ന്യൂഡല്ഹി: സ്ത്രീകളെ ആകര്ഷിക്കാനുള്ള മന്ത്രവാദത്തിന്റെ ഭാഗമായി മൂങ്ങയെ ബലി കൊടുത്ത 40 കാരന് ഡല്ഹിയില് അറസ്റ്റില്. ഭാര്യയും മൂന്ന് മക്കളുമുള്ള ഡല്ഹി സുല്ത്താന്പുരിയിലെട്രക്ക് ഡ്രൈവര് കനയ്യയാണ് പിടിയിലായിരിക്കുന്നത്. ഇഷ്ടപ്പെടുന്ന പെണ്കുട്ടി തന്നെ പ്രണയിക്കാനായിരുന്നു ഇയാള് മന്ത്രവാദവും മൃഗബലിയും പരീക്ഷിച്ചത്. മൂങ്ങയെ ബലികഴിച്ചാല് കാര്യം നടക്കുമെന്നായിരുന്നു വിശ്വാസം.
മൃഗങ്ങള്ക്കെതിരേയുള്ള ക്രൂരത എന്ന കുറ്റത്തിന് നവംബര് 11 നായിരുന്നു പോലീസ് ഇയാളെ അറസ്റ്റ് ചെയ്തത്. മൃഗ ക്ഷേമ ബോര്ഡില് നിന്നുള്ള വിവരം അനുസരിച്ച് ഞായറാഴ്ച കനയ്യയുടെ വീട് പോലീസ് പരിശോധന നടത്തുകയും തലവെട്ടിയ നിലയില് മൂങ്ങയുടെ ശരീരം വീട്ടിലെ കൂളറില് നിന്നും കണ്ടെത്തി. ചോദ്യം ചെയ്യലില് ആദ്യം ഒഴിഞ്ഞുമാറിയ ഇയാള് പക്ഷികളെയും മൃഗങ്ങളെയും ബലി കൊടുക്കുന്ന വൂഡു ആചാരത്തിന്റെ ഭാഗമായി മൂങ്ങയെ ബലി കൊടുക്കുന്ന രംഗം ഇയാള് പിന്നീട് യൂ ട്യുബില് നിന്നും പോലീസിന് കാട്ടിക്കൊടുത്തു.
പിന്നീട് ഇയാളെ ഹിപ്നോട്ടിസം ചെയ്തതില് നിന്നുമാണ് താന് ഇഷ്ടപ്പെടുന്ന പെണ്കുട്ടി തന്നെ ആകര്ഷിക്കാന് വേണ്ടിയിരുന്നു കൃത്യം നടത്തിയതെന്ന് ഇയാള് പറഞ്ഞത്. അതിന് വേണ്ടി വീഡിയോയില് കണ്ട രീതിയില് ബലി നടത്തി. അതേസമയം കുടുംബത്തിലെ മുഴുവന് പേര്ക്കും ഇദ്ദേഹത്തിന്റെ പദ്ധതിയെക്കുറിച്ച് അറിയാമായിരുന്നെന്നാണ് പോലീസ് പറയുന്നത്. ഏല്പ്പിച്ച അനേകം മുറിവുകളുടെ ഫലമായിട്ടാണ് പക്ഷി ചത്തതെന്ന് പോലീസ് പറഞ്ഞു.
പോസ്റ്റുമാര്ട്ടം റിപ്പോര്ട്ടില് ഇയാള് അങ്ങേയറ്റം ക്രൂരതയാണ് കാട്ടിയതെന്നും വ്യക്തമായി. പക്ഷിയുടെ നഖങ്ങള് മുറിച്ചു മാറ്റിയ ശേഷം ശ്വാസകോശത്തിലേക്കും കരളിലേക്കും സൂചി കുത്തിക്കയറ്റി. മൂങ്ങയെ എങ്ങിനെയാണ് കിട്ടിയത് എന്ന ചോദ്യത്തിലും ഇയാള് ഒഴിഞ്ഞുമാറി. ആക്രമണത്തിനിരയായി വഴിയില് കിടന്ന മൂങ്ങയെ താന് വീട്ടിലേക്ക് എടുത്തു കൊണ്ടുവരികയായിരുന്നു എന്നാണ് ഇയാള് പറഞ്ഞത്. എന്നാല് പോലീസ് ഇത് വിശ്വസിച്ചിട്ടില്ല. എങ്ങിനെയാണ് മൂങ്ങയെ കിട്ടിയതെന്നും എന്തു വില കൊടുത്തു എന്നും പോലീസ് അന്വേഷിക്കുകയാണ്.
