ നായകനാക്കിയാണ് പ്ലാന് ചെയ്തിരുന്നത്. എന്നാല് ഇതിന് മുന്പ് തമ്പി കണ്ണന്താനവും മമ്മൂട്ടിയും ഒന്നിച്ച ചിത്രം നിലം തൊടാത്തതിനാല് മമ്മൂട്ടിക്ക് താല്പര്യകുറവ് വരികയായിരുന്നു.
എങ്കിലും അദ്ദേഹത്തെ ഏതെങ്കിലും തരത്തില് ഉള്പ്പെടുത്തണമെന്ന തമ്പി കണ്ണന്താനത്തിന്റെ ആഗ്രഹമായിരുന്നു സിനിമയിലെ വിന്സെന്റ് ഗോമസിന്റെ പിതൃ കഥാപാത്രത്തെ സൃഷ്ടിക്കാന് കാരണം. എന്തായാലും പടം വന്ഹിറ്റാകുകയും പിന്നീട് മോഹന്ലാലിന്റെ മെഗാതാരത്തിലേക്കുള്ള വളര്ച്ചയ്ക്ക് സിനിമ ആക്കം കൂട്ടുകയും ചെയ്തു. പിന്നീട് മോഹന്ലാലും തമ്പി കണ്ണന്താനവും ഒന്നിച്ച മിക്ക സിനിമകളും വന് ഹിറ്റായി മാറുകയും ചെയ്തു.
