2007ലാണ് ടോമിച്ചന് മുളകുപാടം എന്ന നിര്മ്മാതാവ് മുളകുപാടം ഫിലിംസുമായി മലയാള സിനിമയിലേയ്ക്കെത്തിയത്. മോഹന്ലാലിനെ നായകനാക്കി എടുത്ത ഫ്ളാഷ് എന്ന ആദ്യ ചിത്രം പക്ഷേ വന് പരാജയമായി. പിന്നീടിങ്ങോട്ടു ചെയ്ത മിന്നാമിന്നിക്കൂട്ടം, ലോലിപോപ്പ്, വെള്ളത്തൂവല് എന്നിവയും വലിയ വിജയങ്ങള് സമ്മാനിച്ചില്ല. അവസാനം ബിസിനസ്സ് തന്ത്രങ്ങള് നന്നായി അറിയാവുന്ന ടോമിച്ചന് 2010 വരെ കാത്തിരുന്നു. വലിയൊരു വിജയം മാത്രമേ ഇനിയുണ്ടാക്കൂ എന്ന നിര്ബന്ധത്തോടെ. അതിന്റെ ഫലമായിരുന്നു വൈശാഖ് എന്ന് പുതുമുഖ സംവിധായകന്റെ പോക്കിരി രാജ. ആറു കോടി മുടക്കിയ ചിത്രം 25 കോടിയോളം അന്ന് കളക്ട് ചെയ്തു. പിന്നീട് 150 കോടി പുലിമുരുകന് എന്ന പേരിലറിയപ്പെടാനുള്ള ഭാഗ്യമുണ്ടായി. എന്നാല് അതിനു പിന്നാലെ വന്ന രാമലീല ഉയര്ത്തിയത് വന് വെല്ലുവിളികളാണ്. പക്ഷേ അവിടെയും കളം നിറഞ്ഞു നിന്ന് ബിസ്സിനസ്സ് കാണിച്ചു കൊടുത്തു ടോമിച്ചന്.
സാധാരണ രീതിയില് ഒരു ദിലീപ് ചിത്രം എന്ന പേരില് പുറത്തിറങ്ങുമായിരുന്ന രാമലീല ദിലീപിന്റെ അറസ്റ്റോടെ മാര്ക്കറ്റിന്റെ പുതു തന്ത്രങ്ങള് മലയാള സിനിമക്ക് കാണിച്ച് കൊടുത്താണ് പുറത്തിറക്കിയത്. ഏതൊരു നിര്മ്മാതാവും തകര്ന്ന് പോകുന്ന സാഹചര്യത്തില് പോലും ബിസിനസ്സുകാരന്റെ മറു തന്ത്രങ്ങള് ഒളിപ്പിച്ച് ടോമിച്ചന് പതുങ്ങി നിന്നു.
ദിലീപിന്റെ ജാമ്യത്തിന് ശേഷം ചിത്രം റിലീസ് ചെയ്യാമെന്നുള്ള സാഹചര്യത്തില് നിന്ന ടോമിച്ചന് ദിലീപിന് എതിരെയുള്ള കേസ് ശക്തമാകുന്നതോടെ റൂട്ടു മാറ്റാന് ആരംഭിച്ചു. പുട്ടിന് പീര പോലെ ട്രെയിലറും പോസ്റ്ററുകളുമിറക്കി ടോമിച്ചന് രാമലീല എന്ന് സാധാരണക്കാരനെക്കൊണ്ട് പറയിപ്പിച്ചു. ഇതിനിടയില് സിനിമ ബഹിഷ്കരിക്കണമെന്ന പലരുടേയും പ്രസ്താവനകള് ബിസിനസ്സ് തന്ത്രങ്ങളിലെ മാര്ക്കറ്റിങ്ങ് രീതിയാക്കി പൊളിച്ചെഴുതി.
സിനിമ നടന്റെ പേരിലല്ല സംവിധായകന്റെ പേരിലാണ് എന്ന് പറഞ്ഞ് ടോമിച്ചന് എതിരാളികളുടെ വായടപ്പിച്ചു. ദിലീപിന്റെ ജാമ്യം വൈകുന്നതോടെ സെപ്റ്റംബര് 28 ന് ചിത്രം റിലീസ് ചെയ്യാന് ടോമിച്ചന് തീരുമാനിക്കുകയായിരുന്നു. എതിരാളികള് കൂടുതല് ശക്തമായി പ്രതികരിക്കുമ്പോളും ടോമിച്ചന് പതറാതെ നിന്നു. സെപ്റ്റംബര് 28 ന് ചിത്രം റിലീസ് ചെയ്തപ്പോള് എതിരാളികളെ അംബരപ്പിച്ചുള്ള ജന സാഗരമാണ് തീയറ്ററില് എത്തിയത്.
ദിലീപിന്റെ സിനിമയെ എതിര്ത്ത് മഞ്ജു വാര്യരുടെ ഉദാഹരണം സുജാതയെ അനുകൂലിച്ചവര് പോലും തീയറ്ററുകളില് ഒഴുകിയെത്തിയതോടെ ചിത്രം കോടികളാണ് വാരിയത്. അതേ സമയം ദുല്ഖര് ചിത്രം സോളോയുടെ റിലീസിന്റെ പേരില് രാമലീല പല തീയറ്ററില് നിന്ന് നീക്കം ചെയ്യാന് ശ്രമം നടത്തിയതോടെ ടോമിച്ചന് രംഗത്ത് എത്തി. ഹോള്ഡ് ഓവറാവാതെ ചിത്രം മാറ്റിയാല് പണി തരുമെന്ന ടോമിച്ചന്റെ ഭീഷണിയില് തീയറ്ററുകാരും വീണു.
ഇനി ടോമിച്ചന് മമ്മൂട്ടി ചിത്രമായ പോക്കിരി രാജയുടെ രണ്ടാം ഭാഗമായ രാജാ 2 ആണെന്നാണ് പ്രതീക്ഷിക്കുന്നത്. വൈശാഖ് തന്നെ സംവിധാനം ചെയ്യുന്ന ചിത്രം പോക്കിരി രാജ പോലെ വലിയ വിജയമാകുമെന്ന വിശ്വാസത്തിലാണ് ടോമിച്ചനും കൂട്ടരും.
