തിരുവനന്തപുരം: വിഴിഞ്ഞം തുറമുഖനിര്മാണവുമായി ബന്ധപ്പെട്ട പ്രക്ഷോഭം അനിശ്ചിതമായി നീണ്ടാല് ബാഹ്യശക്തികളുടെ ഇടപെടലുണ്ടാകുമെന്നു പോലീസ് രഹസ്യ റിപ്പോര്ട്ട്. കുടിയൊഴിപ്പിച്ചവര്ക്കായുള്ള നഷ്ടപരിഹാര പാക്കേജിന്റെ കാര്യത്തില് ഉടന് തീരുമാനമുണ്ടാക്കണമെന്നും ചര്ച്ചകളിലൂടെയുള്ള സമവായം അട്ടിമറിക്കാന് ശക്തമായ നീക്കം നടക്കുന്നുണ്ടെന്നും ആഭ്യന്തര സെക്രട്ടറിക്കു സമര്പ്പിച്ച റിപ്പോര്ട്ടില് പറയുന്നു.
വിഴിഞ്ഞം സമരത്തെ കൂടംകുളം പ്രക്ഷോഭവുമായി കൂട്ടിക്കെട്ടാനും കൂടംകുളം സമരനേതാവ് ഉദയകുമാറിനെ സമരവേദിയിലെത്തിക്കാനും ശ്രമം നടക്കുന്നുണ്ട്. സി.പി.എമ്മിന്റെ ഒരു ഉന്നതനേതാവുമായി അടുത്തബന്ധമുള്ളയാളാണ് ഉദയകുമാര്. മത്സ്യത്തൊഴിലാളി സംഘടനകളെയാകെ സമരത്തില് അണിനിരത്താനും ശ്രമമുണ്ട്. സ്വതന്ത്ര മത്സ്യത്തൊഴിലാളി ഫെഡറേഷന് ഇതുവരെ സമരത്തില് നേരിട്ട് ഇടപെട്ടിട്ടില്ല. ഫെഡറേഷന് നേതാവ് ടി. പീറ്റര്, ഭാര്യ മാക്ലീന് പീറ്റര് എന്നിവരെ പങ്കെടുപ്പിക്കാന് രഹസ്യതീരുമാനമായിട്ടുണ്ടെന്നും റിപ്പോര്ട്ടില് പറയുന്നു.
പ്രദേശത്തിന്റെ സവിശേഷതകളും തുറമുഖനിര്മാണത്തിനായി ഒട്ടേറെ യന്ത്രസാമഗ്രികള് എത്തിച്ചതും കണക്കിലെടുക്കുമ്പോള് സമരം നീണ്ടുപോകുന്നത് ആശാസ്യമല്ല. ചിപ്പിത്തൊഴിലാളികള്ക്കു സഹായം അനുവദിച്ചതും ചിലര്ക്കു നഷ്ടപരിഹാരം നല്കിയതും മത്സ്യത്തൊഴിലാളികള്ക്കു വാഗ്ദാനം ചെയ്ത പണം നല്കാത്തതും പദ്ധതിപ്രദേശത്തെ താമസക്കാര്ക്കു ജോലി കൊടുക്കുന്നതിനു പകരം ഇതരസംസ്ഥാനത്തൊഴിലാളികളെ നിയോഗിച്ചതുമെല്ലാം പ്രശ്നം വഷളാകാന് ഇടയാക്കിയെന്നു റിപ്പോര്ട്ടില് പറയുന്നു. സമരത്തെ പിന്തുണയ്ക്കാന് ഭരണകക്ഷിയിലെ ഒരുവിഭാഗം താല്പര്യമെടുക്കുന്നതായും സൂചനയുണ്ട്.
