ന്യൂകാമ്പ്: ആദ്യാവസാനം ആരാധകരെ എരിപൊരി സഞ്ചാരം കൊള്ളിച്ച മത്സരത്തില് നാലു ഗോള് സമനിലയുമായി ബാഴ്സിലോണ വിയ്യാറയലിനോട് കഷ്ടിച്ചു രക്ഷപ്പെട്ടു. സ്പാനിഷ് ലാലിഗയില് ഇന്നലെ നടന്ന മത്സരത്തില് ആദ്യ രണ്ടു ഗോളിന് മുന്നിലെത്തുകയും പിന്നീട് രണ്ടു ഗോളിന് പിന്നില് പോകുകയും ചെയ്തിടത്ത് നിന്നുമാണ് ബാഴ്സിലോണ തിരിച്ചുവന്നത്. പകരക്കാരനായി എത്തിയ മെസിയും സുവാരസും ഇഞ്ചുറി സമയത്തെ മൂന്ന് മിനിറ്റില് രണ്ടു ഗോള് നേടിയതോടെ വിയ്യാറയലിന്റെ കയ്യിലിരുന്ന വിജയം ബാഴ്സിലോണ തട്ടിക്കളഞ്ഞു.
ഫിലിപ്പെ കുടീഞ്ഞോ, മാല്ക്കം, മെസ്സി, സുവാരസ് എന്നിവരായിരുന്നു ബാഴ്സിലോണയുടെ ഗോളുകള് നേടിയത്. ചുക്വൂസേ, ടോകോ എകാമ്പി, ഇബോറ, ബാക്കാ എന്നിവര് വിയ്യാ റയലിനായി ഗോള് നേടി. 86 ാം മിനിറ്റില് ഗോണ്സാലസ് ചുവപ്പ് കാര്ഡ് കണ്ട് പത്തു പേരായി ചുരുങ്ങിയത് വിയ്യാ റയലിന് തിരിച്ചടിയായി. തരം താഴ്ത്തലിന് കേവലം ഒരു പോയിന്റ് മാത്രം മുകളില് നില്ക്കുന്ന വിയ്യാറയലിന്റെ തിരിച്ചുവരവായിരുന്നു മത്സരത്തിന്റെ പ്രത്യേകത. ബാഴ്സിലോണ രണ്ടു ഗോളിന് ലീഡ് ചെയ്യുമ്പോള് നാലുഗോളാണ് അവര് അടിച്ചു കൂട്ടിയത്.
മാഞ്ചസ്റ്റര് യുണൈറ്റഡ്, അത്ലറ്റിക്കോ മാഡ്രിഡ് എന്നിവര്ക്കെതിരേയുള്ള മത്സരത്തിന് വേണ്ടി മെസ്സിയെയും പ്രതിരോധക്കാാരന് ജറാഡ് പിക്കേയും മദ്ധ്യനിരക്കാരന് റാക്കിട്ടിക്കിനേയും ബഞ്ചില് ഇരുത്തിയാണ് ബാഴ്സ കളത്തില് എത്തിയതെങ്കിലും ആക്രമണത്തിന് ഒരു കുറവും ഇല്ലായിരുന്നു. മാല്ക്കം ഒരുക്കിയ ഒരു മികച്ച അവസരത്തില് കുടീഞ്ഞോ തുടക്കത്തില് തന്നെ ഗോള് നേടുകയും പിന്നാലെ മാല്ക്കം സ്കോര് വര്ദ്ധിപ്പിക്കുകയും ചെയ്തെങ്കിലും ഒന്നാം പകുതിയില് ഒരുഗോള് മടക്കയി വിയ്യാറയല് രണ്ടാം പകുതിയില് നേടിയത് മൂന്ന് ഗോളുകളായിരുന്നു. തുടര്ന്നായിരുന്നു ബാഴ്സ കളിയില് മാറ്റം വരുത്തി മെസ്സിയെ പകരക്കാരനായി കൊണ്ടുവന്നത്.
കളി 4-2 ന് പിന്നില് നില്ക്കേ 90 ാം മിനിറ്റില് എടുത്ത ഫ്രീകിക്ക് വലയില് കയറുകയായിരുന്നു. എല്ലാം ശരിയായി നില്ക്കേ സുവാരസിനെ പിന്നില് നിന്നും വീഴ്ത്തിയതിന് വിയ്യാ ഡിഫന്ഡര് ഗോണ്സാലസ് ചുവപ്പ് കാര്ഡ് കണ്ടത് അവര്ക്ക് വിനയായി. കളി തീരാന് വെറും 12 സെക്കന്റ് മാത്രം ബാക്കി നില്ക്കുമ്പോള് കിട്ടിയ ഫ്രീകിക്ക് മെസ്സി വലയില് എത്തിച്ചു. തൊട്ടു പിന്നാലെ 93 ാംമിനിറ്റില് ഒരു റിട്ടേണ് ബോള് 20 അടി അകലത്തില് നിന്നും കനത്ത അടിയില് വലയില് എത്തിച്ച് സുവാരസും ഗോള് നേടി. രണ്ടാം സ്ഥാനക്കാരായ അത്ലറ്റിക്കോ മാഡ്രിഡിനെക്കാള് എട്ടു പോയിന്റ് മുകളിലാണ് ഇപ്പോള് ബാഴ്സിലോണ. ശനിയാഴ്ച ന്യൂകാമ്പില് ബാഴ്സയുടെ എതിരാളികള് അത്ലറ്റിക്കോയാണ്.
