ലോകത്തിനു മുന്നില്‍ തെരുവുനായ കാരണം മാനം പോയ ഒരു യുവാവിനെ ആരും മറന്നു കാണില്ല. വിജനമായ കടത്തിണ്ണയില്‍ തന്റെ ഫോണില്‍ കുത്തിക്കൊണ്ടിരിക്കുന്നതിനിടെയാണ് പിറകില്‍ വന്ന് ഒരു നായ പണി പറ്റിച്ചിട്ട് പോയത്. അനങ്ങാതിരുന്ന യുവാവിന്റെ പിറകില്‍ നായ മൂത്രമൊഴിക്കുകയായിരുന്നു. സമീപത്തെ കടയുടെ മുന്നില്‍ സ്ഥാപിച്ചിരുന്ന സിസിടിവിയില്‍ ഈ ദൃശ്യങ്ങള്‍ പതിയുകയും പിന്നാലെ സാമൂഹ്യമാധ്യമങ്ങളിലൂടെ വൈറലാകുകയും ചെയ്തിരുന്നു.
ബ്രസിലിലെ റിയോ ഡി ജനീറോയില്‍ നടന്ന സംഭവത്തില്‍ ഹെയ്ന്‍സ് സാഞ്ചെസ് എന്ന 27കാരനായ യുവാവാണ് ലോകത്തിനു മുന്നില്‍ പരിഹാസ്യനായത്. നായ മൂത്രമൊഴിച്ച ഉടനെ യുവാവ് ചാടിയെഴുന്നേറ്റ് ക്ഷുഭിതനായി നായയെ തൊഴിക്കുന്നതും ദൃശ്യങ്ങളില്‍ വ്യക്തമായിരുന്നു. നായയെ തൊഴിച്ചതിന് യുവാവിനെതിരെ സാമൂഹ്യമാധ്യമങ്ങളില്‍ ഏറെപേര്‍ പ്രതികൂലിച്ചിരുന്നു. വൈറലായ ആ സംഭവത്തിനു പിന്നാലെ നടന്ന ട്വിസ്റ്റ് എന്നാല്‍ നിങ്ങള്‍ അറിയണം.
ആ സംഭവത്തിനു ശേഷം ആ യുവാവ് ആ നായയെ തേടി അവിടെയെത്തി. നായയ്ക്ക് ഉടമസ്ഥനില്ലെന്ന് കണ്ടെത്തിയതോടെ ആ നായയെ സാഞ്ചെസ് തന്റെയടുത്തേക്ക് വിളിച്ചു. സാഞ്ചെസ് വിളിച്ചയുടനെ നായ വാലാട്ടിക്കൊണ്ട് ഓടിയരികിലെത്തി. അതിനു പിന്നാലെ തന്നെ പരിഹാസ്യനാക്കിയ ആ നായയെ തന്റെ വീട്ടിലേയ്ക്കുള്ള യാത്രയില്‍ യുവാവ് കൂടെകൂട്ടുകയായിരുന്നു.
നായ പിന്നില്‍ വന്ന ്മൂത്രമൊഴിച്ചപ്പോള്‍ തൊഴിച്ചത് പെട്ടെന്നുണ്ടായ പ്രകോപനത്താലാണെന്നും ആ ദേഷ്യം അപ്പോള്‍ തന്നെ മാറിയിരുന്നുവെന്നും സാഞ്ചെസ് പറഞ്ഞു. തനിക്കുണ്ടാകുന്ന കുട്ടിക്കായി മാറ്റിവെച്ചിരുന്ന പേരാണ് സാഞ്ചെസ് നായയ്ക്ക് നല്‍കിയിരിക്കുന്നത്. എന്‍സോ. സാഞ്ചെസ് എവിടെപ്പോയാലും എന്‍സോയും കൂട്ടിനുണ്ടാകും.
Comments