മലയാളത്തിന്റെ നിത്യവസന്തങ്ങളായിരുന്നു സത്യന്, പ്രേം നസീര്, ഷീല കാലഘട്ടത്തിലുണ്ടായിരുന്നത്. സത്യന് - ഷീല - നസീര് കൂട്ടുകെട്ടില് ഒരുങ്ങിയ പല ചിത്രങ്ങളും വന് ഹിറ്റായിരുന്നു. ഇന്നുള്ളതിനേക്കാള് സ്നേഹമൂഹൂര്ത്തങ്ങളും നന്മ മുഹൂര്ത്തങ്ങളുമൊക്കെ അന്ന് നിരവധി ഉണ്ടായിരുന്നു. അത്തരത്തില് ഒരു രസകരമായ സന്ദര്ഭത്തെ കുറിച്ചാണ് നടന് ജയറാം പറയുന്നത്.
ഒരു പ്രമുഖ ടെലിവിഷന് നല്കിയ അഭിമുഖത്തിലാണ് നസീറും സത്യനും ഷീലയും ഒത്തുചേര്ന്ന ഒരു സിനിമാ ലൊക്കേഷനില് ഉണ്ടായ രസകരമായ സന്ദര്ഭത്തെ കുറിച്ച് ജയറാം പറഞ്ഞത്. ''ഒരിക്കല് ഷീലാമ്മ ഒരു തമാശ പറഞ്ഞു. ഏതോ അഭിമുഖത്തില് പറഞ്ഞതാണ്. പിന്നെ ഞാന് തന്നെ അതിനെ കുറിച്ച് നേരിട്ട് ചോദിക്കുകയും ചെയ്തു. സത്യന് മാഷും പ്രേംനസീറും ഒരുമിച്ച് അഭിനയിക്കുന്ന ഒരു ചിത്രമാണ്. ഒരു മലഞ്ചെരുവിലാണ് ഷൂട്ടിംഗ്. ഷൂട്ടിനിടയില് സത്യന് മാഷ് പറഞ്ഞു, ഈ ഗര്ഭം എന്റേതാണ്. അല്ല എന്റേതാണെന്ന് ഉടനെ നസീര് സാറും പറഞ്ഞു.
അങ്ങനെ ഒരു മണിക്കൂറോളം രണ്ടുപേരും വാദിക്കാന് തുടങ്ങി. ഉച്ചയായപ്പോഴാണ് എല്ലാവര്ക്കും സംഗതി മനസിലായത്. സിനിമയില് ഷീലാമ്മ ഗര്ഭിണിയായിട്ടാണ് അഭിനിയിക്കുന്നത്. അതിനായിട്ട് വയറില് ഒരുതലയിണ വച്ച് കൊട്ടിയിട്ടുമുണ്ട്. ഉച്ചയ്ക്ക് ഒരു മരച്ചുവട്ടില് കിടക്കാന് ആ തലയിണയ്ക്ക് വേണ്ടിയായിരുന്നു രണ്ടു പേരുടെയും തര്ക്കം. അങ്ങനെയൊക്കെയായിരുന്നു അവരുടെ കാലഘട്ടത്തില്.'' - ജയറാം പറഞ്ഞു.
