ന്യുഡല്ഹി: ചൂടുകനത്തതോടെ ഇന്ത്യ ചുട്ടുപൊള്ളുകയാണ്. അതിനിടയില് ലോകത്തിലെ ഏറ്റവും ചൂടേറിയ 20 സ്ഥലങ്ങള് അടയാളപ്പെടുത്തിയതില് 19-ഉം ഇന്ത്യയിലെന്ന് റിപ്പോര്ട്ട്. ഇതോടെ ലോകത്തിന്റെ 'ചൂട് തലസ്ഥാനമായി' ഇന്ത്യ മാറിയിരിക്കുകയാണ്. ബിഹാര്, ഒഡീഷ, പശ്ചിമ ബംഗാള്, ഉത്തര്പ്രദേശ് എന്നീ സംസ്ഥാനങ്ങളിലെ നഗരങ്ങളാണ് ഈ പട്ടികയില് മുന്പന്തിയിലുള്ളത്.
ബിഹാറിലെ ഭാഗല്പൂര്, ഒഡീഷയിലെ താല്ച്ചര്, പശ്ചിമ ബംഗാളിലെ അസന്സോള് എന്നിവയാണ് പട്ടികയില് ഒന്നാമത്. ഡാറ്റ ശേഖരിച്ച സമയത്ത് ഭൂമിയിലെ തന്നെ ഏറ്റവും ഉയര്ന്ന താപനിലയായ 44 ഡിഗ്രിയാണ് ഇവിടെ രേഖപ്പെടുത്തിയത്. ബിഹാറിലെ ബെഗുസരായ്, മോത്തിഹാരി, മുംഗര്, ഭോജ്പൂര്, സിവാന എന്നീ നഗരങ്ങളിലും പശ്ചിമ ബംഗാള്, കിഴക്കന് ഉത്തര്പ്രദേശ് എന്നിവിടങ്ങളിലെ വിവിധ സ്ഥലങ്ങളിലും 43 ഡിഗ്രിക്ക് അടുത്താണ് താപനിലയെന്ന് 'ഇന്ത്യാ ടുഡേ' റിപ്പോര്ട്ട് ചെയ്യുന്നു.
പട്ടികയിലെ ആദ്യ 20 സ്ഥാനങ്ങളില് ഇന്ത്യയ്ക്ക് പുറത്തുള്ള ഏക സ്ഥലം നേപ്പാളിലെ ലുംബിനിയാണ്. ആഗോള താപനില ക്രമത്തില് ഇന്ത്യ എത്രത്തോളം മുന്നിലാണെന്ന് ഇത് അടിവരയിടുന്നു. ഏപ്രില് 22 മുതല് 24 വരെ ഉഷ്ണതരംഗ സാഹചര്യം തുടരുമെന്ന് ഇന്ത്യന് കാലാവസ്ഥാ വകുപ്പ് മുന്നറിയിപ്പ് നല്കിയിട്ടുണ്ട്. പലയിടങ്ങളിലും താപനില ഇനിയും ഉയര്ന്ന് 43 ഡിഗ്രി വരെ എത്താന് സാധ്യതയുണ്ട്. സാധാരണയായി താപനില 40 ഡിഗ്രി കടക്കുമ്പോഴാണ് കാലാവസ്ഥാ വകുപ്പ് ഔദ്യോഗികമായി ഉഷ്ണതരംഗം പ്രഖ്യാപിക്കുന്നത്.
ഉത്തരേന്ത്യയിലും മധ്യ ഇന്ത്യയിലും കിഴക്കന് ഇന്ത്യയിലും ഒരേസമയം താപനില ഉയരുന്നത് പ്രാദേശികമായ മാറ്റങ്ങള് കൊണ്ടല്ല, മറിച്ച് അന്തരീക്ഷത്തിലുണ്ടായ വലിയ മാറ്റങ്ങള് കാരണമാണെന്ന് വിദഗ്ധര് ചൂണ്ടിക്കാട്ടുന്നു. പല ഘടകങ്ങള് ഒരേസമയം ഒത്തുചേരുന്നതാണ് ഈ കടുത്ത ചൂടിന് കാരണം. എന്നാല് രാജ്യത്തെ കാലാവസ്ഥ എല്ലായിടത്തും ഒരുപോലെയല്ല. വടക്കന്-മധ്യ മേഖലകള് ചൂടിനെതിരെ പോരാടുമ്പോള്, തെക്കേ ഇന്ത്യയിലും വടക്കുകിഴക്കന് ഇന്ത്യയിലും ഈര്പ്പമുള്ള വായുവും ഇടിമിന്നലോടു കൂടിയ മഴയും അനുഭവപ്പെടുന്നുണ്ട്. രാജ്യത്തിന്റെ വിവിധ ഭാഗങ്ങളില് നിലനില്ക്കുന്ന കാലാവസ്ഥാപരമായ വൈവിധ്യമാണ് ഇത് കാണിക്കുന്നത്.
റെക്കോര്ഡ് താപനില ഒരേ രാജ്യത്ത് ഇത്തരത്തില് കേന്ദ്രീകരിക്കുന്നത് കാലാവസ്ഥാ വ്യതിയാനത്തിന്റെ വ്യക്തമായ സൂചനയാണെന്ന് വിദഗ്ധര് മുന്നറിയിപ്പ് നല്കുന്നു. വരും വര്ഷങ്ങളില് ഉഷ്ണതരംഗങ്ങളുടെ തീവ്രതയും ആവൃത്തിയും വര്ദ്ധിക്കുമെന്നാണ് ഇത് നല്കുന്ന സൂചന. ഏപ്രില് മാസം അവസാനത്തോടടുക്കുമ്പോഴും ആശ്വാസകരമായ മാറ്റങ്ങളൊന്നും ഉടനെ പ്രതീക്ഷിക്കാനില്ല. വരും ആഴ്ചകളില് പ്രീ-മണ്സൂണ് മഴ സജീവമാകുന്നത് വരെ ഈ കടുത്ത ചൂട് തുടരാനാണ് സാധ്യതയെന്ന് റിപ്പോര്ട്ട് വ്യക്തമാക്കുന്നു.
