കണ്ണൂര്: കണ്ണൂരില് തോക്കേന്തി മാവോയിസ്റ്റുകള് പ്രകടനം നടത്തുകയും പോസ്റ്ററുകള് ഒട്ടിക്കുകയും ചെയ്ത സംഭവത്തില് അയല് സംസ്ഥാനങ്ങളിലെ പോലീസിന്റെ സഹായം തേടുമെന്ന് കണ്ണൂര് പോലീസ് മേധാവി. മാവോയിസ്റ്റുകള്ക്കായി വനത്തില് തിരച്ചില് ശകതമാക്കുമെന്നും ഇതിനായി കര്ണാടക, തമിഴ്നാട് പോലീസ് സേനയുടെ സഹായം തേടുമെന്നുമാണ് കണ്ണൂര് എസ്പി വ്യക്തമാക്കിയത്.
സംഭവത്തില് മൂന്ന് ജില്ലാ പോലീസ് മേധാവികളെ അന്വേഷണചുമതല ഏല്പ്പിച്ചു. ഡിജിപി ലോക്നാഥ് ബെഹ്റയുടെ അധ്യക്ഷതയില് തിരുവനന്തപുരത്ത് ചേര്ന്ന യോഗത്തിലാണ് ഇക്കാര്യം തീരുമാനിച്ചത്. പാലക്കാട് ജില്ലാ പോലീസ് മേധാവി ദേബേഷ് കുമാര് ബെഹ്റ, വയനാട് ജില്ലാ പോലീസ് മേധാവി ആര്. കറുപ്പസ്വാമി, കണ്ണൂര് ജില്ലാ പോലീസ് മേധാവി ജി ശിവവിക്രം എന്നിവര്ക്കാണ് ചുമതല.
ഇന്നലെയാണ് കണ്ണൂരില് കൊട്ടിയൂര് അമ്പായത്തോട് ടൗണില് തോക്കേന്തിയ മാവേയിസ്റ്റുകളുടെ പ്രകടനം നടന്നത്. പോലീസ് തിരയുന്ന മാവോയിസ്റ്റ് നേതാവ് സിപി.മൊയ്തീന്റെ നേതൃത്വത്തിലുള്ള സംഘമാണ് എത്തിയതെന്നാണ് വിവരം. സംഘത്തില് രാമു, കീര്ത്തി എന്നറിയപ്പെടുന്ന കവിത എന്നിവരും സംഘത്തില് ഉണ്ടായിരുന്നതായി പോലീസ് വ്യക്തമാക്കുന്നു.
കൊട്ടിയൂര് വന്യജീവി സങ്കേതത്തില് നിന്നുമാണ് മാവോയിസ്റ്റുകള് ഇറങ്ങി വന്നത്. കടയില് നിന്ന് അരിയും സാധനങ്ങളും വാങ്ങിയ സംഘം പോസ്റ്ററുകളും പതിപ്പിച്ച ശേഷമാണ് കാട്ടിലേക്ക് മടങ്ങിയത്. വനിതാ മതിലിനെതിരായ പോസ്റ്ററാണ് മാവോയിസ്റ്റുകള് പതിപ്പിച്ചത്. തുടര്ന്ന് ലഘുലേഖ വിതരണം ചെയ്യുകയും ചെയ്തു. വനിത അടക്കം ആറ് പേരാണ് സംഘത്തില് ഉണ്ടായിരുന്നത്.
നേരത്തെ വയനാട് തലപ്പുഴയ്ക്കടുത്ത് പേര്യയില് ആയുധധാരികളായ ഒന്പതംഗ മാവോയിസ്റ്റ് സംഘം എത്തിയിരുന്നു. മൂന്ന് സ്ത്രീകള് ഉള്പ്പെടുന്ന സംഘമാണ് എത്തിയത്. പ്രദേശത്ത് പോസ്റ്ററുകള് പതിപ്പിക്കുകയും ലഘുലേഖകള് വിതരണം ചെയ്യുകയും ചെയ്ത ശേഷം കടയില് നിന്ന് അരിയും മറ്റ് സാധനങ്ങളും വാങ്ങിയ ശേഷമാണ് സംഘം മടങ്ങിയത്. മാവോയിസ്റ്റുകള് കടയില് എത്തുമ്പോള് കുറച്ച് പേര് മാത്രമാണ് അവിടെ ഉണ്ടായിരുന്നു. അവര് മലയാളത്തിലാണ് സംസാരിച്ചതെന്ന് ദൃക്സാക്ഷികള് വെളിപ്പെടുത്തി.
