ലണ്ടന്: ഇംഗ്ളീഷ് പ്രീമിയര് ലീഗ് മുന് ചാമ്പ്യന്മാരായ ആഴ്സണലിന്റെ സെലിബ്രിറ്റി ആരാധികയും ബോളിവുഡ് നടിയുമായ ഈഷാ ഗുപ്ത ആഫ്രിക്കന് കളിക്കാരനെതിരേ വംശീയാധിക്ഷേപം നടത്തി വിവാദത്തില്. ബോളിവുഡിലെ ഗ്ളാമര് നടിയായ ഈഷ ആഴ്സണലിന്റെ നൈജീരിയന് താരം അലക്സ് ഇവോബിയെ ഗോറില്ല എന്ന് വിളിച്ചതാണ് വിവാദത്തില് തലയിട്ടത്. വിവാദ വാട്സ്ആപ്പ് സംഭാഷണം ഇഷ ഡിലീറ്റ് ചെയ്തെങ്കിലും സ്ക്രീന്ഷോട്ട് എടുത്ത് ആരാധകര് താരത്തിനെതിരേ രംഗത്ത് വന്നതോടെ മാപ്പു പറഞ്ഞു തടിതപ്പി.
വെള്ളിയാഴ്ച രാത്രി എഫ് എ കപ്പില് മാഞ്ചസ്റ്റര് യുണൈറ്റഡിനോട് ആഴ്സണല് തോറ്റതിന് പിന്നാലെയായിരുന്നു താരത്തിന്റെ വര്ഗ്ഗീയതയും പുറത്തുവന്നത്. വരുണ് ഗുപ്ത എന്ന 17 കാരനുമായി താരം നടത്തിയ കളി വിലയിരുത്തലിലാണ് ടീമിന്റെ നൈജീരിയന് താരത്തെ വംശീയാക്ഷേപം നടത്തിയത്. നമ്മുടെ വിംഗര്മാരുടെ പ്രശ്നം പരിഹരിക്കണമെന്നും ആ ഗോറില്ലാമുഖമുള്ള ഇവോബിയെ ഫ്ളാങ്കിലേക്ക് ഓടി വരുന്നത് പോലും കണ്ടില്ല. അവന് മോശമാണെന്ന് വരുണ് ഗുപ്ത അയച്ച സന്ദേശത്തിന് അയാളെ എന്താണ് ബഞ്ചില് ഇരുത്താത്തതെന്ന് ഇഷ ചോദിക്കുന്നു. തുടര്ന്ന് ഇവന്റെ കാര്യത്തില് പരിണാമം നിന്നുപോയെന്നും നിയാണ്ടര്ത്തലില് നിന്നും മനുഷ്യനിലേക്ക് ഇയാള് ഇതുവരെ മാറിയിട്ടില്ലെന്നും വരുണ് പറയുന്നു.
ഈ സംഭാഷണം വിവാദമാകുമെന്ന് കണ്ട് ഇഷ പെട്ടെന്ന് തന്നെ ഡിലീറ്റ് ചെയ്തെങ്കിലും സംഭവിക്കേണ്ടത് സംഭവിച്ചു. സ്ക്രീന് ഷോട്ട് എടുത്ത ഒരു 33 കാരന് നടിക്ക് 3.4 ദശലക്ഷം ഫോളോവര്മാരുള്ള ഇന്സ്റ്റാഗ്രാമിലും 412,000 പേര് പിന്തുടരുന്ന ട്വിറ്ററിലും പോസ്റ്റ് ചെയ്തു. സാമൂഹ്യ മാധ്യമങ്ങളില് താരത്തിന്റെ പോസ്റ്റിന് വലിയ വിമര്ശനം ഉയര്ന്നതോടെ താരം വംശീയ പരാമര്ശത്തിന് മാപ്പു പറയുകയും ചെയ്തു. ഒരു കായികപ്രേമി എന്ന നിലയില് തന്റെ ഭാഗത്ത് വീഴ്ച സംഭവിച്ചെന്നും ഈ മണ്ടത്തരത്തിന് എല്ലാവരും ക്ഷമിക്കണമെന്നും താരം പറഞ്ഞു.
മുന് മിസ്് ഇന്ത്യാ ഇന്റര്നാഷണല് ജേത്രിയായ ഇഷാ ഗുപ്തയെ ക്ളബ്ബിന്റെ ഏറ്റവും പ്രശസ്തരായ ആരാധകരില് ഒരാളായിട്ടാണ് ആഴ്സണല് വിലയിരുത്തുന്നത്. ക്ളബ്ബിന്റെ ഹോംമാച്ചില് സ്റ്റേഡിയത്തില് താരത്തിന്റെ സാന്നിദ്ധ്യവും പതിവായിരുന്നു. 2017 ല് ക്ളബ്ബിന്റെ കിറ്റ് അവതരിപ്പിച്ചത് ഇഷയായിരുന്നു. ആഴ്സണലിന്റെ പ്രതിരോധതാരവും സ്പാനിഷ് പൗരനുമായ ഹെക്ടര് ബെല്ലെറിനുമായി ഇഷാ ഡേറ്റിംഗിലാണെന്ന് നേരത്തേ വാര്ത്തകള് പുറത്തുവന്നിരുന്നു. ഇരുവരും റസ്റ്റോറന്റിലും മറ്റും പോകുന്നതിന്റെ ചിത്രവും പുറത്തുവന്നിരുന്നു. ഹൊറര് സിനിമകളായ റാസ്, റുസ്തം തുടങ്ങിയ ഹിറ്റ് ചിത്രങ്ങളിലൂടെ ശ്രദ്ധിക്കപ്പെട്ട ഇഷയുടെ അര്ദ്ധനഗ്ന ചിത്രങ്ങള് അടുത്തിടെ നെറ്റില് തരംഗമായിരുന്നു.
