തിരുവനന്തപുരം: സംസ്ഥാന ബജറ്റിലെ പുതുക്കിയ നികുതി നിര്ദ്ദേശങ്ങള് ഏപ്രില് ഒന്നിന് നിലവില് വരും. മദ്യത്തിന്റെ വിലയും ഭൂമിയുടെ ന്യായവിലയും കൂടും. ഭൂമിയുടെ ന്യായവില 10 ശതമാനം വര്ദ്ധിക്കും. 400 രൂപ വിലയുള്ള ഇന്ത്യന് നിര്മ്മിത വിദേശ മദ്യത്തിന്റെ വില്പ്പന നികുതി 200 ശതമാനമായി വര്ധിപ്പിച്ചിട്ടുണ്ട്. 125 ശതമാനത്തില് നിന്നുമാണ് ഈ വര്ധന. 400 രൂപയ്ക്ക് മുകളില് വിലയുള്ള മദ്യത്തിന്റെ വിലയില് 210 ശതമാനവും വര്ധനവുണ്ടാകും.
ബിയറിന്റെ വിലയില് നികുതി 70 ശതമാനത്തില് നിന്ന് 100 ശതമാനമായി ഉയരും. ഇതോടെ വിവിധ ബ്രാന്ഡുകള്ക്ക് ഏപ്രില് ഒന്നു മുതല് വിവിധ ബ്രാന്ഡുകള്ക്ക് ഇരുപത് രൂപ വരെ വില വര്ധിക്കും. ബിവറേജസ് കോര്പ്പറേഷന് വഴി വിദേശ നിര്മ്മിത വിദേശമദ്യം വില്ക്കാനും അനുമതി നല്കിയിട്ടുണ്ട്. എന്നാല് ടെന്ഡര് നടപടികള് പൂര്ത്തിയാകാത്തതിനാല് വിദേശ നിര്മ്മിത വിദേശമദ്യം ഔട്ട്ലെറ്റുകളില് എത്താന് വൈകും.
ഭൂമിയുടെ ന്യായവില പത്ത് ശതമാനം വര്ധിക്കും. അടുത്ത വര്ഷം മുതല് ന്യായവില സമ്പൂര്ണമായി പരിഷ്കരിക്കാനാണ് സര്ക്കാര് തീരുമാനം. കേരള ഭൂനികുതി ഓര്ഡിനന്സ് 2014 പ്രകാരമുള്ള വര്ധിപ്പിച്ച നികുതി നിരക്ക് ഏപ്രില് ഒന്നു മുതല് പുനഃസ്ഥാപിക്കപ്പെടും. കുടുംബാംഗങ്ങള് തമ്മിലുള്ള ഭൂമിയിടപാടുകളില് ഭൂമിയുടെ ന്യായവില ആറരലക്ഷം രൂപ വരെയുള്ള ഇടപാടുകള്ക്ക് മുദ്രപത്രനിരക്ക് 1000 രൂപയും അത് കഴിഞ്ഞുള്ളവയ്ക്ക് ഓരോ ലക്ഷത്തിനും 150 രൂപ വീതം നിരക്ക് വര്ധിക്കും.
വില്ലേജ് ഓഫീസ്, കൃഷി ഓഫീസ്, ആശുപത്രി തുടങ്ങി എല്ലാ സര്ക്കാര് സേവനങ്ങള്ക്കും അഞ്ച് ശതമാനം വര്ധനവ് നിലവില് വരും. സബ് രജിസ്ട്രാര് ഓഫീസുകളിലെ സാക്ഷ്യപ്പെടുത്തിയ ആധാര പകര്പ്പുകള്ക്ക് 10 പേജ് കഴിഞ്ഞുള്ള ഓരോ പേജിനും അഞ്ച് രൂപ അധികം ഫീസ് നല്കണം.
