മദ്യലഹരിയില് ഐഎഎസ് ഉദ്യോഗസ്ഥന് ശ്രീറാം വെങ്കിട്ടരാമന് ഓടിച്ച കാറിടിച്ച് മാധ്യമപ്രവര്ത്തകനായ കെ എം ബഷീര് മരിച്ച സംഭവത്തില് വന് പ്രതിഷേധമാണ് ശ്രീറാമിനെതിരെ ഉയരുന്നത്. ഒപ്പമുണ്ടായിരുന്ന യുവതിയുടെ മൊഴി കൂടി എതിരായതോടെ ശ്രീറാം കുടുങ്ങിയിരിക്കുകയാണ്. ഇപ്പോള് സംഭവത്തില് പ്രതികരണവുമായി രംഗത്തെത്തിയിരിക്കുന്നത് മുഖ്യ തെരഞ്ഞെടുപ്പ് ഓഫീസറായ ടീക്കാറാം മീണ.
'ദുഖം അനുഭവിക്കുന്ന ബഷീറിന്റെ കുടുംബത്തിനൊപ്പം അഗാധമായ ദുഖം രേഖപ്പെടുത്തുന്നു. ബഷീറിനെ ഞാന് പരിചയപ്പെട്ടത് കഴിഞ്ഞ തെരഞ്ഞെടുപ്പ് ഡ്യൂട്ടി സമയങ്ങളിലായിരുന്നു. അദ്ദേഹത്തിന്റെ തെരഞ്ഞെടുപ്പ് റിപ്പോര്ട്ടിംഗ് വളരെ വസ്തുനിഷ്ടവും നിഷ്പക്ഷവുമായിരുന്നു. ഒരു ഐഎഎസ് ഉദ്യോഗസ്ഥന്റെ നിരുത്തരവാദിത്വപരമായ പെരുമാറ്റം മൂലം അദ്ദേഹത്തിന്റെ ജീവന് നഷ്ടപ്പെട്ടത് അങ്ങേയറ്റം ദുഖകരമാണ്.'- ടീക്കാറാം മീണ പ്രതികരിച്ചു.
അതേസമയം റിമാന്ഡിലുള്ള ശ്രീറാം വെങ്കിട്ടരാമനെ പൊലീസ് സെല്ലില് നിന്ന് മാറ്റി. ആദ്യം സര്ജിക്കല് ഐസിയുവില് പ്രവേശിപ്പിച്ചു. രാവിലെ മള്ട്ടി സ്പെഷ്യാലിറ്റി ഐസിയുവിലാക്കി. മാറ്റങ്ങളുടെ കാരണം വ്യക്തമാക്കാന് മെഡിക്കല് കോളജ് അധികൃതര് തയ്യാറായിട്ടില്ല. ശ്രീറാമിന്റെ ജാമ്യാപേക്ഷ തിരുവനന്തപുരം സിജെഎം കോടതി ഇന്നു പരിഗണിക്കും. കഴിഞ്ഞ ദിവസമാണ് അദ്ദേഹം ജാമ്യാപേക്ഷയുമായി കോടതിയെ സമീപിച്ചത്. കുറ്റം നിഷേധിച്ച ശ്രീറാം നരഹത്യയ്ക്കുള്ള കേസ് നിലനില്ക്കില്ലെന്നാണ് ജാമ്യാപേക്ഷയില് പറയുന്നത്. കേസില് നിര്ണായകമായ രക്തപരിശോധനാഫലവും ഇന്ന് പുറത്തുവരും.
സംഭവം നടന്ന് 9 മണിക്കൂറിനുശേഷമായിരുന്നു ശ്രീറാം വെങ്കിട്ടരാമന്റെ രക്തം പരിശോധനയ്ക്കച്ചത്. കെമിക്കല് ലാബിലെ പരിശോധനാഫലം കഴിഞ്ഞദിവസം അനൗദ്യോഗികമായി പൊലീസിനെ അറിയിച്ചതായും വിവരമുണ്ട്. ഇതില് മദ്യത്തിന്റെ അംശം കണ്ടെത്താനായില്ലെന്നാണ് സൂചന.
