പാലക്കാട്: അട്ടപ്പാടിയിലെ ആദിവാസി യുവാവ് ആള്ക്കൂട്ടത്തിന്റെ മര്ദ്ദനമേറ്റ് മരിച്ച സംഭവത്തില് സാമൂഹിക മാധ്യമങ്ങളിലൂടെയുള്ള അപവാദപ്രചാരണങ്ങള്ക്കെതിരെ ശക്തമായ നടപടിയെന്ന് മുഖ്യമന്ത്രി പിണറായി വിജയന്. പ്രതികള്ക്ക് തക്കശിക്ഷ വാങ്ങിക്കൊടുക്കുന്നതിനുള്ള നടപടികള് സര്ക്കാരിന്റെ ഭാഗത്തു നിന്നുണ്ടാവും.
നിയമപരമായി ചെയ്യാവുന്നതൊക്കെ ചെയ്തുകൊണ്ടിരിക്കുകയാണെന്ന് കുടുംബാംഗങ്ങളെ അറിയിച്ചതായും മുഖ്യമന്ത്രി ഫേസ്ബുക്ക് പോസ്റ്റില് വ്യക്തമാക്കി.
പോസ്റ്റിന്റെ പൂര്ണ്ണരൂപം:
''അട്ടപ്പാടിയില് മര്ദ്ദനമേറ്റ് മരിച്ച മധുവിന്റെ വീട് സന്ദര്ശിച്ചു. കുടുംബാംഗങ്ങളെ ആശ്വസിപ്പിച്ചു. സംഭവത്തില് അന്വേഷണം കുറ്റമറ്റ രീതിയില് മുന്നോട്ടു പോകുന്നുണ്ട്. പ്രതികള്ക്ക് തക്കശിക്ഷ വാങ്ങിക്കൊടുക്കുന്നതിനുള്ള നടപടികള് സര്ക്കാരിന്റെ ഭാഗത്തു നിന്നുണ്ടാവും.
നിയമപരമായി ചെയ്യാവുന്നതൊക്കെ ചെയ്തുകൊണ്ടിരിക്കുകയാണെന്നന്ന് കുടുംബാംഗങ്ങളെ അറിയിച്ചു. സാമൂഹിക മാധ്യമങ്ങള് വഴി നടത്തുന്ന അപവാദപ്രചാരണങ്ങള്ക്കെതിരെ ശക്തമായ നടപടി സ്വീകരിക്കും.
ചിണ്ടക്കി ഊരിലേക്കുളള റോഡിന്റെ ശോചനീയാവസ്ഥ പരിഹരിക്കും. കുടിവെളള പ്രശ്നം പരിഹരിക്കാനുള്ള നടപടികളുമെടുക്കും. അമ്മ മല്ലി നല്കിയ നിവേദനം സ്വീകരിച്ചു.''
