ന്യൂഡല്ഹി: ഗുജറാത്ത് തെരഞ്ഞെടുപ്പില് ശക്തമായ വാക് പോര് തുടരുന്നതിനിടയില് മുന്കാല സര്ക്കാരുകളെ വിമര്ശിച്ച പ്രധാനമന്ത്രി നരേന്ദ്രമോഡി കോണ്ഗ്രസിനെ വീണ്ടും വെട്ടിലാക്കി. രാഷ്ട്രനിര്മ്മാണത്തില് മുഖ്യപങ്കു വഹിച്ച സര്ദാര് വല്ലഭായി പട്ടേലിന്റെ പാരമ്പര്യം ചില മുന്കാല സര്ക്കാരുകള് അവഗണിച്ചതായി മോഡി പറഞ്ഞു. ഒരു സര്ക്കാരിന്റെയും പേരെടുത്തു പറയാതെയായിരുന്നു വിമര്ശനമെങ്കിലും കോണ്ഗ്രസിനെ ലക്ഷ്യമിട്ടാണ് അമ്പ് തൊടുത്തതെന്ന് വ്യക്തം.
സര്ദാര് പട്ടേലിന്റെ സംഭാവനകളെ ചിലര് മറയ്ക്കാനും തമസ്ക്കരിക്കാനും ശ്രമിക്കുകയാണ്. അദ്ദേഹത്തിന്റെ പാരമ്പര്യത്തെ വിസ്മരിക്കാനും ശ്രമങ്ങള് നടത്തുന്നതിന് പകരം ഇന്ത്യയിലെ യുവത പട്ടേലിന്റെ സംഭാവനകളെ ബഹുമാനിക്കണം. പട്ടേലിന്റെ ജന്മദിനത്തില് അദ്ദേഹം സ്വാതന്ത്ര്യം കിട്ടിയതിന് തൊട്ടുപിന്നാലെ അദ്ദേഹം രാജ്യത്തിന് ചെയ്ത സംഭാവനകളെ ഓര്ത്ത് അഭിമാനം കൊള്ളണം. സര്ദാര് പട്ടേലിന്റെ ജന്മദിനത്തില് റണ് ഫോര് യൂണിറ്റി പരിപാടി ഫ്ളാഗ് ഓഫ് ചെയ്തു സംസാരിക്കുകയായിരുന്നു അദ്ദേഹം.
മഹാത്മാഗാന്ധിക്കും നെഹ്രുവിനും ഒപ്പം സ്വാതന്ത്ര്യസമര പോരാട്ട രംഗത്ത് ഉണ്ടായിരുന്ന സര്ദാര് പട്ടേല് ആഭ്യന്തരമന്ത്രിയായും ഉപപ്രധാനമന്ത്രിയായും സേവനം അനുഷ്ഠിച്ചാളാണ്. പല ഭാഗങ്ങളായി ചിതറിക്കിടന്ന നാട്ടുരാജ്യങ്ങളെ ലയിപ്പിച്ച് ഇന്ത്യയുടെ ഭാഗമാക്കാനുള്ള ശക്തമായ പ്രവര്ത്തനം നടത്തി. പക്ഷേ കോണ്ഗ്രസും നെഹ്രു-ഗാന്ധി കുടുംബങ്ങള് അദ്ദേഹത്തെ അരികുവല്ക്കരിക്കാന് ശ്രമം നടത്തുകയാണെന്നുമാണ് പ്രധാനമന്ത്രി പറഞ്ഞു.
