ചിത്രം നോക്കൂ... ഈ കാട്ടിലെ മരങ്ങള്‍ക്കൊക്കെ ഇതെന്തുപറ്റി; ഉത്തരം കിട്ടാതെ ശാസ്ത്രലോകം

പോളണ്ടിലെ വെസ്റ്റ് പോമറേനിയയിലെ ഒരു പൈന്‍മരക്കാട് ഇന്നും അദ്ഭുതമായി നില്‍ക്കുകയാണ്. ക്രൂക്ക്ഡ് ഫോറസ്റ്റെന്നാണ് ശാസ്ത്രലോകം ഈ കാടിനു നല്‍കിയിരിക്കുന്ന പേര്. ഈ പേരിലും കാര്യമുണ്ട്. ഈ കാട്ടിലെ എല്ലാ മരങ്ങളുടെയും കീഴ്ത്തടി ഒരു ഭാഗത്തേക്ക് വളഞ്ഞാണിരിക്കുന്നത്. പക്ഷേ എന്തുകൊണ്ടാണ് എല്ലാ മരങ്ങളും ഇങ്ങനെ വളരുന്നത് എന്നതിന്റെ കാരണം ഇതുവരെ കണ്ടെത്താനും കഴിഞ്ഞിട്ടില്ല.

400ലധികം പൈന്‍മരങ്ങളാണ് ഈ കാട്ടില്‍ വളഞ്ഞിരിക്കുന്നത്. പൈന്‍ മരങ്ങളുടെ ഏറ്റവും താഴെയുള്ള തടിഭാഗമാണ് വടക്കോട്ട് വളഞ്ഞിരിക്കുന്നത് എന്നതാണ് വിചിത്രമായ കാര്യം. കാലാവസ്ഥ കാരണമാണെന്നും ഇത് മനുഷ്യ നിര്‍മിതമാണെന്നുമൊക്കെയാണ് പലരുടെയും വാദങ്ങള്‍. പകല്‍ സമയങ്ങളില്‍ പോലും കനത്ത മൂടല്‍ മഞ്ഞുകൊണ്ട് ചുറ്റപ്പെട്ട സ്ഥലമാണ് ഈ പൈന്‍മരക്കാട്.

നിലവില്‍ ഇവിടം സംരക്ഷിത വനപ്രദേശമാക്കിയിരിക്കുകയാണ്. കത്തിന്റെ പലയിടങ്ങളില്‍ നിന്നും ഈ വളഞ്ഞ മരങ്ങളുള്ള കാട്ടിലേക്ക് നിരവധി സഞ്ചാരികളാണെത്തുന്നത്. എന്തായാലും ഈ ക്രൂക്ക്ഡ് ഫോറസ്റ്റിന് പിന്നിലെ രഹസ്യം ഇപ്പോഴും അജ്ഞാതമായി തുടരുകയാണ്.