തൃശൂര്: കേരളത്തില് ആദ്യമായി ഫാന്സ് അസോസിയേഷന് രൂപീകരിക്കപ്പെട്ട ഗജരാജന് തെച്ചിക്കോട്ടുകാവ് രാമചന്ദ്രനു തൃശൂര് പൂരത്തില് വിലക്കേര്പ്പെടുത്തിയതിനെച്ചൊല്ലി കേരളത്തില് വിവാദത്തിന്റെ മാലപ്പടക്കം! സംസ്ഥാനത്തെ നാട്ടാനകളില് ഏറ്റവും തലയെടുപ്പുള്ള രാമചന്ദ്രനില്ലാതെ പൂരം പൂര്ണമാവില്ലെന്നാണു പൂരപ്രേമികളുടെ വാദം. 13 പേരെയും രണ്ടു കൂട്ടാനകളെയും കൊലപ്പെടുത്തിയിട്ടുള്ള രാമചന്ദ്രനെ എഴുന്നള്ളിക്കുന്നത് അപകടകരമാണെന്നു വനംമന്ത്രി പറയുന്നു.
ആനയുടെ പ്രായാധിക്യവും വലതുകണ്ണിന്റെ കാഴ്ചക്കുറവും വനംവകുപ്പ് ചൂണ്ടിക്കാട്ടുന്നു. എന്നാല്, രാമചന്ദ്രന്റെ വിലക്ക് നീക്കിയില്ലെങ്കില് തൃശൂര് പൂരമടക്കം ഒരുത്സവത്തിനും ശനിയാഴ്ച മുതല് ആനകളെ വിട്ടുനല്കേണ്ടെന്നാണ് ഉടമകളുടെ തീരുമാനം. തൃശൂരില് ചേര്ന്ന ആനയുടമ ഫെഡറേഷന് സംസ്ഥാനസമിതിയുടെ അടിയന്തരയോഗമാണ് ഈ തീരുമാനമെടുത്തത്. ഉത്സവാഘോഷങ്ങള് അട്ടിമറിക്കാനാണു സര്ക്കാര് ശ്രമമെന്നും തെച്ചിക്കോട്ടുകാവ് രാമചന്ദ്രന്റെ വിലക്കിനു പിന്നില് വനംവകുപ്പ് ഉദ്യോഗസ്ഥരുടെ ഗൂഢാലോചനയുണ്ടെന്നും ഫെഡറേഷന് സംസ്ഥാന ജനറല് സെക്രട്ടറി പി. ശശികുമാര് ആരോപിച്ചു.
ആനയുടമകള് തീരുമാനത്തില് ഉറച്ചുനിന്നാല് തൃശൂര് പൂരത്തെ ഉള്പ്പെടെ ബാധിക്കും. തൃശൂര് പൂരത്തിന്റെ വിവിധ എഴുന്നള്ളിപ്പുകള്ക്കായി നൂറോളം ആനകളെയാണ് അണിനിരത്തുന്നത്. മുഖ്യസംഘാടകരായ പാറമേക്കാവ്, തിരുവമ്പാടി ദേവസ്വങ്ങള്ക്കു മാത്രം 80 ആനകളെങ്കിലും വേണം. രാവിലെ എട്ടു ഘടകപൂരങ്ങള്ക്കും ആനയെഴുന്നള്ളിപ്പുണ്ട്.
അതേസമയം, ആനയുടമകളുടെ നിലപാട് ദൗര്ഭാഗ്യകരമാണെന്നു മന്ത്രി വി.എസ്. സുനില്കുമാര് പ്രതികരിച്ചു. തെച്ചിക്കോട്ടുകാവ് രാമചന്ദ്രന്റെ വിലക്ക് നീക്കുന്നതു സംബന്ധിച്ചു കോടതിവിധി വരാനിരിക്കേ ഉടമകളുടെ തീരുമാനം ശരിയായില്ല. കോടതിവിധി നടപ്പാക്കാന് സര്ക്കാര് ബാധ്യസ്ഥമാണ്. ഉത്സവങ്ങള് അട്ടിമറിക്കാന് സര്ക്കാര് ആഗ്രഹിക്കുന്നില്ലെന്നും സുനില്കുമാര് പറഞ്ഞു. ആനയെ എഴുന്നള്ളിക്കുന്ന വിഷയത്തില് ആവേശപ്രകടനങ്ങള്ക്കല്ല, ജനസുരക്ഷയ്ക്കാണു സര്ക്കാര് പ്രാധാന്യം നല്കുന്നതെന്നു വനംമന്ത്രി കെ. രാജു പറഞ്ഞു. ഉത്സവങ്ങളും പൂരങ്ങളും തടസമില്ലാതെ നടത്താനുള്ള നടപടിയാണു സര്ക്കാര് സ്വീകരിക്കുന്നതെന്നും അദ്ദേഹം ഫെയ്സ്ബുക്ക് പോസ്റ്റില് വ്യക്തമാക്കി.
തെച്ചിക്കോട്ടുകാവു രാമചന്ദ്രന്റെ വിലക്കില് പ്രതിഷേധമുണ്ടെങ്കിലും ആനയുടമകളുടെ തീരുമാനം പുനഃപരിശോധിക്കണമെന്നു തിരുവമ്പാടി, പാറമേക്കാവ് ദേവസ്വങ്ങള് ആവശ്യപ്പെട്ടു. പൂരത്തിന് ആനകളെ വിട്ടുനല്കാന് തയാറാണെന്ന് ഗുരുവായൂര് ദേവസ്വം അറിയിച്ചു. പൂരം നടത്തിപ്പ് സംബന്ധിച്ച് ആനയുടമകളുമായി ഇന്നു ദേവസ്വം മന്ത്രി കടകംപള്ളി സുരേന്ദ്രന് തിരുവനന്തപുരത്തു ചര്ച്ചനടത്തും. ചര്ച്ചയില് മന്ത്രിമാരായ വി.എസ്. സുനില്കുമാറും കെ. രാജുവും പങ്കെടുക്കും. വിവാദങ്ങള്ക്കു പിന്നില് ഹീനമായ രാഷ്ട്രീയലക്ഷ്യങ്ങളാണുള്ളതെന്നും ജനസുരക്ഷയ്ക്കാണു സര്ക്കാര് പ്രാധാന്യം കല്പ്പിക്കുന്നതെന്നും മന്ത്രി കടകംപള്ളി പറഞ്ഞു. ആനയുടമകള് തീരുമാനത്തില്നിന്നു പിന്മാറണമെന്നും അദ്ദേഹം ആവശ്യപ്പെട്ടു. തലയെടുപ്പില് ഒന്നാമനും ആരാധകര് ഏറെയുള്ള ആനയുമാണെങ്കിലും തെച്ചിക്കോട് രാമചന്ദ്രന് കൊലമാസ് വില്ലനാണെന്നതാണ് വിവരങ്ങള്.
തെച്ചിക്കോട്ട് കാവ് രാമചന്ദ്രന്റെ മികവ് ഇങ്ങിനെയാണ്
* കേരളത്തില് ഏറ്റവും തലപ്പൊക്കമുള്ള നാട്ടാനയാണു തെച്ചിക്കോട്ടുകാവ് രാമചന്ദ്രന്
* ഏഷ്യയിലെ ഏറ്റവും ഉയരമുള്ള രണ്ടാമത്തെ ആന.
* ഇരിക്കസ്ഥാനത്തുനിന്ന് 317 സെ.മീ. ഉയരം.
* വിരിഞ്ഞ മസ്തകം, കൊഴുത്തുരുണ്ട നീണ്ട ഉടല്, ലക്ഷണമൊത്ത 18 നഖം, നിലത്തിഴയുന്ന തുമ്പിെക്കെ.
* കേരളത്തില് ''ഏകഛത്രാധിപതി'' സ്ഥാനമുള്ള ഏകആന.
* ഗജരാജകേസരി, ഗജസമ്രാട്ട്, ഗജചക്രവര്ത്തി പട്ടങ്ങളും.
* ഉത്സവപ്പറമ്പുകളില് ഏറ്റവും കൂടുതല് ആരാധകര്.
* സംസ്ഥാനത്ത് ഏറ്റവുമധികം ഏക്കത്തുക
* നാട്ടാനകളില് ആദ്യത്തെ ഫാന്സ് അസോസിയേഷന്
* ആറുവര്ഷമായി തൃശൂര്പൂരത്തിനു തുടക്കം കുറിച്ച് നെയ്തലക്കാവിലമ്മയുടെ തിടമ്പേറ്റുന്നു.
* തെക്കോട്ടിറക്കത്തിലെ മുഖ്യതാരം.
വില്ലത്തരങ്ങള് ഇങ്ങിനെയും
* 13 പേരെ കൊലപ്പെടുത്തി.
* 2009 മുതല് ഇതുവരെ ഏഴു ജീവനെടുത്തു.
* രണ്ടു കൂട്ടാനകളെ കുത്തിവീഴ്ത്തി. ഇവ പിന്നീടു ചരിഞ്ഞു.
* കൂട്ടാനകളെ കുത്തുന്നതിനാല് എഴുന്നെള്ളിപ്പില് ''ഒറ്റയാന്''.
* പ്രായാധിക്യം ഏറെ; വലതുകണ്ണിനു തീരെ കാഴ്ചയില്ല.
* എഴുന്നള്ളിക്കാന് നാലുവശത്തും പാപ്പാന്മാര് വേണം.
* കഴിഞ്ഞ ഫെബ്രുവരി എട്ടിനു രണ്ടുപേരെ കൊലപ്പെടുത്തിയതിനേത്തുടര്ന്ന് വിലക്ക്.
* എഴുന്നള്ളിക്കുന്നത് അഭികാമ്യമല്ലെന്നു മുഖ്യവനപാലകന്റെ റിപ്പോര്ട്ട്.
