''ഞാന് വലുതാകുമ്പോള് അച്ഛനെക്കൊണ്ട് സല്യൂട്ട് ചെയ്യിക്കും.'' സിവില് സര്വീസില് നാലാം ക്ളാസ്സുകാരിയായി ആലപ്പുഴ ജില്ലാ കളക്ടര് ടി.വി. അനുപമ കുട്ടിയായിരുന്നപ്പോള് വിജിലന്സില് സി ഐ ആയിരുന്ന പിതാവിനെ കീഴുദ്യോഗസ്ഥര് സല്യൂട്ട് ചെയ്യുന്നത് കാണുമ്പോള് പറഞ്ഞ വാക്കുകളാണ് ഇത്. കായല് കയ്യേറ്റവുമായി ബന്ധപ്പെട്ട് വിവാദത്തില് കുടുങ്ങി ഗതാഗതമന്ത്രി തോമസ്ചാണ്ടി രാജിവെയ്ക്കുമ്പോള് ഇന്റര്നെറ്റില് കേരളത്തില് ഏവരും തിരയുന്ന മുഖവും വിവരങ്ങളുമായി മാറുകയാണ് ആലപ്പുഴ ജില്ലാ കളക്ടര് അനുപമയെക്കുറിച്ചാണ്.
ലേക്ക് പാലസ് റിസോര്ട്ടിന് സമീപത്തെ വിവാദ റോഡ് നിര്മ്മാണം, കായല് കയ്യേറ്റം, ദേശീയ ജലപാത ആഴം കൂട്ടലിന്റെ ഭാഗമായി ഖനനം ചെയ്ത മണ്ണു നിക്ഷേപിച്ച സംഭവം എന്നിവ പരിശോധിച്ച് അനുപമ സമര്പ്പിച്ച റിപ്പോര്ട്ടാണ് ഇപ്പോള് തോമസ് ചാണ്ടിയുടെ മന്ത്രിപദത്തിന്റെ വിധിയെഴുതിയിരിക്കുന്നത്. ഒരേ വകുപ്പില് രണ്ടാമത്തെ മന്ത്രിയും രാജിവെയ്ക്കേണ്ടി വരുമെന്ന സാഹചര്യത്തില് സര്ക്കാരിനെ സംരക്ഷിക്കാനുള്ള സമ്മര്ദ്ദത്തെ വരെ മറികടന്ന് ധീരമായി സമര്പ്പിച്ച റിപ്പോര്ട്ട് തോമസ്ചാണ്ടിയെ രാജിയിലേക്ക് എത്തിച്ചിരിക്കുകയാണ്.
ഭക്ഷ്യ മാഫിയയ്ക്ക് എതിരേ തുടങ്ങിയ പോരാട്ടത്തിലൂടെ സുരക്ഷാ കമ്മീഷണര് പദത്തെ ജനശ്രദ്ധയിലേക്കു കൊണ്ടുവന്ന അനുപമ മലപ്പുറം ജില്ലയിലെ മാറഞ്ചേരി പനമ്പാട് പറയേരിക്കല് ബാലസുബ്രഹ്മണ്യന്റെയും ഗുരുവായൂര് ദേവസ്വം എഞ്ചിനീയര് രമണിയുടെയും മകളാണ്. ചെറുപ്പം മുതല് പഠനത്തില് മികവ് കാട്ടിയ അനുപമ എസ്എസ്എസല്സി യ്ക്ക് 13 ാം റാങ്കും പ്ളസ്ടൂവിന് മൂന്നാം റാങ്കും നേടിയാണ് റാങ്കുകളുടെ ആദ്യ പടികള് നിര്ണ്ണായകമാക്കിയത്. 2010 സിവില് സര്വീസില് ആദ്യ ശ്രമത്തില് തന്നെ നാലാം റാങ്കും നേടി. പൊന്നാനി വിജയമാതാ സ്കൂള്, ഗോവ ബിറ്റ്സ് പിലാനി എഞ്ചിനീയറിംഗ് കോളേജ്, എന്നിവിടായിരുന്നു വിദ്യാഭ്യാസം. 2008 ജൂലൈ മുതല് തിരുവനന്തപുരത്തെ സ്റ്റേറ്റ് സിവില് സര്വീസ് അക്കാദമി, പാലാ സിവില്സര്വീസ് ഇന്സ്റ്റിറ്റിയൂട്ട്, ഡല്ഹി എഎല്എസ് എന്നിവിടങ്ങളിലായിരുന്നു സിവില് സര്വീസ് പരീക്ഷയ്ക്കുള്ള പരിശീലനം നേടിയത്.
ഭക്ഷ്യസുരക്ഷാ കമ്മീഷണര് എന്ന നിലയില് മാഫിയയ്ക്ക് എതിരേ എടുത്ത ശക്തമായ നിലപാടുകള് സാമൂഹ്യമാധ്യമങ്ങളില് അനുപമയ്ക്ക് വന് ആരാധകവൃന്ദത്തെ തന്നെ നേടിക്കൊടുത്തു. ഭക്ഷ്യ ഉല്പ്പന്നങ്ങളിലെ മായം ചേര്ക്കലിനെതിരേയായിരുന്നു പോരാട്ടം. പിന്നീടാണ് കയ്യേറ്റമുള്പ്പെടെ ഭരണ തലപ്പത്തുള്ളവര് കേന്ദ്രീകരിക്കപ്പെട്ട വിഷയം ശക്തമായിരിക്കെയാണ് ആലപ്പുഴയിലേക്ക് കളക്ടറായി നിയോഗിക്കപ്പെടുന്നത്. ആലപ്പുഴയില് റവന്യൂ തലപ്പത്ത് എത്തിയതിന് പിന്നാലെ കയ്യേറ്റ ഭൂമിയെന്ന് ആരോപണമുള്ള മന്ത്രി തോമസ് ചാണ്ടിയുടെ ലേക്ക് പാലസ് റിസോര്ട്ടില് ഉദ്യോഗസ്ഥരുമായി സന്ദര്ശനം നടത്തിയത്. ആര്ക്കും വഴങ്ങാത്ത അനുപമ മന്ത്രിക്കെതിരേ റിപ്പോര്ട്ടും നല്കി. തോമസ് ചാണ്ടിയുടെ കയ്യേറ്റങ്ങള് അക്കമിട്ടു നിരത്തുകയും ചെയ്തു.
ഒരു ദൃശ്യമാധ്യമം പുറത്തു വിട്ട വാര്ത്തയില് അനുപമയുടെ റിപ്പോര്ട്ടാണ് തോമസ്ചാണ്ടിയെ രാജിയിലേക്ക് നയിച്ചതെന്ന് വ്യക്തം. കളക്ടറുടെ റിപ്പോര്ട്ടിനെതിരേ കോടതിയില് എത്തിയ തോമസ്ചാണ്ടിക്ക് ഹൈക്കോടതിയില് നിന്നും വിമര്ശനവും കേള്ക്കേണ്ടി വന്നു. മന്ത്രിയായ തോമസ് ചാണ്ടി അനുപമയോടാണ് പരാതി പറയേണ്ടതെന്നാണ് ഹൈക്കോടതി പോലും പറഞ്ഞത്. ഒടുവില് പ്രതിപക്ഷത്തിന്റെ സമ്മര്ദ്ദവും സ്വന്തം മുന്നണിയില് നിന്നു തന്നെ എതിര്പ്പ് നേരിടേണ്ടി വന്നതിനെ തുടര്ന്ന് ഒടുവില് രാജി വെയ്ക്കേണ്ടി തന്നെ വന്നു.
ഉയര്ന്ന ലക്ഷ്യബോധവുമായി കുതിച്ച അനുപമ നിയോഗിക്കപ്പെട്ട പദവിയില് എല്ലാം കര്ശനമായ നീതിബോധവുമായി കുതിച്ചപ്പോള് പലപ്പോഴും വെള്ളം കുടിച്ചത് സര്ക്കാരുകളായിരുന്നു. വമ്പന് ജനപിന്തുണ അവരെ ഒതുക്കുന്നതില് നിന്നും ഭരണസംവിധാനങ്ങളെ ഭയപ്പെടുത്തുകയും ചെയ്തു. തലശ്ശേരി സബ്കളക്ടറായി നിയോഗിതയായത് മുതല് വാര്ത്തകളില് ഇടം പിടിച്ച അനുപമ ഏറെ ശ്രദ്ധിക്കപ്പെട്ട ഭക്ഷ്യ സുരക്ഷാ കമ്മീഷണറായിരിക്കെ പ്രസവാവധിക്ക് പോയ ചെറിയ കാലയളവ് ഒഴിച്ചാല് സര്വീസ് കാലയളവ് വിപ്ളവകരമാക്കി മാറ്റി. ഒടുവില് ഇതാ അനുപമയുടെ റിപ്പോര്ട്ടില് തട്ടി തോമസ് ചാണ്ടിയുടെ രാജിയും.
