ന്യൂഡല്ഹി: അനേകം പേരുടെ സാമ്പത്തീക ഇടപാടുകള് നടക്കുന്ന സ്റ്റേറ്റ് ബാങ്ക് ഓഫ് ഇന്ത്യ ഈ മാസം അവസാനത്തോടെ നെറ്റ് ബാങ്കിംഗ് അവസാനിപ്പിക്കുന്നു. ബാങ്ക് പറയുന്ന മാര്ഗ്ഗനിര്ദേശം അനുസരിക്കത്തവര്ക്ക് ഇനി ബാങ്ക് ഡീറ്റെയ്ല്സ് ഓണ്ലൈന്വഴി ലഭ്യമാകില്ല. കൂടുതല് സുരക്ഷിതത്വം ഉറപ്പുവരുത്തുന്നതിന്റെ ഭാഗമായി മൊബൈല് നമ്പര് കൈമാറാത്ത ഇടപാടുകാര്ക്ക് ഈ മാസം അവസാനത്തിന് ശേഷം നെറ്റ് ബാങ്കിംഗ് സൗകര്യം ലഭിക്കാതെ വരുമെന്ന് ബാങ്കിന്റെ വെബ്സൈറ്റിലാണ് വ്യക്തമാക്കിയിരിക്കുന്നത്.
മൊബൈല് നമ്പര് ബാങ്ക് അക്കൗണ്ടുമായി ബന്ധിപ്പിച്ചില്ലെങ്കില് നവംബര് 30 ന് ശേഷം ഇന്റര്നെറ്റ് ബാങ്കിംഗ് സൗകാര്യം ഇടപാടുകാര്ക്ക് അസാധ്യമായി വരുമെന്നാണ് വെബ്സൈറ്റില് പറഞ്ഞിരിക്കുന്നത്. അതേസമയം തന്നെ ബാങ്ക് അക്കൗണ്ടിനെ ഓര്ത്ത് വിഷമിക്കേണ്ട കാര്യമില്ലെന്നും അക്കൗണ്ടുമായി ബന്ധപ്പെട്ട ഇന്റര്നെറ്റ് അവകാശങ്ങള് മാത്രമാകും എടുത്തു കളയുക. ഒരു തവണ ബാങ്ക് ഈ സൗകര്യം ഒരു അക്കൗണ്ട് ഉടമയില് നിന്നും എടുത്തുമാറ്റിയാല് പിന്നീട് അത് തിരികെ കിട്ടണമെങ്കില് തൊട്ടടുത്ത ബ്രാഞ്ചില് എത്തി മൊബൈല് നമ്പര് നല്കിക്കഴിഞ്ഞ് ഇക്കാര്യത്തില് വീണ്ടും അപേക്ഷ കൂടി നല്കേണ്ടി വരും.
ഇതിനൊപ്പം സൗജന്യമായി പഴയ മാഗ്സ്ട്രിപ് ഡെബിറ്റ് കാര്ഡുകള്ക്ക് പകരം സുരക്ഷാ മാര്ഗ്ഗനിര്ദേശങ്ങള് അനുസരിച്ചുള്ള പുതിയ ഇഎംവി ചിപ്പുകള് ഘടിപ്പിച്ച പുതിയ കാര്ഡ് മാറിയെടുക്കുകയും ചെയ്യാനാകും. പഴയ കാര്ഡുകളുടെ വ്യാജപതിപ്പ് എളുപ്പം ഉണ്ടാക്കാന് കഴിയുമെന്നും അതുപയോഗിച്ച് വ്യാജ ഇടപാട് നടത്തി പണം തട്ടാന് കഴിയുമെന്നും എസ്ബിഐ വ്യക്തമാക്കിയിട്ടുണ്ട്. പഴയ മാഗ്സ്ട്രിപ്പ് ഡെബിറ്റ് കാര്ഡുകള് ഉപയോഗിച്ച് വ്യക്തി വിവരങ്ങളും കാര്ഡ് വിവരങ്ങളും എളുപ്പം ചോര്ത്താന് കഴിയുമെന്ന് ബാങ്ക് പറയുന്നു.
ഒരു ചെറിയ ഉപകരണം കൊണ്ട് ക്രെഡിറ്റ് കാര്ഡ് വിവരങ്ങള് മോഷ്ടിക്കാന് കഴിയുന്ന സ്കിമ്മിംഗ് വിദ്യയാണ് മിക്ക ഡിജിറ്റല് തട്ടിപ്പിലും ഉപയോഗപ്പെടുത്തിയിരിക്കുന്നതെന്ന് കണ്ടെത്തിയിട്ടുണ്ട്. അതുകൊണ്ടു തന്നെ ഇക്കാര്യത്തില് കൂടുതല് രഹസ്യ സ്വഭാവം സൂക്ഷിക്കുന്ന ഇഎംവി ചിപ്പുകള് ഉപയോഗപ്പെടുത്തിയ പുതിയ കാര്ഡുകള് ചെലവില്ലാതെ തന്നെ മാറിയെടുക്കണമെന്ന് എസ്ബിഐ പറയുന്നു.
തങ്ങളുടെ ഔദ്യോഗിസ ട്വിറ്റര് അക്കൗണ്ട് വഴി ഈ കൈമാറ്റ വാഗ്ദാനം അടുത്തിടെ എസ്ബിഐ നടത്തുകയുണ്ടായി. പൂര്ണ്ണമായും ആര്ബിഐ യുടെ മാര്ഗ്ഗനിര്ദേശം അനുസരിച്ചാണ് പുതിയ ഇഎംവി ചിപ്പ് കാര്ഡുകള് തയ്യാറാക്കിയിട്ടുള്ളത്. 2018 ഡിസംബര് അവസാനത്തോടെ പഴയ മാഗ്ട്രിപ്പ് കാര്ഡുകള്ക്ക് പകരമായി ഇഎംവി ചിപ്പ് ഡെബിറ്റ് കാര്ഡുകള് കൊണ്ടുവരണമെന്ന് ആര്ബിഐ ആവശ്യപ്പെട്ടിട്ടുമുണ്ട്.
