കോഴിക്കോട്: നിയമം അട്ടിമറിച്ച് ബന്ധുനിയമനം നടത്തിയെന്ന ആരോപണം നേരിടുന്ന മന്ത്രി കെ.ടി ജലിലിന് കരിങ്കൊടി. കരിങ്കൊടി കാണിച്ച അഞ്ച് യൂത്ത് ലീഗ് പ്രവര്ത്തകരെ പോലീസ് കസ്റ്റഡിയിലെടുത്തിട്ടുണ്ട്. മാവേലി എക്സ്പ്രസില് മന്ത്രി തലശ്ശേരി റെയില്വെ സ്റ്റേഷനില് ഇറങ്ങുമ്പോഴായിരുന്നു പ്രതിഷേധവുമായെത്തിയ യൂത്ത് ലീഗ് പ്രവര്ത്തകര് മന്ത്രിയെ കരിങ്കൊടി കാണിച്ചത്. ജലീല് രാജിവക്കുക എന്ന ആവശ്യമുന്നയിച്ച് യൂത്ത് ലീഗ് സംസ്ഥാനത്ത് കരിദിനം ആചരിക്കാന് അഹ്വാനം ചെയ്തിട്ടുണ്ട്.
സംസ്ഥാന മൈനോരിറ്റി ഡെവലപ്മെന്റ് ഫിനാന്സ് കോര്പ്പറേഷനില് യോഗ്യതയില് ഇളവ് നല്കി മന്ത്രിയുടെ പിതൃസഹോദര പുത്രനായ കെ.ടി അദീപിനെ ജനറല് മാനേജരായി നിയമിച്ചെന്നാണ് ആരോപണം. സര്ക്കാര് തസ്തികയില് മന്ത്രി നിയമിച്ച അദീബ് സ്വകാര്യ ബാങ്ക് ജീവനക്കാരനാണ്. സാധാരണ ഡെപ്യൂട്ടേഷന് വഴി നികത്തിയിരുന്ന നിയമനമാണ് ഇപ്പോള് നിയമം അട്ടിമറിച്ച് അദീപിന് നല്കിയത്.
കെ.ടി ജലീലിനെതിരായ പ്രതിഷേധം യൂത്ത് ലീഗ് വ്യാപിപ്പിക്കാനൊരുങ്ങുകയാണ്. യോഗ്യതയുണ്ടായിട്ടും നിയമനം ലഭിക്കാത്തവരെ മുന്നിര്ത്തി കോടതിയെ സമീപിക്കുമെന്നും യൂത്ത് ലീഗ് ജനറല് സെക്രട്ടറി പി.കെ ഫിറോസ് പറഞ്ഞു.
മന്ത്രി കെ ടി ജലീലിനെതിരായ ബന്ധു നിയമന ആരോപണം പാര്ട്ടി പരിശോധിക്കുമെന്ന് കോടിയേരി ബാലകൃഷ്ണന് ഇന്നലെ വ്യക്തമാക്കിയിരുന്നു. ഇന്നുചേരുന്ന സിപിഐഎം സംസ്ഥാന സെക്രട്ടറിയേറ്റ് ബന്ധുനിയമനത്തിലെ ആരോപണങ്ങള് പരിശോധിക്കുമെന്നാണ് അറിയുന്നത്.
അതേസമയം ബന്ധുനിയമന വിവാദവുമായി ബന്ധപ്പെട്ട് മുഖ്യമന്ത്രിയോ സംസ്ഥാന സെക്രട്ടറി കൊടിയേരി ബാലകൃഷ്ണനോ വിശദീകരണം ആവശ്യപ്പെട്ടിട്ടില്ലെന്ന് കുറ്റാരോപിതനായ കെ.ടി ജലീല് പറഞ്ഞു
കുറ്റിപ്പുറത്തുനിന്ന് ജയിച്ചതു മുതല് ലീഗ് തന്നെ വേട്ടയാടുകയാണെന്നും. കൊടിയേരിയെ കണ്ടത് സ്വാഭാവികമായ കൂടിക്കാഴ്ച്ചകള്ക്കായിരുന്നുവെന്നും മന്ത്രി പറഞ്ഞു. എ.കെ.ജി സെന്ററില് കോടിയേരിയും കെടി ജലീലും അരമണിക്കൂറോളം നീണ്ട കൂടിക്കാഴ്ച്ചകളില് ഏര്പ്പെട്ടിരുന്നു.
