യുഡിഎഫ് യോഗത്തിൽ ‘ഓപ്പറേഷൻ തൂഫാൻ’ ചർച്ച; പി എം ശ്രീയും മദ്യനയവും പ്രധാന അജണ്ട

യുഡിഎഫ് യോഗത്തിൽ ‘ഓപ്പറേഷൻ തൂഫാൻ’ വിഷയവും വിശദമായി ചർച്ചയായി. സർക്കാരിന് മാതൃകയായ പദ്ധതിയെന്ന വിലയിരുത്തലാണ് നേതാക്കൾ മുന്നോട്ടുവെച്ചത്. ഘടകകക്ഷി നേതാക്കളടക്കം ആഭ്യന്തര മന്ത്രിയെ പേരെടുത്ത് അഭിനന്ദിക്കുകയും ചെയ്തു.

സംസ്ഥാനത്ത് വീര്യം കുറഞ്ഞ മദ്യം വിതരണം ചെയ്യുന്നതുമായി ബന്ധപ്പെട്ട് ശുപാർശകൾ നൽകാൻ യുഡിഎഫ് ഉപസമിതി രൂപീകരിക്കാനും യോഗം തീരുമാനിച്ചു. ബജറ്റിൽ ഇത്തരം മദ്യത്തിന് കുറഞ്ഞ നികുതി നിശ്ചയിച്ചതിനെ തുടർന്നുണ്ടായ വിവാദത്തിന്റെ പശ്ചാത്തലത്തിൽ, വിഷയം കൂടുതൽ പഠിച്ച ശേഷമാകും അന്തിമ തീരുമാനമെടുക്കുക.

രണ്ടാം ഭൂപരിഷ്‌കരണവും സ്വകാര്യ നിക്ഷേപവുമായി ബന്ധപ്പെട്ട നിലപാടുകളും യോഗത്തിൽ ചർച്ചയായി. പി എം ശ്രീ പദ്ധതിയിൽ ഇടത് സർക്കാർ ധാരണാപത്രത്തിൽ ഒപ്പുവെച്ച് ഫണ്ട് സ്വീകരിച്ചതിനാൽ പദ്ധതിയിൽ നിന്ന് പിന്മാറാനാകില്ലെന്ന വിലയിരുത്തലും യോഗത്തിലുണ്ടായി. ഇതുസംബന്ധിച്ച് മന്ത്രിസഭാ ഉപസമിതി സമർപ്പിക്കുന്ന റിപ്പോർട്ട് യുഡിഎഫ് വീണ്ടും പരിശോധിക്കും.

ബോർഡ്-കോർപറേഷൻ സ്ഥാനവിഭജനം സംബന്ധിച്ച് കോൺഗ്രസ് മറ്റ് ഘടകകക്ഷികളുമായി തിങ്കളാഴ്ച മുതൽ ചർച്ച നടത്തും. മുതിർന്ന നേതാക്കൾക്ക് കാബിനറ്റ് റാങ്കിലുള്ള പദവികൾ നൽകുന്ന കാര്യം അടുത്ത മാസം ആദ്യം തീരുമാനിക്കുമെന്ന് മുഖ്യമന്ത്രി യോഗത്തെ അറിയിച്ചു. വീര്യം കുറഞ്ഞ മദ്യവുമായി ബന്ധപ്പെട്ട ഉപസമിതി റിപ്പോർട്ട് ഉൾപ്പെടെയുള്ള വിഷയങ്ങൾ ഓണത്തിന് ശേഷം ചേരുന്ന വിശാല യുഡിഎഫ് യോഗത്തിൽ വീണ്ടും വിലയിരുത്തും.