ന്യൂഡല്ഹി: ലോക്സഭാ ഡെപ്യൂട്ടി സ്പീക്കര് സ്ഥാനത്തിനായി അവകാശവാദം ഉന്നയിച്ച് ശിവസേന. അഭ്യര്ത്ഥനയല്ല, ഡെപ്യൂട്ടി സ്പീക്കര് സ്ഥാനം ശിവസേനയുടെ അവകാശമാണെന്ന് പാര്ട്ടി നേതാവ് സഞ്ജയ് റാവത്ത് പറഞ്ഞു. ശിവസേനയ്ക്ക് 18 എം.പിമാരുണ്ട്. അതുകൊണ്ടുതന്നെ ഡെപ്യൂട്ടി സ്പീക്കര് സ്ഥാനം വേണമെന്നത് പാര്ട്ടിയുടെ സ്വാഭാവികമായ അവകാശമാണെന്നും റാവത്ത് പറഞ്ഞു.
സ്ഥാനങ്ങള്ക്കായി അഭ്യര്ത്ഥിക്കുന്ന പാരമ്പര്യം ശിവസേനയ്ക്കില്ല. ഇക്കാര്യത്തിലും അതുതന്നെയാണ് നിലപാട്. മറ്റേതെങ്കിലും പാര്ട്ടിക്ക് ഡെപ്യൂട്ടി സ്പീക്കര് സ്ഥാനം നല്കാനുള്ള നീക്കം അംഗീകരിക്കില്ലെന്നും റാവത്ത് കൂട്ടിച്ചേര്ത്തു. ഡെപ്യൂട്ടി സ്പീക്കര് സ്ഥാനം എന്.ഡി.എ സഖ്യകക്ഷിയല്ലാത്ത ബിജു ജനതാദളിന് നല്കിയേക്കുമെന്ന് റിപ്പോര്ട്ടുകളുണ്ട്. റിപ്പോര്ട്ടുകളുടെ പശ്ചാത്തലത്തിലാണ് ശിവസേനയുടെ പ്രതികരണം.
മഹാരാഷ്ട്രയില് ബി.ജെ.പി-ശിവസേന സഖ്യം മികച്ച പ്രകടനമാണ് ലോക്സഭാ തെരഞ്ഞെടുപ്പില് കാഴ്ചവച്ചത്. അതേസമയം എന്.ഡി.എയുടേയും യു.പി.എയുടേയും ഭാഗമല്ലാത്ത ബിജു ജനതാദള് ഒറ്റയ്ക്ക് മത്സരിച്ച് ഒഡീഷയിലെ 21ല് 12 സീറ്റ് നേടിയിരുന്നു.
Comments