മോഹന്ലാലിന്റെ വില്ലന് നാളെ തീയറ്ററുകളിലേയ്ക്ക് എത്തുകയാണ്. മോഹന്ലാല്-ഉണ്ണികൃഷ്ണന് കൂട്ടുകെട്ടിലൊരുങ്ങുന്ന ചിത്രത്തെക്കുറിച്ച് ആരാധകരുടെ പ്രതീക്ഷ വളരെ വലുതാണ്. എന്നാല് മോഹന്ലാല് സിനിമ അല്ലെങ്കില് നല്ലൊരു മലയാള ചിത്രം എന്നീ മുന്ഗണനകളോടെ കാണാന് പോകുന്നവര് അറിഞ്ഞിരിക്കേണ്ട മറ്റു പല പ്രത്യേകതകളും വില്ലനുണ്ട്. ഇന്ത്യന് സിനിമയില് തന്നെ ആദ്യമായാണ് ഇങ്ങനെയൊരു ചിത്രം എന്നു പറയുന്നതില് അതിശയോക്തിയില്ല.
ഇന്ത്യന് സിനിമയുടെ ചരിത്രത്തില് ആദ്യമായാണ് '8 കെ' റസല്യൂഷനില് ഒരു സിനിമ ചിത്രീകരിക്കുന്നത്. റെഡിന്റെ വെപ്പണ് സീരിസിലുള്ള ഹീലിയം 8കെ ക്യാമയിലാണ് പൂര്ണ്ണമായും വില്ലന് ചിത്രീകരിച്ചിരിക്കുന്നത്. ചിത്രത്തിലെ ഒരു ഗാനത്തിന് മാറ്റെ പെയിന്റിങ്ങാണ് ഉപയോഗിച്ചിരിക്കുന്നത്. തമിഴ്-തെലുങ്ക് താരങ്ങളായ വിശാല്, ശ്രീകാന്ത്, ഹന്സിക എന്നിവരുടെ ആദ്യ മലയാള ചിത്രമാണിത്. 7 കോടിക്കാണ് സൂര്യ ടിവി സാറ്റലൈറ്റ് അവകാശം സ്വന്തമാക്കിയത്.
ബോളിവുഡ് സ്റ്റണ്ട് മാസ്റ്റര് രവി വര്മ്മയാണ് ആക്ഷന് സ്വീകന്സുകള് ഒരുക്കിയിരിക്കുന്നത്. ഒരു സ്റ്റണ്ട് രംഗത്തിലെ മുഴുവന് ഫൈറ്റേഴ്സും ഫ്രാന്സ്-റഷ്യ എന്നിവിടങ്ങളില് നിന്നാണ്. ബി ഉണ്ണികൃഷ്ണനും മോഹന്ലാലും ഒന്നിക്കുന്ന നാലാമത്തെ ചിത്രവും മഞ്ജു വാര്യരുമായി ഒന്നിക്കുന്ന അഞ്ചാമത്തെ ചിത്രവുമാണിത്. ഓഡിയോ അവകാശം റെക്കോര്ഡ് തുകയായ 50 ലക്ഷത്തിന് ജംഗ്ളി മ്യൂസികിനാണ് വിറ്റു പോയത്. ഒരു മലയാള ചിത്രത്തിന് ലഭിക്കുന്ന ഏറ്റവും ഉയര്ന്ന തുകയായ 1 കോടിക്കാണ് ഹിന്ദി മൊഴിമാറ്റ അവകാശവും വിറ്റു പോയത്.
