തിരുവനന്തപുരം: മരടില് തീരദേശ പരിപാലന ചട്ടം ലംഘിച്ച് നിര്മ്മിച്ച ഫ്ളാറ്റുകള് പൊളിക്കണമെന്ന സുപ്രീം കോടതി വിധിയെ പിന്തുണച്ച് ഭരണപരിഷ്കരണ കമ്മീഷന് ചെയര്മാന് വി.എസ് അച്യുതാനന്ദന്. ഫ്ളാറ്റ് സമുച്ചയം പൊളിച്ചുമാറ്റാന് കോടതി ഉത്തരവിട്ടത് രാജ്യത്തെ നിയമ വ്യവസ്ഥയുടെ അടിസ്ഥാനത്തിലാണ്. അഴിമതിക്കും നിയമലംഘനത്തിനും കൂട്ടുനില്ക്കുന്ന അവസ്ഥ സര്ക്കാരിന്റെ ഭാഗത്തുനിന്നുണ്ടാകരുത്. സര്വകക്ഷിയോഗത്തില് ഇക്കാര്യത്തില് ഉചിതമായ നിലപാട് എടുക്കുമെന്ന് പ്രതീക്ഷിക്കുന്നതായും വി.എസ് അച്യുതാനന്ദന് പ്രസ്താവനയില് പറഞ്ഞു.
അനധികൃത നിര്മ്മാണം നടത്തിയ ഫ്ളാറ്റ് നിര്മ്മാതാക്കാളെ കരിമ്പട്ടികയില് പെടുത്താന് സര്ക്കാര് തയ്യാറാകണം. നിയമലംഘനത്തിന് കൂട്ടുനിന്ന ഉദ്യോഗസ്ഥര്ക്കെതിരെയും നടപടി വേണം. സമൂഹത്തിലെ ചില വമ്പന്മാര്ക്ക് സൗജന്യമായി ഫ്ളാറ്റുകള് നല്കുന്നതും അവരെ ചൂണ്ടിക്കാട്ടി മറ്റ് ഫ്ളാറ്റുകള് വിറ്റഴിക്കുകയുമാണ് ഇവരുടെ വിപണന തന്ത്രം. ഈ രീതി തുടരുന്ന നിരവധി ബില്ഡര്മാര് വേറെയുമുണ്ടെന്ന് വി.എസ് പ്രസ്താവനയില് കുറ്റപ്പെടുത്തി.
പ്രസ്താവനയുടെ പൂര്ണ്ണരൂപം:
'രാജ്യത്തെ നിയമവ്യവസ്ഥയുടെ അടിസ്ഥാനത്തിലാണ്, മരടിലെ ഫ്ലാറ്റ് സമുച്ചയം പൊളിക്കണമെന്ന സുപ്രീംകോടതിയുടെ വിധി ഉണ്ടായിട്ടുള്ളത്. എന്നാല് നിയമങ്ങള് ലംഘിച്ച് ഇത്തരം നിര്മ്മാണ പ്രവര്ത്തനങ്ങള് നടക്കുകയും, അക്കാര്യം ചൂണ്ടിക്കാട്ടപ്പെടുമ്പോഴെല്ലാം നീതിപീഠങ്ങളില്നിന്ന് സ്റ്റേ സമ്പാദിച്ച ശേഷം നിര്മ്മാണ പ്രവര്ത്തനങ്ങള് പൂര്ത്തിയാക്കുകയും, പിന്നീടത് വിറ്റഴിക്കുകയും ചെയ്യുകയാണ് ഒരു കൂട്ടം ബില്ഡര്മാര് ചെയ്തുകൊണ്ടിരിക്കുന്നത്. സമൂഹത്തിലെ ചില വമ്പന്മാര്ക്ക് സൗജന്യമായി ഫ്ലാറ്റുകള് നല്കുകയും അവരെ ചൂണ്ടിക്കാട്ടി മറ്റ് ഫ്ലാറ്റുകള് വിറ്റഴിക്കുകയുമാണ് ഇക്കൂട്ടരുടെ വിപണന തന്ത്രം. ഈ രീതി തുടരുന്ന നിരവധി ബില്ഡര്മാര് വേറെയുമുണ്ട്. പാറ്റൂര് ഫ്ലാറ്റ് ഇത്തരത്തില് അനധികൃതമായി നിര്മ്മിച്ചതാണെന്ന് ചൂണ്ടിക്കാട്ടി ഞാന് നിയമ നടപടി സ്വീകരിച്ചുവരികയാണ്. മറ്റ് ചില കക്ഷികളും ഇതേ വിഷയത്തില് കേസ് നടത്തുന്നുണ്ട്. നിര്മ്മാണത്തിന്റേയും വിറ്റഴിക്കലിന്റേയും ഘട്ടങ്ങളില് ഇടപെടാതിരിക്കുകയും, പിന്നീട് നിയമ നടപടി പൂര്ത്തിയാവുമ്പോള് അതിന്റെ ബാദ്ധ്യത പൊതുജനം ഏറ്റെടുക്കണം എന്ന് വാദിക്കുകയും ചെയ്യുന്നത് അഴിമതിക്കും നിയമലംഘനത്തിനും കൂട്ടു നില്ക്കലാവും.
ഈ വിഷയവുമായി ബന്ധപ്പെട്ട് നടക്കാനിരിക്കുന്ന സര്വ്വകക്ഷി യോഗം ഇക്കാര്യം പരിഗണിക്കണമെന്നാണ് ഈ ഘട്ടത്തില് ആവശ്യപ്പെടാനുള്ളത്. ഇപ്പോള് നിയമ നടപടി തുടരുന്ന ഫ്ലാറ്റുകളുടെ വില്പ്പനയുടെ കാര്യത്തിലും നിലപാട് ചര്ച്ച ചെയ്യണം. ഉപഭോക്താക്കളെ വഞ്ചിച്ച നിര്മ്മാതാക്കളെ കരിമ്പട്ടികയില് പെടുത്തുകയും അവര്ക്കും, വഴിവിട്ട് അനുമതികള് നല്കിയവരും അവര്ക്ക് പ്രചോദനം നല്കിയവരുമായ എല്ലാവര്ക്കും എതിരായി നിയമ നടപടി സ്വീകരിക്കണം.'
