പ്രേമത്തിന് കണ്ണും മൂക്കുമില്ലെന്നും പ്രണയം യഥാര്ത്ഥമാണെങ്കില് അതു സത്യമാകുക തന്നെ ചെയ്യുമെന്നുമാണ് ചൊല്ല്. അതേസമയം തന്നെ ആള്ക്കാര്ക്ക് തമ്മില് പ്രണയിക്കാനും കണ്ടുമുട്ടാനും ഡേറ്റിംഗ് വെബ്സൈറ്റുകള് ധാരാളമുള്ള ആധുനിക കാലത്ത് വ്യാജ പ്രൊഫൈലുകള് ഉപയോഗിച്ച് ചതിക്കുന്നവരും ചതിക്കപ്പെടുന്നവരും ഏറെയുണ്ട് താനും. ഇങ്ങിനെ ഡേറ്റിംഗ് വെബ്സൈറ്റില് യുവകോമളനായ സിനിമാനടന്റെ ചിത്രം ഉപയോഗിച്ച് തട്ടിപ്പ് നടത്തി മാസങ്ങളോളം പ്രണയിച്ച വൃദ്ധനെ ഒടുവില് യുവതി കണ്ടെത്തുകയും അയാള് പ്രൊഫൈലില് ഉപയോഗിച്ച യഥാര്ത്ഥ സിനിമാനടനെ കണ്ടെത്തി അയാളെ ജീവിത പങ്കാളിയാക്കി മാറ്റുകയും ചെയ്തു.
സത്യം കണ്ടെത്തിയതിന് പിന്നാലെ തന്നെ 55 കാരന് ഉപയോഗിച്ച സുന്ദരനായ മോഡലിനെ കണ്ടെത്താനും ചിത്രം ഉപയോഗിച്ച് ആള്ക്കാരെ പറ്റിക്കുന്നെന്ന വിവരത്തില് മോഡലിന് മുന്നറിയിപ്പ് നല്കാനും ഒരുങ്ങിയതോടെയാണ് കഥമാറിയത്്. ഇക്കാര്യം ധരിപ്പിക്കാന് യഥാര്ത്ഥ യുവാവിനെ കണ്ടെത്തിയ യുവതി അയാളുമായി പിന്നീട് ഭ്രാന്തമായ പ്രണയത്തില് വീണുപോകുകയായിരുന്നു. ഇതു കേട്ടാല് ഒരു പക്ഷേ നിങ്ങള്ക്ക് ഒരു സിനിമാക്കഥ പറയുകയാണോ എന്ന് തോന്നിയേക്കാം. എന്നാല് സംഭവം സത്യമാണ്. കഥയിലെ നായിക എമ്മാപെരിസണ് എന്ന ലണ്ടന്കാരി, നായകന് തുര്ക്കി സിനിമാതാരം ആദം ഗുസല്, വില്ലന് അലന് സ്റ്റാന്ലി എന്ന 55 കാരനും.
ആദം ഗുസലിന്റെ ചിത്രം ഉപയോഗിച്ച് അലന് സ്റ്റാന്ലി റോണി എന്ന് വിളിക്കുന്ന റൊണാള്ഡോ സയക്ളൂന എന്ന പേരില് ഡേറ്റിംഗ് വെബ്സൈറ്റില് തുടങ്ങിയ വ്യാജ പ്രൊഫൈലില് എമ്മ കൊത്തിയത് മുതലാണ് കഥയുടെ തുടക്കം. വെറും പ്രൊഫൈല്ചിത്രം മാത്രം കണ്ട് പ്രണയിച്ച എമ്മയുമായി റോണോ എന്ന അലന് സ്റ്റാന്ലി സന്ദേശം കൈമാറുകയും ടെലിഫോണ് ചാറ്റ് നടത്തുകയും ചെയ്തത് വര്ഷങ്ങളോളമായിരുന്നു. എമ്മ സാമൂഹ്യമാധ്യമങ്ങളില് സജീവമായിരുന്ന 2015 ലായിരുന്നു. പ്രണയിക്കാനും പങ്കുവെയ്ക്കാനും ഒരാളെത്തേടി എട്ടുമാസത്തോളം സൂസ്ക്ക് എന്ന ഡേറ്റിംഗ് സൈറ്റില് തെരഞ്ഞ എമ്മ ആകസ്മികമായിട്ടാണ് റൊണാള്ഡോ സയക്ളൂനയെ വിളിച്ചു. 20 കളില് നില്ക്കുന്ന ദീര്ഘകായനായ കറുത്ത സുന്ദരനെയായിരുന്നു ഇയാളുടെ പ്രൊഫൈല് പിക്ചറില് കണ്ടിരുന്നത്. പകുതി ഇറ്റാലിയനായ ഇയാള് സമാന പ്രായക്കാരനും വെസ്റ്റ് മിഡ്ലാന്റുകാരനുമായിരുന്നു.
ആ വര്ഷം ഒക്ടോബര് മുതല് ഇരുവരും ഓണ്ലൈന് വഴി ചാറ്റിംഗ് പതിവാക്കി. ആദ്യം സന്ദേശമായും പിന്നീട് ചാറ്റായും ഒടുവില് ടെലഫോണിലുമായി തുടങ്ങിയ സംസാരം പതിയെ പ്രണയമായി എമ്മയില് വളര്ന്നു. റൂണിയെ കാണാതെ ഒരു മിനിറ്റ് പോലും തള്ളിനീക്കാന് കഴിയാത്ത അവസ്ഥ. ജോലിയെക്കുറിച്ചും വീട്ടുകാരെക്കുറിച്ചും തനിക്ക് ഏറ്റവും പ്രിയപ്പെട്ട അനന്തിരവളെ കുറിച്ചും തന്റെ കുടുംബത്തെക്കുറിച്ചുമെല്ലാം എമ്മ അയാളുമായി വിശേഷം പങ്കുവെച്ചു. അതേസമയം തമ്മില് പരസ്പരം കാണാന് അവസരം കിട്ടിയിരുന്നില്ല.
എല്ലായ്പ്പോഴും പരസ്പരം കാണാന് ശ്രമിക്കുമ്പോള് റോണി ഓരോ ഒഴിവ് കഴിവ് പറയുകയും ചെയ്യുമായിരുന്നു. പരസ്പരം കണ്ടുകൊണ്ടുള്ള നേര്ക്ക്നേരെയുള്ള വീഡിയോ കോള് പോലും കാമുകന് അവഗണിക്കുന്നുണ്ടോ എന്നൊരു സംശയം. ഓരോ തവണ വിളിക്കുമ്പോഴും അതൊക്കെ പിള്ളേരുകളിയല്ലേ എന്നായിരുന്നു അയാളുടെ വാദം. ഡേറ്റിംഗ് വെബ്സൈറ്റില് ലതര് ജാക്കറ്റും സണ്ഗ്ളാസ് വെച്ചതുമായ വേഷവിതാനങ്ങളിലും പലതരം ഫോട്ടോകള് പ്രത്യക്ഷപ്പെടാന് തുടങ്ങി. ഓരോ ഇഞ്ചിലും അയാള് സിനിമാതാരത്തെപ്പോലെയാണ് ഇരുന്നത്. ഇതോടെ അദ്ദേഹത്തെ കാണാനുള്ള അഭിവാഞ്ജ എമ്മയില് ഇരട്ടിച്ചു. എന്നാല് ഓരോ തവണ ഡിന്നറിന്റെ കാര്യം പറയുമ്പോഴൂം ഓരോ ഒഴിവ്കഴിവ് പറഞ്ഞ് റൂണി മാറാന് തുടങ്ങി. ഷോപ്പ് ഫിറ്ററായി ജോലി ചെയ്യുന്ന തനിക്ക് യൂറോപ്പ് മുഴുവന് സഞ്ചരിക്കേണ്ടി വരുമെന്നായിരുന്നു ന്യായീകരണം.
എപ്പോ ഫ്രീടൈം കിട്ടിയാലും സ്പെയിനില് മാതാപിതാക്കള്ക്ക് ഒപ്പമായിരിക്കുമെന്നും പറഞ്ഞു. ആഴ്ചാവസാനം കാണാമെന്ന് പറയുമായിരുന്നെങ്കിലും ഒന്നും നടപ്പായില്ല. പരസ്പരം കാണാതെ തന്നെ ഇരുവരും ഐ ലവ് യൂ പറയുകയും ഫോണിലൂടെ ചുംബിക്കുകയും ചെയ്തു. പ്രണയം ഭ്രാന്തമായിരുന്നെന്നും ഈ സമയത്ത് അയാള് തനിക്ക് 300 ലധികം ഫോട്ടോഗ്രാഫുകളാണ് അയച്ചുതന്നതെന്ന് എമ്മ പറഞ്ഞു. . ദിവസവും പല തവണ സംസാരിച്ചു. സമയാസമയങ്ങളില് സന്ദേശങ്ങളും അയച്ചുകൊണ്ടിരുന്നു. ജോലി സമയത്തിന് ശേഷം സുഹൃത്തുക്കളെ കാണുന്ന സമയം എമ്മയ്ക്ക് കുറഞ്ഞുകുറഞ്ഞു വന്നു. തന്റെ പ്രണയം എമ്മ ആകെ അറിയിച്ചത് ഫ്രാന്സിലുള്ള ഇരട്ട സഹോദരി ഗേളിയെ മാത്രമായിരുന്നു.
ഇതിനിടയില് സ്റ്റാന്ലി എമ്മയുടെ ഏറ്റവും മികച്ച കൂട്ടുകാരനായി അവര്ക്ക് ആത്മവിശ്വാസം നല്കിക്കൊണ്ടിരുന്നു. ദിവസവും നടത്തിയിരുന്ന മൂന്ന് മണിക്കൂര് നീണ്ട ട്രെയിന് യാത്രഒഴിവാക്കാനായി വീടിനടുത്ത് ജോലി കണ്ടുപിടിക്കാന് അയാള് അവളെ നിര്ബ്ബന്ധിപ്പിച്ചു. 2016 ജനുവരിയില് എമ്മ അതു ചെയ്യുകയും ഒരു ഇറ്റാലിയന് റസ്റ്റോറന്റില് അസിസ്റ്റന്റ് മാനേജര് പദവി നേടുകയും ചെയ്തു. ഇവിടം മുതലാണ് കാര്യങ്ങളുടെ വ്യക്തത മറനീക്കി പുറത്തുവരാന് ആരംഭിച്ചത്.
ഡേറ്റിംഗ് വെബ്സൈറ്റുകളില് പ്രണയിക്കാന് ആള്ക്കാര് വ്യാജ ഓണ്ലൈന് ഐഡികള് സൃഷ്ടിക്കുന്ന കാലമായിരുന്നു അത്. പ്രാണപ്രിയനെക്കുറിച്ച് മാത്രം എമ്മ ചിന്തിക്കുന്ന അവസ്ഥയില് എത്തിയപ്പോഴായിരുന്നു ഒരു കുട്ടിയുടെ പിതാവും വിവാഹമോചിതനും സ്റ്റാന്ഫോര്ഡുകാരനുമായ റൂണിയെന്ന യഥാര്ത്ഥ അലന് സ്റ്റാന്ലി പുറത്തു വന്നത്.
കബളിപ്പിക്കപ്പെട്ടതിന്റെ കഥ എമ്മ ആദ്യം പറഞ്ഞതും ഗേളിയോടായിരുന്നു. സഹോദരിയെ വിളിച്ച് കരഞ്ഞുകൊണ്ട് കബളിപ്പിക്കപ്പെട്ടതിന്റെ കഥകള് ആദ്യം മുതല് പറഞ്ഞു. ഈ രീതിയില് വിഡ്ഡിയാക്കപ്പെട്ടത് ഏറെ വേദനിപ്പിച്ചു. എന്നാല് കൂട്ടത്തില് തന്നെ മറ്റൊരു സ്ത്രീയ്ക്കും സ്റ്റാന്ലിയില് നിന്നും ഈ ഗതി വരരുതെന്നും ഉറപ്പിച്ച എമ്മ സാക്ഷാല് ആദത്തിന് താങ്കളുടെ ഫോട്ടോ അലന് സ്റ്റാന്ലി എന്നയാള് ദുരുപയോഗം ചെയ്ത് വ്യാജ ഡേറ്റിംഗ് പ്രൊഫൈല് സൃഷ്ടിക്കുന്നതായി ഒരു അറിയിപ്പ് ഫേസ്ബുക്ക് വഴി നല്കി.
ഇത്തരത്തില് ഒരു മെസേജ് നേരത്തേയും ആദത്തിന് കിട്ടിയിരുന്നതിനാല് ഇത്തവണ അയാള് പ്രതികരിച്ചു. ഇതോടെ അലന് സ്റ്റാന്ലി തന്നെ വഞ്ചിച്ച കഥയും എമ്മ പറഞ്ഞു. താന് ചിത്രം കണ്ടു പ്രണയിച്ച കഥ പറയാന് എമ്മ വീഡിയോ കോള് ആദത്തോട് ആവശ്യപ്പെട്ടു. ആദത്തിന്റെ യഥാര്ത്ഥ സുന്ദരമായ മുഖം അയാളുടെ ഐഫോണ് വഴി എമ്മ ആദ്യമായി നേരിട്ടുകണ്ടു. ചിരിച്ചുകൊണ്ട് തലമുടി ഇടയ്ക്കിടെ കോതുന്ന കറുത്ത കണ്ണുകളും വെളുത്ത പല്ലുകളുമുള്ള ആദത്തെ കണ്ടപ്പോള് എമ്മയ്ക്ക് പിടിച്ചു നില്ക്കാനായില്ല. നിങ്ങളായിരുന്നോ ഇതെന്ന ചോദിച്ച് ഒരേസമയം അവര് കരയുകയും ചിരിക്കുകയും ചെയ്തു.
ഇതിനിടയില് ആദത്തിന്റെ ചിത്രം വെച്ച് താന് നേരിട്ട പ്രണയതട്ടിപ്പിന്റെ വേദന മുഴുവന് ആദത്തോട് അവള് പറയുകയും കരയുകയും ചെയ്തു. മാസങ്ങളോളം നീണ്ട വഞ്ചനയുടെ ആ കഥപറച്ചിലിലെ ആത്മാര്ത്ഥത പക്ഷേ പതിഞ്ഞത് ആദത്തിന്റെ ഹൃദയത്തിലായിരുന്നു. ഒരു യഥാര്ത്ഥ പ്രണയത്തിന്റെ തീപ്പൊരിയാണ് ഇവിടെ വീണത്. നാടക സ്കൂളിലെ പഠനം കഴിഞ്ഞ നാട്ടിലേക്ക് മടങ്ങാന് ഒരുങ്ങുന്നതിന്റെ ഭാഗമായി മാഞ്ചസ്റ്ററില് കുറേക്കാലമായി താമസമാക്കിയിരുന്ന ആദവും തമ്മിലുള്ള എമ്മയുടെ യഥാര്ത്ഥ കൂടിക്കാഴ്ച ഇവിടെ തീരുമാനിക്കപ്പെടുകയും ചെയ്തു. ലണ്ടനില് എത്തിയ എമ്മ കഴിഞ്ഞവര്ഷം ഏപ്രില് 1 ന് ഹീത്രൂ വിമാനത്താളവത്തില് നിന്നും ആദ്യമായി ആദത്തെ കണ്ടെത്തി. ഒടുവില് താന് തന്റെ യഥാര്ത്ഥ റൂണിയെ കാണാന് പോകുന്നെന്നായിരുന്നു ഇതിന് സ്റ്റാന്ലിക്ക് എമ്മ അയച്ച സന്ദേശം.
പ്രവേശന ഗേറ്റിലൂടെ ആദം നടന്നടുക്കുമ്പോള് എമ്മയുടെ നെഞ്ചില് പെരുമ്പറ കൊട്ടി. തന്റെ സുന്ദരനെ കണ്ടെത്തിയ നിമിഷത്തെക്കുറിച്ച് വിവരിക്കാന് കഴിയുമായിരുന്നില്ല എന്നായിരുന്നു എമ്മ പറഞ്ഞത്. പരസ്പരം ആലിംഗനം ചെയ്ത ശേഷം ചുംബിച്ചു. ഏതാനും നാള് എമ്മയുടെ സോഫയില് കിടന്നുറങ്ങിയ ശേഷം ഒടുവില് ഏറെ താമസിയാതെ ഇരുവരും കിടക്ക പങ്കുവെയ്ക്കുകയും ചെയ്തു. തുടക്കത്തില് ഒന്നു രണ്ടു തവണ റൂണി എന്ന് വിളിച്ച താന് ഇപ്പോള് ആദം എന്ന് തിരുത്തിയിരിക്കുകയാണെന്നും എമ്മ പറയുന്നു.
ഒട്ടേറെ വളവുകളും തിരിവുകളും ഉണ്ടായെങ്കിലൂം എമ്മയുടെ യഥാര്ത്ഥ പ്രണയം ഒടുവില് പൂവണിയുക തന്നെ ചെയ്തു. എന്നിരുന്നാലും ആദം യൂറോപ്യന് യൂണിയനില്പെട്ട രാജ്യത്തുള്ള ആള് കല്ലാത്തതിനാല് അയാള്ക്ക് എല്ലാ ആറുമാസത്തിലും ഇസ്താംബൂളിലേക്ക് മടങ്ങേണ്ടതുണ്ട്. ഒക്ടോബറില് വീട്ടിലേക്ക് പോയെങ്കിലും ഒമ്പതു മാസമായി ഇരുവരും പിരിയാത്ത ഇണക്കുരുവികളാണ്്. അവര് ജോലി ചെയ്യുമ്പോള് അയാള് തിരക്കഥ യെഴുതും. മാര്ച്ചില് ഏതാനും ആഴ്ച ചെലവഴിക്കാന് തുര്ക്കിയിലേക്ക് പോകുന്ന കൂട്ടത്തില് ആദത്തിനൊപ്പം വീട്ടുകാരെ കാണാന് ഒരുങ്ങുകയാണ് എമ്മ.
