തിരുവനന്തപുരം: എന്ഡിഎയില് നിന്നും തെറ്റിയ സി.കെ.ജാനുവും ഗോത്രമഹാസഭയും സിപിഐയിലേക്ക് അടുക്കുന്നതായി സൂചന. ഇടതുമുന്നണി പ്രവേശനം ലക്ഷ്യമിട്ട് ജാനു സിപിഐ സംസ്ഥാന സെക്രട്ടറി കാനം രാജേന്ദ്രനുമായി കൂടിക്കാഴ്ച നടത്തിയതായിട്ടാണ് വിവരം. കഴിഞ്ഞ മാസം ശബരിമല സ്ത്രീ പ്രവേശന വിഷയത്തിലാണ് എന്ഡിഎയ്ക്കൊപ്പമില്ലെന്ന് പ്രഖ്യാപിച്ച് അവര് മുന്നണി വിട്ടത്.
എന്ഡിഎ വിട്ടതിന് പിന്നാലെ മറ്റു മുന്നണികളില് പ്രവേശിക്കാനുള്ള സാധ്യത ജാനുവിന്റെ ജനാധിപത്യ രാഷ്ട്രീയ സഭ തേടിയിരുന്നു. ഇതിന്റെ ഭാഗമായിട്ടായിരുന്നു കാനം രാജേന്ദ്രനുമായി തിരുവനന്തപുരത്ത് കൂടിക്കാഴ്ച നടത്തിയത്. സിപിഐ മുന്കയ്യെടുത്തായിരുന്നു കൂടിക്കാഴ്ച നടത്തിയത്. അതിന് ശേഅം സിപിഐ സംസ്ഥാന കമ്മിറ്റി ചേര്ന്ന് തീരുമാനമെടുത്ത് അറിയിക്കാമെന്ന് കാനം വ്യക്തമാക്കുകയും ചെയ്തിട്ടുണ്ടെന്നാണ് വിവരം.
അതേസമയം സിപിഎമ്മുമായി ജാനുവിന് നല്ല ബന്ധമല്ല ഉള്ളത്. ആദിവാസി വിഭാഗത്തില് നിന്നുള്ള നേതാവായി വളര്ന്നുവന്ന ജാനുവിനെ തുടക്കത്തില് സിപിഎമ്മായിരുന്നു പിന്തുണച്ചിരു്നത്. ഇടതുപക്ഷവുമായി ബന്ധപ്പെട്ടുള്ള ഇവരുടെ പ്രവര്ത്തനങ്ങള് മുത്തങ്ങ സമരത്തിന് ശേഷമാണ് തകര്ന്നത്. പിന്നീട് 2006, 2011 നിയമസഭ തെരഞ്ഞെടുപ്പുകളില് ആദിവാസി ഗോത്ര മഹാസഭയുടെ കീഴില് യുഡിഎഫിന് പിന്തുണ നല്കി.
ഇതിന്റെ പേരില് പിണറായി വിജയന് ജാനുവിനെതിരെ തിരിയുകയും വിഎസ് കൂടെ നിര്ത്താന് ശ്രമിക്കുകയും ചെയ്തു. പിന്നീട് യുഡിഎഫുമായുള്ള ബന്ധം കൂടി തെറ്റിയതോടെ 2016ല് പുതിയ പാര്ട്ടി രൂപീകരിക്കുകയായിരുന്നു. എന്ഡിഎയ്ക്ക് ഒപ്പമായിരുന്നു പിന്നീട് ജാനു ചേര്ന്നത്. എന്നാല് ആദിവാസി ഗോത്ര മഹാസഭയുള്ള പിളര്പ്പിലേക്കാണ് ഇത് നയിച്ചത്.
