ന്യൂഡല്ഹി: ആം ആദ്മി പാര്ട്ടിക്ക് തിരിച്ചടി. പാര്ട്ടിയുടെ 20 എം.എല്.എമാരെ അയോഗ്യരാക്കുന്നതിനുള്ള തെരഞ്ഞെടുപ്പ് കമ്മീഷന്റെ ശിപാര്ശയില് രാഷ്ട്രപതി രാംനാഥ് കോവിന്ദ് ഒപ്പുവച്ചു. ഇതോടെ 20 എം.എല്.എമാരും അയോഗ്യരായി. ആറ് മാസത്തിനകം 20 മണ്ഡലങ്ങളും ഉപതെരഞ്ഞെടുപ്പിലേക്ക് നീങ്ങും. രാഷ്ട്രപതി ഒപ്പുവച്ചതോടെ ഡല്ഹി നിയമസഭയില് ആം ആദ്മി പാര്ട്ടിയും അംഗബലം 46 ആയി ചുരുങ്ങി.
തങ്ങളുടെ ഭാഗം കേള്ക്കാതെയാണ് എം.എല്.എമാരെ അയോഗ്യരാക്കിയതെന്ന് ആം ആദ്മി പാര്ട്ടി ആരോപിച്ചിരുന്നു. തങ്ങളുടെ ഭാഗം കൂടി കേള്ക്കണമെന്ന് ആം ആദ്മി പാര്ട്ടി രാഷ്ട്രപതിയോട് അഭ്യര്ത്ഥിച്ചിരുന്നു. തെരഞ്ഞെടുപ്പ് കമ്മീഷന്റെ നടപടി ഭരണഘടനാ വിരുദ്ധവും ജനാധിപത്യ വിരുദ്ധവുമാണെന്ന് ആം ആദ്മി പാര്ട്ടി ആരോപിച്ചിരുന്നു. എന്നാല് പാര്ട്ടിയുടെ വാദം രാഷ്ട്രപതി അംഗീകരിച്ചില്ല.
ആം ആദ്മി പാര്ട്ടിയുടെ 20 എം.എല്.എമാരെ അയോഗ്യരാക്കുന്നതിനുള്ള ശിപാര്ശ വെള്ളിയാഴ്ചയാണ് തെരഞ്ഞെടുപ്പ് കമ്മീഷന് രാഷ്ട്രപതിക്ക് കൈമാറിയത്. 20 എം.എല്.എമാര് ഇരട്ടപദവി വഹിച്ചുവെന്ന് ചൂണ്ടിക്കാട്ടിയായരുന്നു ശിപാര്ശ. എം.എല്.എമാരെ മന്ത്രിമാരുടെ പാര്ലമെന്ററി സെക്രട്ടറിമാരായി നിയമിച്ചതാണ് തിരിച്ചടിയായത്. പാര്ലമെന്ററി സെക്രട്ടറി പദവി ഇരട്ടപദവിയാണെന്ന് ആരോപിച്ച് അഭിഭാഷകനായ പ്രശാന്ത് പട്ടേല് ഡല്ഹി ഹൈക്കോടതിയെ സമീപിച്ചിരുന്നു.
പിന്നീട് തങ്ങള്ക്കെതിരായ നിയമനടപടികള് റദ്ദാക്കണമെന്ന് ആവശ്യപ്പെട്ട് എം.എല്.എമാര് 2017 ഓഗസ്റ്റില് കോടതിയെ സമീപിച്ചുവെങ്കിലും ഫലമുണ്ടായില്ല. കമ്മീഷന്റെ നടപടിക്കെതിരെ ആം ആദ്മി പാര്ട്ടി ഡല്ഹി ഹൈക്കോടതിയെ സമീപിച്ചിട്ടുണ്ട്. അയോഗ്യരാക്കിയ നടപടി സംബന്ധിച്ച് വിശദാംശങ്ങള് സമര്പ്പിക്കാന് തെരഞ്ഞെടുപ്പ് കമ്മീഷന്റെ അഭിഭാഷകനോട് കോടതി നിര്ദ്ദേശിച്ചു. തിങ്കളാഴ്ച കേസ് പരിഗണിക്കാനിരിക്കെയാണ് തെരഞ്ഞെടുപ്പ് കമ്മീഷന്റെ ശിപാര്ശയില് രാഷ്ട്രപതി ഒപ്പുവച്ചത്.
