മുംബൈ: ലോകകപ്പിന് പിന്നാലെ വിന്ഡീസ് പര്യടനത്തിനൊരുങ്ങുന്ന ടീം ഇന്ത്യയുടെ ജഴ്സിയിലൂടെ നെഞ്ചില് കയറാനൊരുങ്ങി 'ബൈജുസ്്'. സെപ്തംബറോടെ ടീം ഇന്ത്യയുടെ ജഴ്സിയില് നിന്നും മൊബൈല് കമ്പനിയായ ഓപ്പോ ഇറങ്ങി പകരം ബാംഗ്ളൂര് അടിസ്ഥാനമായുള്ള വിദ്യാഭ്യാസ സാങ്കേതിക പരിപാടിയും ഓണ്ലൈന് ട്യൂട്ടോറിംഗ് സ്ഥാപനവുമായ ബൈജുസ് ദി ലേണിംഗ് ആപ്സ് കയറും. 2017 മാര്ച്ചില് 1,079 കോടിക്കാണ് ഓപ്പോ കരാര് നേടിയത്.
രണ്ടാഴ്ചയ്ക്ക് മുമ്പാണ് കാര്യങ്ങള് മാറി മറിഞ്ഞത്. വെസ്റ്റിന്ഡീസ് പര്യടനം പൂര്ത്തിയാകുന്നതിന് പിന്നാലെ സെപ്തംബറില് തുടങ്ങുന്ന ദക്ഷിണാഫ്രിക്കന് പര്യടനത്തോടെ ബൈജു ജഴ്സിയില് പ്രത്യക്ഷപ്പെടും. 2022 മാര്ച്ച് 31 വരെയാണ് കരാറെന്ന് ബിസിസിഐ പറഞ്ഞു. നഷ്ടം കുറയ്ക്കാനുള്ള നീക്കത്തിന്റെ ഭാഗമായി അവകാശം ബൈജുവിന് കൈമാറിയ ഓപ്പോ ചെറിയ തുക ഇക്കാര്യത്തില് ബൈജുവിന് നല്കും.
2017 ല് ഇന്ത്യയുടെ വിദേശ ആഭ്യന്തര പരമ്പരകളില് ഓരോ മത്സരത്തിനും 4.6 കോടി രൂപ വീതവും ഐസിസി/ഏഷ്യകപ്പ് മത്സരങ്ങള്ക്കായി 1.56 കോടി വീതവുമായിരുന്നു ഓപ്പോയുമായുള്ള കരാര്. ഇതിന് മുമ്പ് സ്റ്റാര് ബിസിസിഐ യ്ക്ക് 1.92 കോടി വീതം പരമ്പരകള്ക്കും 61 ലക്ഷം വീതം ഐസിസി/ഏഷ്യാകപ്പ് മത്സരങ്ങള്ക്കും നല്കി കരാര് പിടിച്ചിരുന്നു. എന്നാല് ഇന്ത്യന് ക്രിക്കറ്റിനെ ചുറ്റിപ്പറ്റിയുണ്ടായ സാങ്കേതിക കാരണങ്ങളാണ് കരാര് പുതുക്കുന്നതില് നിന്നും സ്റ്റാര് പിന്മാറാന് കാരണം. സ്റ്റാര് പിന്മാറിയതോടെയാണ് ഓപ്പോ സ്ഥാനത്ത് എത്തിയത്്.
ഇവരുടെ സഹോദരി സ്ഥാപനമായ വിവോയും ഇന്ത്യന് ക്രിക്കറ്റുമായി ബന്ധപ്പെട്ട് വലിയൊരു കരാറില് ഏര്പ്പെട്ടിരുന്നു. ഐപിഎല്ലില് ടൈറ്റില് സ്വന്തമാക്കാന് 750 കോടിയുടെ കരാറിലാണ് വിവോ ഏര്പ്പെട്ടത്. മലയാളിയായ ബൈജു രവീന്ദ്രനാണ് ബൈജുസിന്റെ ഉപജ്ഞാതാവ്. ഇതിന്റെ ലാഭം 38,000 കോടിയാണ് മതിക്കുന്നത്.
