ഗൊരഖ്പൂര്: ശിശുമരണത്തിലൂടെ കുപ്രസിദ്ധി നേടിയ ഉത്തര്പ്രദേശിലെ ഗൊരഖ്പൂര് ബി.ആര്.ഡി മെഡിക്കല് കോളജില് വീണ്ടും കൂട്ടശിശുമരണം. കഴിഞ്ഞ നാല് ദിവസത്തിനുള്ളില് 69 കുരുന്നുകള്ക്കാണ് ഇവിടെ ജീവന് നഷ്ടമായത്. 24 മണിക്കൂറിനുള്ളില് 19 കുട്ടികളാണ് മരണമടഞ്ഞത്.
ഈ മാസം ഏഴിന് 12 കുട്ടികളും എട്ടിന് 20 കുട്ടികളും ഒമ്പതിന് 18 കുട്ടികളും 10ന് 19 കുട്ടികളുമാണ് മരണമടഞ്ഞത്. ഇവരില് 13 പേര് നവജാത ശിശുക്കളും ആറു പേര് കടുത്ത മസ്തിഷ്കവീക്കം മൂലം ചികിത്സയില് കഴിഞ്ഞവരുമാണെന്ന് ബി.ആര്.ഡി മെഡിക്കല് കോളജ് പ്രിന്സിപ്പല് പി.കെ സിംഗ് അറിയിച്ചു.
ഓഗസ്റ്റ് രണ്ടാം വാരം അഞ്ചു ദിവസത്തിനുള്ളില് 60 കുട്ടികള് മരിച്ച വാര്ത്ത ഞെട്ടലോടെയാണ് രാജ്യം കേട്ടത്. ഇവയില് ഏറെയും വിവിധ രോഗങ്ങള് മൂലം നവജാത ശിശുക്കളുടെ തീവ്രപരിചരണ വിഭാഗത്തില് കഴിഞ്ഞിരുന്നവരാണ്. ദൂരസ്ഥലങ്ങളില് നിന്നും അതീവഗുരുതരാവസ്ഥയില് എത്തുന്നവരാണ് മരിച്ചവരില് ഏറെയുമെന്ന് മെഡിക്കല് കോളജ് പ്രിന്സിപ്പല് പറയുന്നു.
നിലവില് കുട്ടികളുടെ ഐസിയുവില് 118 പേരാണ് ചികിത്സയിലുള്ളത്. ഇവരില് 13 പേര് വിവിധ രോഗങ്ങള് മൂലം മരിച്ചു. കുട്ടികളുടെ വിഭാഗത്തില് 333 രോഗികളുണ്ട്. ഇവരില് 109 പേര് മസ്തിഷ്കവീക്കം ബാധിച്ചവരാണെന്നും പ്രിന്സിപ്പല് വ്യക്തമാക്കി.
ആശുപത്രിയില് നിന്നുള്ള റെക്കോര്ഡ് പ്രകാരം കഴിഞ്ഞ നാലു ദിവസത്തിനുള്ളില് 333നും 360നും ഇടയില് കുട്ടികളെ ചികിത്സയ്ക്കായി പ്രവേശിപ്പിച്ചിട്ടുണ്ടെന്നാണ് കരുതുന്നത്.
