കൊച്ചി : കേരളത്തില് പല പേരുകളില് പ്രവര്ത്തിക്കുന്ന കപട വൈദ്യന്മാരുടെ ഇരയാണോ കഴിഞ്ഞ ദിവസം മരണപ്പെട്ട നടന് കലാഭവന് അബി എന്ന സംശയം ബലപ്പെടുന്നു. രക്തത്തിലെ പ്ലേറ്റ്ലെറ്റുകളുടെ എണ്ണത്തില് വ്യതിയാനമുണ്ടാകുന്ന ഗുരതരമായ അവസ്ഥയെ നിയന്ത്രിച്ചു നിര്ത്തുക എന്നത് മാത്രമേ അബിയുടെ കാര്യത്തില് ചെയ്യാനുണ്ടായിരുന്നുള്ളൂ എന്നിരിക്കെ അദ്ദേഹത്തിന് വൈദ്യന് നല്കിയിരുന്നത് വിചിത്രമായ ചികിത്സകള്.
വെള്ളത്തില് കലക്കി കുടിക്കാനുള്ള പൊടികള്, ഒരു തരം മത്സ്യം, രാവിലെ വ്യായാമം ഇങ്ങനെ നീളുന്നു അബിയിലെ ഗുരുതര രോഗത്തിന് വൈദ്യന് നല്കിയിരുന്ന ചികിത്സ. വൈദ്യരില് അബിയ്ക്കും അബിയ്ക്ക് വൈദ്യരിലും വലിയ വിശ്വാസമായിരുന്നു. വെള്ളത്തില് കലക്കി കുടിയ്ക്കണമെന്ന് പറഞ്ഞ് രണ്ടു തരം പൊടികളാണ് അബിയ്ക്ക് നല്കിയിരുന്നതെന്ന് അദ്ദേഹത്തോടൊപ്പം തലേന്ന് വൈദ്യരെ കാണാന് പോയ സുഹൃത്ത് ഷെരീഫ് പറയുന്നു.
അസുഖം ഭേദപ്പെടാന് സഹായിക്കുന്ന ഒരു മത്സ്യം ഉണ്ടെന്നും അതു കഴിച്ചാല് മതിയെന്നും മറ്റൊന്നും ഇപ്പോള് വേണ്ടതില്ലെന്നും പറഞ്ഞ വൈദ്യര് ചില വ്യായാമങ്ങളും നിര്ദേശിച്ചിരുന്നു. വൈദ്യരുടെ ചികിത്സ വിശ്വസനീയമല്ലെന്ന് തോന്നിയതിനാല് അവിടേയ്ക്ക് പോകുന്നതിന് അബിയെ വിലക്കിയിരുന്നുവെന്നും ഇത്തരം ചികിത്സകളൊന്നും വേണ്ട നമുക്ക് അമേരിക്കയിലേയ്ക്ക് പോകാമെന്ന് താന് പറഞ്ഞിരുന്നതായും ഷെരീഫ് പറയുന്നു. എന്നാല്, ഒരിക്കല് തന്നെ അവിടെ കൊണ്ടുപോകാമെന്നും അപ്പോള് കാര്യങ്ങള് നേരിട്ട് കണ്ട് ബോധ്യപ്പെടുമെന്നും അബി പറഞ്ഞതായും ഷെരീഫ് കൂട്ടിച്ചേര്ത്തു. ഇതു പ്രകാരമാണ് മരണത്തിന് തലേന്ന് അബിയ്ക്കൊപ്പം പോകാന് ഇടയായത്.
അബി കണ്ടിരുന്ന വൈദ്യര് ക്യാന്സറിന്റെ രണ്ടാം ഘട്ടത്തിലുള്ള അവസ്ഥ വരെ ചികിത്സിച്ച് ഭേദപ്പെടുത്തുവെന്ന് അവകാശം ഉന്നയിച്ചിരുന്ന ആളാണെന്നും ഷെരീഫ് വ്യക്തമാക്കുന്നു.
