ബംഗളുരു: കര്ണാടകയില് എച്ച്.ഡി കുമാരസ്വാമി സര്ക്കാരിനെ അട്ടിമറിച്ച ബി.ജെ.പിയെ പിന്തുണയ്ക്കാന് ജെ.ഡി.എസ് എം.എല്.എമാരുടെ സമ്മര്ദ്ദം. താജ് വെസ്റ്റ് എന്ഡ് ഹോട്ടലില് നടന്ന ജെ.ഡി.എസ് എം.എല്.എമാരുടെ യോഗത്തിലാണ് ബി.ജെ.പിയെ പിന്തുണയ്ക്കണമെന്ന അഭിപ്രായം ഒരു വിഭാഗം ഉയര്ത്തിയത്.
ജെ.ഡി.എസ് എം.എല്.എമാര്ക്കിടയില് തന്നെ രണ്ട് വിഭാഗം ഉടലെടുത്തതായാണ് റിപ്പോര്ട്ടുകള്. ഒരു വിഭാഗം പ്രതിപക്ഷത്ത് ഇരിക്കണമെന്ന നിലപാടുകാരാണ്. എന്നാല് മറുവിഭാഗം ബി.ജെ.പിയെ പിന്തുണയ്ക്കാന് ആവശ്യപ്പെടുന്നു. ബി.ജെ.പി സഖ്യത്തില് ചേരുകയോ പുറത്തുനിന്ന് പിന്തുണ നല്കുകയോ ചെയ്യണമെന്നാണ് ഈ വിഭാഗത്തിന്റെ ആവശ്യം. ബി.ജെ.പി അനുകൂലികളുടെ നിലപാട് കുമാരസ്വാമിയെ അറിയിച്ചിട്ടുണ്ടെന്നും തീരുമാനം അദ്ദേഹത്തിന് വിട്ടിരിക്കുകയാണെന്നും മുന് മന്ത്രി കൂടിയായ ജി.ടി ദേവെ ഗൗഡ പറഞ്ഞു.
16 കോണ്ഗ്രസ്-ജെ.ഡി.എസ് എം.എല്.എമാരെ വിലയ്ക്കെടുത്താണ് ബി.ജെ.പി കുമാരസ്വാമി സര്ക്കാരിനെ അട്ടിമറിച്ചത്. വിമതനീക്കം നടത്തി കൂറുമാറിയവരില് 13 എം.എല്.എമാര് കോണ്ഗ്രസില് നിന്നും മൂന്ന് എം.എല്.എമാര് ജെ.ഡി.എസില് നിന്നുമാണ്. എന്നാല് സ്വന്തം സര്ക്കാരിനെ അട്ടിമറിച്ച് ഒരാഴ്ച തികയുന്നതിന് മുമ്പ് അതേ ബി.ജെ.പിയെ പിന്തുണയ്ക്കണമെന്നാണ് ജെ.ഡി.എസില് ഒരു വിഭാഗത്തിന്റെ ആവശ്യം.
