ന്യൂഡല്ഹി: അമേരിക്കന് പര്യടനത്തിന് പുറപ്പെടുന്ന പ്രധാനമന്ത്രി നരേന്ദ്രമോഡിയുടെ വിവിഐപി വിമാനത്തിന് വ്യോമപാത അനുവദിക്കില്ലെന്ന് വ്യക്തമാക്കി പാകിസ്താന്. 'കശ്മീരിലെ നിലവിലെ സ്ഥിതിയില്' പ്രതിഷേധിച്ചാണ് നടപടി. എന്നാല് പാകിസ്താന് നിലപാട് ഖേദകരമാണെന്നായിരുന്നു ഇന്ത്യയുടെ പ്രതികരണം.
ജര്മ്മനി വഴിയാണ് മോഡിക്ക് ഈ മാസം 21ന് അമേരിക്കയിലേക്ക് പോകേണ്ടത്. 28ന് ഇതേപാതയില് മടങ്ങിവരികയും വേണം. ഇതിനായി വ്യോമപാത ഉപയോഗിക്കാന് അനുവദിക്കണമെന്ന് ഇന്ത്യ അഭ്യര്ത്ഥിച്ചിരുന്നതായി പാക് വിദേശകാര്യമന്ത്രി ഷാ മെഹമൂദ് ഖുറേഷി അറിയിച്ചു.
മോഡിയുടെ എയര് ഇന്ത്യ വണ് വിമാനം പാകിസ്താനു മുകളിലൂടെ പറത്താന് അനുവദിക്കില്ലെന്ന് ഇസ്ലാമാബാദിലെ ഇന്ത്യന് ഹൈക്കമ്മീഷണറെ അറിയിച്ചതായും ഖുറേഷി വീഡിയോ പ്രസ്താവനയില് പറയുന്നു. കശ്മീരിലെ നിലവിലെ അവസ്ഥയും അവിടെ ഇന്ത്യയുടെ മനോഭാവവും അതിക്രമങ്ങളും പരിഗണിച്ചാണ് ഈ നടപടിയെന്ന് ഖുറേഷി ചൂണ്ടിക്കാട്ടി.
ഈ മാസം 22ന് യു.എസ് പ്രസിഡന്റ് ഡൊണാള്ഡ് ട്രംപിനൊപ്പം 'ഹൗഡി മോഡി' പരിപാടിയില് പങ്കെടുക്കുന്നതിനാണ് മോഡി അമേരിക്കയിലേക്ക് പോകുന്ന്. ന്യുയോര്ക്കില് യു.എന് പൊതുസഭയിലും 27ന് അദ്ദേഹം സംസാരിക്കുന്നുണ്ട്.
രണ്ടാഴ്ചയ്ക്കുള്ളില് ഇത് രണ്ടാം തവണയാണ് ഇന്ത്യയുടെ വിവിഐപി സ്പെഷ്യല് വിമാനത്തിന് പാക് വ്യോമപാത നിഷേധിക്കുന്നത്. ഇത് അങ്ങേയറ്റം ഖേദകരമാണെന്ന് വിദേശകാര്യ മന്ത്രാലയം വ്യക്താവ് റവീഷ് കുമാര് പറഞ്ഞു. ഈ മാസം ആദ്യം ഐസ്ലാന്ഡിലേക്ക് പുറപ്പെട്ട രാഷ്ട്രപതി രാംനാഥ് കോവിന്ദിന്റെ വിമാനത്തിന് പാകിസ്താന് പാത നിഷേധിച്ചിരുന്നു. കശ്മീരിലെ സംഘര്ഷങ്ങളുടെ പശ്ചാത്തലത്തില് പാക് പ്രധാനമന്ത്രി ഇമ്രാന് ഖാന് ആണ് ഈ തീരുമാനമെടുത്തത്.
